ሶፎናሳ 3

የሩሳላመ ዎዘተ

1ማካላንቹዋስ፥ ቱንዳይሳስነ ባ ደርያ ኡንኤዳ የሩሳላመ ካታማ አየ! 2እ ኦናካ ኪተተና፤ ሴርን ስመና፤ ጎዳን አማነተና፤ ባ ፆሳኮ ሺቀና። 3እያ ሀላቃት ጉድያ ጋሞ መላ፤ እያ ዳይናት ደምዳባ ዎንቶስ አሾና ኡባ ምድ ኦንግያ ኦማርሳ ሱመ መላ። 4እያ ናበት ኦቶራንቾነ ገናንቾ፤ እያ ካህነት ጌሻ ቱንሰይሳታ፤ ኤንቲ ጎዳ ህግያ ምርቆሶና። 5ሽን እያ ግዶን ደእያ ጎዳይ ፅሎ፤ እ ባላ ኦና። ዎንታ ዎንታ እ ፅሎ ፕርዴስ፤ ጋላስ ጋላስ ሄሳ አገና። ግዶሽን፥ ያን ደእያ ጌላይ ዬላ ኤረና።

6“ታኒ ካዎተታ ይሳስ፤ ኤንታ ግምበታ ላላስ። ኤንታ ካታማታ እስ ዶና ባይሳ ቢታ ኦስ፤ ኤንታ ኦገታ አስ ካንና ባዞ ኦስ። 7ታኒ ሀይሳ ኡባ ኦዳ፥ ‘ታ አሳይ ታና ቦንቻና፤ ታ ሴራ ኤካና፤ ታ ኪትዳባ ዶገና’ ያጋስ። ሽን ኤንቲ ካሰፐ አድ ኢትዶሶና፤ ባንታ ኦሱዋን ቱንዶሶና” ያጌስ ጎዳይ።

8“አነ ታኒ ፕርድያ ጋላሳይ ጋካናዉ ጉ ናግተ። ታኒ ደረታነ ካዎተታ ሺሻናዉ ቆፋ ቃቻስ፤ ታ ሀንቁዋ ሱላ ኤንታ ቦላ ጉሳና፤ ቢታይ ኩመ ታ ሀንቁዋ ታማን ፁገታና።

9“ሄ ዎደ አሳ ኡባይ ጌሻ ኦዳ ኦደታና መላ ኦና። ኤንቲ ኡባይ ጎዳ ሱን ፄጋና፤ እስፈ እያዉ ጎይናና። 10ላለትዳ አሳይ፥ ታና ቱማ ጎይነይሳት፥ ቶጰ ሻፋታፐ ሄፍንን ደኤይሳት ታዉ እሞታ ኤሀና። 11ኦቶረይሳታነ ጬቀተይሳታ ታ ህንተ ግዶፈ ይስያ ግሾ፥ ሄ ዎደ ህንተ ታ ቦላ ኦዳ ኦሱዋ ጋሶን ዬላተከታ። ህዛፐ ጉየ ህንተ ታ ጌሻ ዙማ ቦላ ኦቶርተከታ። 12ታኒ ህንተ ግዶፈ ባንታና ካዉሸይሳታነ አዳታ አሻና፤ ኤንቲ ጎዳ ሱንን አማነታና። 13እስራኤለ አሳፐ አትዳይሳት ኢታባ ኦኮና፤ ዎርዶ ኦደቶኮና፤ ኤንታ እንፃርሳን ጭሞይ በንተና። ሄሳ ግሾ፥ ኤንቲ ምድ ካልድ ሳሮን ዳና፤ ኤንታ ያሽስያባይ ባዋ” ያጌስ።

14ፅዮነ ናኤ፥ ማዝሙርያ የፃ!

እስራኤለ አሳዉ፥ እልልተ!

የሩሳላመ ናኤ፥ ነ ፖሎ ዎዛናፐ ኡፋይታ፤

ሀሹ ጋ!

15ጎዳይ ህንተ ቦላ ፕርድዳ ፕርዳ አግስ፤

ህንተ ሞርከታ ድግስ።

ጎዳይ፥ እስራኤለ ካዎይ ህንተ ግዶን ደኤስ፤

ህዛፐ ጉየ ህንተና ያሽስያባይ ባዋ።

16ሄ ጋላስ ኤንቲ የሩሳላመ ሀይሳዳ ያጋና፦

“ፅዮነ፥ ያዮፋ! ነ ኩሸይ አርጋጮፖ።

17ጎዳይ፥ ነ ፆሳይ ነ ግዶን ደኤስ፤

እ ነዉ ፆኖ እምያ ኦላንቹዋ።

እ ነናን ኡፋይታና፤

ባ ሲቁዋን ነና ኦራና።

አሳይ ባኣለ ጋላስ ማዝሙረ የፀይሳዳ፥

እ ነናን ኡፋይተይሳ ማዝሙረ የፅድ በሳና” ያጋና።

18ጎዳይ ሀይሳዳ ያጌስ፦

“ህዛፐ ጉየ ነ ቦላ ዮይ ጋኮናዳ ኦና፤

ነ ዬላ ድጋና።

19ሄ ዎደ ታኒ ነና ኡንኤዳይሳታ ኡባ ሴራና፤

ዎበታ አሻና፤ ላለትዳይሳታ ሺሻና።

ኤንቲ ዬላትዳ በሳን ዛራዳ ቦንቻና፤

ኤንታ ዬላ ቦንቾንነ ሳባን ላማና።

20ሄ ዎደ ታኒ ህንተና ሺሻና፤

ህንተና እስፈ ዛራዳ ሺሻና።

ታኒ ህንተና ናንስያ ዎደ፥

ህንተ ሀ ሳአን ደእያ አሳ ኡባ ማታን፥

ቦንቸትዳይሳታነ ኤረትዳይሳታ ግዳና” ያጌስ ጎዳይ።