परमेश्वर को पवित्र वचन
प्रेरितहोन 12
अरु छल
उ टेम हेरोदेस राजा ने मंडली का कइ इन्सानहोन का सतान का लिये उन पर हाथ डाल्यो. ओने यहून्ना को भैइ याकूब खे तलवार से मरी डाल्यो. जब ओने देख्यो कि यहूदीया दुन्या येका से आनन्दित होस हइ, ते ओने पतरस खे भी पकडी लियो. वे दिन अखमीरी रोटी को दिन था. ओने ओखे पकडी खे बन्दीगृह मे डाल्यो, अरु चार चार का चार पहरेदारहोन मे रख्यो. या बिचार से कि फसह का बाद ओका दुन्या का सामने लायो. बन्दीगृह मे पतरस बन्द थो. पन मंडली ओका लिये लौ लगैइखे परमेश्वर से प्रार्थना करी र्हि थी.
पतरस को जोल से छुटकारो
जब हेरोदेस पतरस खे इन्सानहोन का सामने एक रात पहइले, दो साकल से बध्यो हुयो दो सिपैइहोन का बीच मे र्हियो थो. अरु दरवाजा पर बन्दीगृह की रखवाली करी र्हा था. ते देखनु, प्रभु को एक स्वर्गदूत अय खडो हुयो अरु उ कोठरी मे ज्योति चमकी, अरु ओने पतरस पर हाथ मारी खे ओका जगायो अरु बोल्यो, उट जल्दी कर. अरु ओका हाथ से साकल खुली खे गिरी पडी. तब स्वर्गदूत ने ओकसे बोल्यो, कम्मर बाध अरु अपना जूता पेनी ले. ओने वसो ही कर्यो. फिर ओने ओकासे बोल्यो, अपना कपडा पेनीखे मरा पीछे अय जा. उ नीकली खे ओका पीछे अयगो. पन यो नी जानतो थो कि जो कुछ स्वर्गदूत करी र्हो हइ उ सच हइ, क्युकी यो समझ्यो कि मी दर्शन देखी र्हो हइ. तब वे पैयला अरु दूसरा दुपेर से नीकली खे उ लोहा का फाटक पर पहुचा, जो नगर का तरफ हइ. उ उनका लिये आप से आप खुली गयो, अरु वे नीकली खे एक गल्ली हुइ खे गया, अरु जल्दी ही स्वर्गदूत ओका छोडी खे चली गयो.
तब पतरस ने सचेत हुइ खे बोल्यो, “अब मे ने सच जानी लियो हइ कि प्रभु ने अपनो स्वर्गदूत भेजी खे मेखे हेरोदेस का हाथ से छुड्य लियो, अरु यहूदीया होन की पुरी आस तोडी दि हइ.” यो जानी खे उ उस यहून्ना की माय मरियम का घर आयो, जो मरकुस बोल्या जास हइ. वहा भोत सा दुन्या जमा हुइ खे प्रार्थना करी र्हा था. जब ओने फाटक की खिडकी ठोकी, ते रुदे नाम की एक दासी देखन अय पतरस को बोल पैछानी खे ओने खुशी का मारे फाटक नी खोल्यो, पन दौडी खे अंदर गइ अरु बतायो कि पतरस दरवाजा पर खडो हइ. उनने ओकासे बोल्यो, तू पागल हइ. पन वा दृढता से बोली कि असो हि हइ. तब उनने बोल्यो कि ओको स्वर्गदूत हुये.
पन पतरस खटखटातो ही र्हियो. आखरी उनने खिडकी खोली अरु ओखे देखी खे चकित र्हि गया. तब ओने उनका हाथ से हुशार करीयो कि चुप र्हे. अरु उनखे बतायो कि प्रभु कोय रीति से ओखे बन्दीगृह से नीकाली लायो हइ. फिर बोल्यो, “याकूब अरु भैइहोन के या बात बतै देनु.” तब नीकली खे दूसरा जगा चली गयो.
फजर का सिपैइहोन मे बडी हलचल मची गइ कि पतरस को का हुयो. जब हेरोदेस ने ओकी खोज की अरु नी पायो, ते पहरुहोन की परख्ये करी खे आज्ञा दि कि वे मारी डाल्यो जाये.
अरु उ यहूदीया खे छोडी खे कैसरिया मे जै खे र्हेन लग्यो.
हेरोदेस को मरनो
हेरोदेस सूर अरु सैदा का दुन्या से भोत थो. येका लिये वे एक चित्त हुइ खे ओका पास आया. अरु बलास्तुस को जो राजा को एक कर्मचासरी थो, मानी खे मेल करणो चायो. क्युकि राजा का देश से उनका देश को पालन पोषण होतो थो.
ठैरायो हुया दिन हेरोदेस राज कपडा परनी खे राजगद्दी पर बठौ, अरु उनको व्याख्यान देन लग्यो. तब दुन्या पुकार उठ्यो, यो ते इन्सान को नी इश्वर को बोल हइ. उ टेम प्रभु को एक स्वर्गदूत ने जल्दी ओखे मार्यो, क्युकि ओने परमेश्वर कि महिमा नी दी. अरु उ किडा लगी खे मरी गयो.
पन परमेश्वर को वचन बडतो अरु फैलतो गयो.
जब बरनबास अरु शाउल अपनी सेवा पूरी करी चुक्या ते यहून्ना को जो मरकुस बोल्या जास हइ, साथ ली खे यरुशलेम से लौट्यो.
परमेश्वर को पवित्र वचन. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.