ቆን 8

ላፑን ማታመይ ዶየትስ

1ዶርሳይ ላፑን ማታምያ ዶይዳ ዎደ ባጋ ሳተ ግደይሳ መላ ሳሎይ ስእ ግስ።

2ሄሳፈ ጉየ፥ ታኒ ላፑን ሞይዘት እመትዳ ላፑን ኪታንቾታ ፆሳ ስንን ኤቅዳይሳታ በአስ።

3እፃነ ጩይስያ ዎርቃ ሻተ ኦይክዳ ሀራ ኪታንቾይ ይድ፥ ያርሾ በሳ ማታን ኤቅስ። እ አራታ ስንን ደእያ ዎርቃ ያርሾ በሳ ቦላ ጌሻታ ኡባ ዎሳራ ጉጅድ ያርሻና መላ እያዉ ዳሮ እፃነይ እመትስ። 4እፃንያ ጩያይ ጌሻታ ዎሳራ እስፈ ኪታንቹዋ ኩሸፐ ፑደ ፆሳኮ ከይስ። 5ሄሳፈ ጉየ፥ ኪታንቾይ እፃነ ጩይስያ ሻትያ ኤክድ፥ እያን ያርሾ በሳፈ ቦንቆ ታማ ኩንድ ሳአ ዱገ ሆልስ። ያትን ደሾይ፥ ዎልአን፥ ግርስነ ቢታ ቃፆይ ሀንስ።1

ላፑን ሞይዘታ

6ሄሳፈ ጉየ፥ ላፑን ኪታንቾት ባንታ ሞይዝያ ፑናናዉ ጊገትዶሶና።

7ኮይሮ ኪታንቾይ ባ ሞይዝያ ፑንያ ዎደ ሻችነ ሱራ ዋላከትዳ ታም ሳሎፐ ቡክስ። ሳኣፐ ስኮይ ፁገትስ፤ ምፈ ስኮይ ፁገትስ፤ ጭልኦ ማታ ኡባይ ፁገትስ።2

8ናምአን ኪታንቾይ ባ ሞይዝያ ፑንዳ ዎደ ዎልቃማ ዙማ ዳንያባይ ታማን ኤፅሸ አባን የገትስ። ያትን፥ አባፈ ስኮይ ሱ ግድስ። 9አባን ደኦን ደእያ መተፈ ስኮይ ሀይቅስ፤ ማርካበታፐ ስኮይ ይስ።

10ሄን ኪታንቾይ ባ ሞይዝያ ፑንዳ ዎደ ፆምፐዳ ኤፅያ ዎልቃማ ፆልንቶይ ሻፋፐ ስኩዋ ቦላነ ፑልቶታ ቦላ ሳሎፐ ዎስ።3 11ሄ ፆልንቱዋ ሱንይ ጫሞ ጌተቴስ። ሃፈ ስኩዋ ጫምስስ፤ ሃይ ጫምዳ ግሾ፥ ዳሮ አሳይ ሄ ሃ ኡይድ ሀይቅዶሶና።4

12ኦይዳን ኪታንቾይ ባ ሞይዝያ ፑንስ። አዋፐ፥ አጌናፐነ ፆልንቶታፐ ስኩዋ ደችስ፤ ኤንታ ፖኡዋፐ ስኮይ ምስ። ጋላሳፐ ስኮይ፥ ቃማፈካ ስኮይ ምስ።5

13እስ አርጋን ሳሎ ቁ ግድ፥ ፕራሽን በአስ። ሄ አርጋንይ ባ ቃላ ቁ ኦድ፥ “አትዳ ሄ ኪታንቾት ባንታ ሞይዝያ ፑናናዉ ደእያ ግሾ፥ ሳአን ደእያ አሳ አየ! አየ! አየ!” ያግሽን ስአስ።