1 यूहन्ना 2

मसीहा हमारो मदतगार

1हे मरा बच्चाहोन मी या बातहोन तुमखे येका लिये लिखुस हइ कि तुम पाप नी करणु. अरु अगर कोय पाप कर्ये ते बाप का पास हमारो एक मदतगार हइ अगर धर्मी यीशु मसीह 2अरु हमारो पापहोन का बदला उ मर्यो हइ, अरु फक्त हमारो ही नी क्युकी पुरा संसार को पाप को भी.

3अगर हम ओकी आज्ञा खे मान्ये ते येमे हम जानी लिये कि हम ओखे जानी गो हइ. 4जो कोय यो बोलस हइ मी ओखे जानी गो हइ अरु ओकि आज्ञा खे नी माने उ झुठो हइ अरु ओमे सच्ची नी आय. 5पर जो कोय ओका वचन पर चलस ओमे सच मेच परमेश्वर को प्रेम सिध्द हुयो हइ येमे से हम जानस हइ कि हम ओमे एक हइ. 6जो कोय यो बोलस हइ कि मी ओमे बन्यो र्‍हियु हइ ओको होनु कि तुम भी ओसो ही चल्ये जसो यीशु मसीह चलतो थो.

नइ आज्ञा

7हे मरा मसीह भैइ मी तुम खे कोय नवि आज्ञा नी लिखुस पर उ पुरानी आज्ञा जो पहिले से तुम खे मीली हइ या पुरानी आज्ञा हि वचन हइ जेखे तुम ने सुन्यो हइ. 8फिर भी मी तुम खे नवि आज्ञा लिखुस हइ अरु यो ओमे अरु तुम मे सत्य ठैरी हइ, क्युकि अन्धर नीकली जास हइ अरु सच्चीइ की ज्योति चमकन लगी हइ.

9जो कोय यो बोलस हइ कि मी ज्योति मे हइ अरु अपना भैइ से बैर रखस हइ उ अब तक अन्धार मे ही हइ. 10जो कोय अपना भैइ से प्रेम रखस हइ उ ज्योति मे र्‍हेस हइ अरु कोय को ठोकर को करण नी बने. 11पर जो अपना भैइ से बैर रखस हइ उ अन्धार मे हइ अरु अन्धार मे चलस हइ अरु नी जाने कि किधर जास हइ क्युकि अन्धार ने ओकी आखहोन अन्धी करी दी हइ.

12हे बच्चाहोन मी तुमखे येका लिये लिखुस हइ कि ओका नाम से तुम्हारा पाप माफ हुया हइ. 13हे पितरो मी तुमखे येका लिये लिखुस हइ कि जो पइले से हइ तुम ओखे जानस हइ. हे जवानहोन मी तुम खे येका लिये लिखुस हइ कि तुम ने उ पापी पर विजय पायो हइ हे जवानहोन मी तुमखे येका लिये लिखुस हइ कि तुम बाप खे जानी गा हइ.

14हे पितरो मेने तुम खे येका लिये लिखुस हइ कि जो पइले से हइ तुम ओखे जानी गा हइ हे जवानहोन मी तुमखे येका लिये लिखुस हइ कि तुम बलवान हइ, अरु परमेश्वर को वचन तुम मे बन्यो र्‍हेस हइ अरु तुमने उ पापी पर विजय पायो हइ.

15तुम नी संसार से अरु नी संसार मे चिजहोन से प्रेम रखस. अगर कोय संसार से प्रेम रखस हइ, ते ओमे बाप को प्रेम नी हइ. 16क्युकि जो कुछ संसार मे हइ अगर आंग की अभिलाषा अरु जीवि को घमण्ड उ बाप का तरफ से नी पन संसार हि का तरफ से हइ. 17संसार अरु ओकी अभिलाषाहोन दोय मीटी जास हइ पर जो परमेश्वर की इच्छा पर चलस हइ उ हमेशा जिन्दो र्‍हिये.

मसीह-विरोधी

18हे पोर्याहोन, यो आखरी टेम हइ. अरु जसो तुमने सुन्यो हइ कि मसीह को विरोधी आन आलो हइ, ओका जसो अब भी भोत से मसीहा विरोधी उठी खे खडा हुया हइ येमे हम जानस हइ कि यो आखरी टेम मे हइ. 19वे नीकल्या ते हमारा मेसे पर हम मे का थो नी. क्युकि अगर वे हमारा मे का था ते हमारा साथ र्‍हेता पर नीकल्या येका लिये गया कि यो प्रगट हुयो कि सब हम मे का नी.

20पन तुम्हारो तो उ पवित्र से अभिषेक हुयो, हइ अरु तुम सब कुछ जानस हइ. 21मे ने तुम खे येका लिये नी लिख्यो कि तुम सच्चाइ खे नी जानस पर येका लिये कि ओखे जानस हइ का अरु येका लिये कि कोय झुठ, सच्चाइ का तरफ से नी.

22झूठो कोन हइ? फक्त उ जो यीशु मसीहा नी अरु मसीह को विरोधी उ हइ, जो बाप को अरु बेटा को इनकार करस हइ. 23जो कोय बेटा को इनकार करस हइ ओका पास बाप भी नी. जो बेटा खे मानी लेस हइ, ओका पास बाप भी हइ.

24जो संदेश तुम ने पइले से सुन्यो हइ अगर उ तुम मे बन्यो र्‍हिये ते तुम भी बेटा मे अरु बाप मे बन्या र्‍हिये. 25अरु जोकी ओने हम से प्रतीज्ञा करी उ अनन्त जिवन हइ.

26मे ने या बातहोन तुम खे उनका बारे मे लिखी हइ जो तुमखे भरमास हइ. 27पन तुम्हारो उ पवित्र आत्मा जो ओका तरफ से कर्यो गयो तुम मे बन्यो र्‍हेस हइ. अरु तुम खे येको जरुरत नी. कि कोय तुम खे सिकाये क्युकी जसो उ पवित्र आत्मा जो ओका तरफ से कर्यो गयो तुमखे सब बातहोन सिखातो हइ अरु उ सत्य हइ अरु झुठो नी आय. अरु जसो ओने तुमखे सिखायो हइ ओसो ही तुम ओमे बन्या र्‍हेस हइ.

28अब हे बच्चाहोन ओमे बन्या र्‍हेनु कि जब उ प्रगट हुये ते हम खे धीरज हो अरु हम ओका आना पर ओका सामने सरमीन्दा नी हुये. 29अगर तुम जानस हइ कि उ न्यायी हइ, ते यो भी जानस हइ कि जो कोय सही काम करस हइ उ ओकासे जनम्यो हइ.