ዛካርያሳ 12

የሩሳላመ ሞርከት ያና

1ሳሎታ ምጭዳይ፥ ሳኣ መዳይ፥ አሳስ ደኦ አያና እምዳ ጎዳይ እስራኤለባ ኦድዳ ጎዳ ቃላይ ሀይሳ፦ 2“ሄኮ፥ ታኒ የሩሳላመ ካታማ፥ እያ ዩሹዋን ደእያ አሳ ኡባይ ኡይን ጋንድጋርስያ ዎይነ ኡሽ ትግያ ዋንጫ ኦና። የሩሳላመይ ኦይከትያ ዎደ ይሁዳ ካታማት ኦይከታና። 3ሄ ዎደ ታኒ የሩሳላመ ካታማ አሳ ኡባስ ዴፆ ሹቹ ኦና፤ እያ ደንያ ኡባይ ባዉ ደሸታና። ሳኣ ካዎተት ኡባይ እያ ኦላናዉ እስፈ ሺቃና። 4ሄ ዎደ ታኒ ፓራ ኡባ ዳጋንና፤ ፓራ አሳታ ጎሻና።” ታኒ ጎዳይ ሀይሳ ኦዳይስ። ይሁዳ አሳ ታኒ ታ ኬሀ አይፈን ፄላና፤ ሽን ሞርከታ ፓራታ ኡባ ቆቅሳና። 5ሄ ዎደ ይሁዳ ሀላቃት ባንታ ዎዛናን፥ “የሩሳላመ አሳይ ኡባፈ ዎልቃማ ጎዳን፥ ባንታ ፆሳን፥ ምኖተ ደምዶሶና” ያጋና።

6“ሄ ዎደ ታኒ ይሁዳ ኮቻታ ም ዶርያ ግዶን ደእያ ፂፋነ ምርቄታ ግዶን ላፅያ ፆምፐ ኦና። ኤንቲ ባንታ ኡሻቻን፥ ባንታ ሀድርሳንነ ባንታ ዩሹዋን ደእያ አሳ ኡባ ማና፤ ሽን የሩሳላመ ካታማይ፥ አሳይ ሳሮ ደእያ በሲ ግዳና።

7“ዳዊታ ኮቻታ ቦንቾይነ የሩሳላመን ደኤይሳታ ቦንቾይ ይሁዳ አሳ ቦንቹዋፈ አና መላ ታኒ ጎዳይ ካሰታዳ ይሁዳ አሳስ ፆኖ እማና። 8ሄ ዎደ ኤንታ ግዶን ዳሮ ላፋ ጌተትያ አስ ዳዊታ መላ ምኖ ግዳና። ታኒ ጎዳይ የሩሳላመን ደኤይሳታስ ጎንዳለ ግዳና። ዳዊታ ኮቻት ፆሳ መላ፥ ጎዳ ኪታንቾ መላ ግድድ ኤንታ ካለና። 9ሄ ዎደ ታኒ የሩሳላመ ኦላናዉ ደንድያ ካዎተታ ኡባ ይሳናዉ ደንዳና።

10“ሄ ዎደ ታኒ ዳዊታ ኮቻታ ቦላነ የሩሳላመን ደእያ አሳ ቦላ ቃነ ዎሳ አያና ጉሳና። ሄሳ ግሾ፥ ኤንቲ ባንታ ጫድዳይሳ በእያ ዎደ አስ ባ እስ ናአስ ዬከይሳዳ ዬካና። ቃስ ባ ባይራ ናአስ ካዮተይሳዳ ካዮታና። 11ሄ ዎደ የሩሳላመን ዬከትያ ዬሆይ ማግዶ ደንባን ሀዳድ-ርሞናስ ዬከትዳ ዬሁዋ መላ ዎልቃማ ግዳና። 12ቢታን ደእያ እስ እስ ኮቻይ ባዉ ባዉ ዬካና፤ ዳዊታ ኮቻት ባንታ ማቸታራ፥ ናታና ኮቻት ባንታ ማቸታራ ባንታዉ፥ 13ሌወ ኮቻት ባንታ ማቸታራ ባንታዉ፥ ሳመአ ኮቻት ባንታ ማቸታራ ባንታዉ፥ ዬካና። 14አትዳ ኮቻ ኡባይ ባዉ ባዉ ዬካና፤ ኤንታ ማቸት ባንታዉ ባንታዉ ዬካና” ያጌስ።