प्रेरितहोन 14

इकुनीयुम मे पौलुस अरु बरनबास

1इकुनीयुम मे असो हुयो कि वे यहूदीया होन आराधनालय प्रकार बात करी कि यहूदीयाहोन अरु यूनानीहोन दो मे से भोतझन ने विश्वास कर्यो. 2पन विश्वास नी करणआला यहूदीयाहोन ने गैरयहूदिहोन का मन भैइहोन का विरोध मे उकसायो अरु कटुरता पइदा करी दी. 3वे भोत दिन तक वहा र्‍हिया अरु प्रभु का भरोसा पर हिम्मत से बात करता था. अरु उ उनका हाथहोन से चिन्ह अरु अदभुत काम करी खे अपनो अनुग्रह को वचन पर गवइ देतो थो. 4पन नगर का दुन्या मे फुट पडी गइ थी, उकासे कत्ता तो यहूदीयाहोन की तरफ अरु कात्ता प्रेरितहोनक का तरफ हूइ गया.

5पन जब गैरयहूदिहोन अरु यहूदीया उनको अपमान अरु उन पर पथराव करण का लिये अपना सरदारहोन समेत उन पर दौड्या. 6ते वे या बात जानी गया, अरु लुकाउनीया का लुस्त्रा अरु दिरबे नगरहोन मे अरु आस पास का प्रदेशहोन मे भागी गया. 7अरु वहा सुसमाचार सुनान लग्या.

लुस्त्रा अरु दिरबे मे

8लुस्त्रा मे एक इन्सान बठौ थो, जो पाय को नगडो थो उ जन्म ही से लगडो थो अरु कभी नी चल्यो थो. 9उ पौलुस खे बात करता सुनी र्‍हो थो. पौलुस ने ओका तरफ टकटकी लगैइ खे देख्यो कि ओखे अच्छो हुइ जान को विश्वास हइ. 10अरु उचो बोल से बोल्यो, अपना पाय का बल सीधो खडो हो. तब उ उछली खे चलन फिरन लग्यो. 11दुन्या ने पौलुस को यो काम देखी खे लुका उनीया की भाषा मे उचो बोल से बोल्यो देवता इन्सानहोन का रुप मे हुइ खे हमारा पास उतरी आया हइ. 12उनने बरनबास खे ज्यूस अरु पौलुस खे हिरमेस बोल्यो क्युकि उ बात करणा मे मुख्य थो. 13ज्यूस खे वा मदिर को पुजारी जो उनका नगर का सामने थो, बैल अरु फूलहोन को हार फाटकहोन पर लैइ खे दुन्या का साथ बलिदान करणो चाहतो थो.

14पन बरनबास अरु पौलुस प्रेरितहोन जब यो सुन्यो ते अपना कपडा फाड्या अरु गर्दी मे लुकी खे अरु पुकारी खे बोलन लग्या. 15हे दुन्या, तुम का करस हइ? हम भी ते तुम्हारा सामन दुख सुख भोग्या इन्सान हइ, अरु तुम खे सुसमाचार सुनास हइ कि तुम इन बेकार चिजहोन से अलग हुइ खे जीवते परमेश्वर का तरफ फिरनु, जेने स्वर्ग अरु पृथ्वी अरु समुदर अरु जो कुछ उनमे हइ बनायो. 16ओने बीत्या टेमहोन मे सब जातहोन खे अपना अपना मार्गहोन मे चलन दियो. 17तेभी ओने अपना आप खे बे गवाह नी छोड्यो. किन्तु उ अच्छो करता र्‍हियो, अरु स्वर्ग से बारीश अरु फलवन्त ऋतु दिके तुम्हारा मन को भोजन अरु खुशी से भरता र्‍हियो. 18यो बोली खे भी उनने दुन्या खे बडी कठनाइ से रोक्यो कि उनका लिये बलिदान नी कर्ये.

19पन कुछ यहूदीयाहोन ने अन्ताकिया अरु इकुनीयुम से अय खे दुन्या खे अपनी तरफ करी लियो, अरु पौलुस पर पथराव कर्यो, अरु मर्यो समझी खे ओखे नगर का बाहर घसीटी लि गया, 20पर जब चेला ओका चारी तरफ अय खडा हुया ते उ उठी खे नगर मे गयो अरु दूसरा दिन बरनबास का साथ दिरबे खे चली गयो.

सीरिया को अन्ताकिया खे लौटनो

21वे उ नगर का दुन्या को सुसमाचार सुन्ये का, अरु भोत सा चेला बन्या का लुस्त्रा अरु इकुनीयुम अरु अन्ताकिया खे लौटी आया. 22अरु चेलाहोन का मन खे स्थिर करता र्‍हेनु अरु यो उपदेश देता था कि विश्वास मे बन्या र्‍हेनु. अरु यो बोलता था हम बडा क्लेश उठैइ खे परमेश्वर का राज्य मे प्रवेश करण खे होनु. 23अरु उनने हर एक मंडली मे उनका लिये बुजरुक ठैरो, अरु उपास सहित प्रार्थना करी खे उनने प्रभु का हाथ सोप्यो जो पर उनने विश्वास कर्यो थो

24तब पिसिदिया से होता हुये वे पंफूलिया पहुच्या; 25फिर पिरगा मे वचन सुन्ये का अत्तलिया मे आया. 26अरु वहा से वे डोंगा पर अन्ताकिया गया, जहा वे उ काम का लिये जो उनने पूरो कर्यो थो परमेश्वर का अनुग्रह मे सौप्या गया था.

27वहा पहुची खे उनने मंडली जमा करी अरु बतायो कि परमेश्वर ने उनका साथ हुइ खे कसा बडा बडा काम कर्या अरु गैरयहूदिहोन का लिये विश्वास को दरवाजो खोली दियो. 28अरु वे चेलाहोन का साथ भोत दिन तक र्‍हिया.