ጌሻ ማፃፋ
ቆን 2
ኤፈሶና ዎሳ ኬ
“ኤፈሶና ዎሳ ኬ ኪታንቹዋስ ሀይሳዳ ያጋዳ ፃፋ።
ባ ኡሻቻ ኩሸን ላፑን ፆልንቶታ ኦይክዳይስነ ላፑን ዎርቃ ኮጫታ ግዶራ ሄመተይስ ሀይሳዳ ያጌስ፦ ታኒ ነ ኦሱዋ፥ ነ ዳቡራነ ነ ገንጫ ኤራይስ። ኔኒ ኢታ አሳታባ ገንጫናዉ ዳንዳአቦናይሳ ኤራይስ። ቃስ ሀዋረ ግዶናሽን ባንታና፥ ሀዋረ ገይሳታ ፕልጋ ኤራዳ ኤንቲ ዎርዳንቾ ግደይሳ ደምዳይሳ ታ ኤራይስ። ኔኒ ገንጫዳሳ፤ ታ ሱን ግሾ መቶ ዳንዳአዳሳ፤ ፆነታባካ። ግዶሽን፥ ሀእ ታ ነና ቦርያባይ ደኤስ፤ ሄስካ ኔኒ፥ ነ ኮይሮ ሲቁዋ አጋዳሳ። ህዛ፥ ነ አይ መላ ቃ በሳፈ ኩንድዳኮ አኬካ! ነ ናጋራፐ ስማ፤ ኔኒ ካሰ ኦያ ኦሱዋ ኦ። ኔኒ ነ ናጋራፐ ስሞና እፅኮ፥ ነ ፆምፐ ዎያ ኮጫ እያ በሳፈ ኤካና። ሀእ ታ ነና ናሽያ እስባይ ደኤስ፤ ታ እፅያ ንቆላዌታ ኦሱዋ ነካ እፃዳሳ።
ጌሻ አያናይ ዎሳ ኬታስ ግያባ ስአናዉ ሀይ ደእያ ኦንካ ስኦ። ፆንያ ኦንካ ፆሳ ጋናትያን ደእያ ደኦ ም አይፈፐ ማና መላ ማታ እማና።”1
ሳምርኔሳ ዎሳ ኬ
ሳምርኔሳ ዎሳ ኬ ኪታንቹዋስ ሀይሳዳ ያጋዳ ፃፋ።
“ኮይሮይነ ዉርሰይ፥ ሀይቅዳይስነ ሀይቆፐ ደንድዳይስ ሀይሳዳ ያጌስ፦2
ታኒ ነ ዋያነ ነ ማንቆተ ኤራይስ፤ ግዶሽን ኔኒ ዱረ። አይሁደ ግዶናሽን ባንታና አይሁደ ገይሳት ጫይያ ጫሻ ታ ኤራይስ፥ ሽን ኤንቲ ፃላሄ ማባራን ደኦሶና። ኔኒ ኤካናዉ ደእያ ዋይያ ባቦፋ። ፃላሄይ ህንተፈ እሶታ እሶታ ፓጫናዉ ቃሾ ኬን የጋና፤ ታሙ ጋላስ ጋካናዉ ህንተ ዋየታና። ሀይቃና ጋካናዉ አማነትዳይሳ ግዳ፤ ታ ነዉ ደኦ ካላቻ እማና።”
“ጌሻ አያናይ ዎሳ ኬታስ ግያባ ስአናዉ ሀይ ደእያ ኦንካ ስኦ። ፆንያ ኦንካ ናምአን ሀይቁዋን ቆሄተና።”3
ጳርጋሞና ዎሳ ኬ
“ጳርጋሞና ዎሳ ኬ ኪታንቹዋስ ሀይሳዳ ያጋዳ ፃፋ።
ናምኡ ባጋራ ቃራትዳ ማሻይ ደኤይስ ሀይሳዳ ያጌስ፦ ታኒ ነ ደእያ በሳ ኤራይስ፤ ኔኒ ፃላሄ አራታይ ደእያ በሳን ደኣሳ፤ ታ ሱን ምን ናጋዳሳ። ሀር አቶሽን፥ ፃላሄይ ደእያ ህንተ ካታማን ሀይቅዳ ታ አማነትዳ ማርካይ፥ አንትጳስ፥ ደእያ ዎደካ አማኑዋ አጋባካ።
ግዶሽን፥ ታ ነና ቦርያ ጉባት ደኦሶና። ሄስካ እስራኤለ አሳይ ኤቃስ ያርሸትዳ ካ ምድ ቱናና መላነ ላይማተ ናጋራ ኦና መላ ባላቃ ታማርስዳ ባላማ ትምርትያ ኤክዳ እስ እስ አሳት ኔራ ደኦሶና።4 ሄሳዳካ፥ ንቆላዌታ ትምርትያ ታማርያ አሳት ኔራ ደኦሶና። ሄሳ ግሾ፥ ኔኒ ነ ናጋራፐ ስማ። ሄስ ሀኖና እፅኮ፥ ታ ኔኮ ኤለሳ ያዳ ሄ አሳታ ታ ዶናፐ ከይያ ማሻን ኦላና።”
ጌሻ አያናይ ዎሳ ኬታስ ግያባ ስአናዉ ሀይ ደእያ ኦንካ ስኦ። ፆንያ ኦደስካ ቆሰትድ ደእያ ማናፈ5 እማና። ቃስ ኤክያ ኡራፐ አትሽን፥ ሀራ አስ ኤሮና ኦራ ሱንይ ፃፈትዳ ቦ ሹቹ ታኒ እያዉ እማና።6
ትያትሮና ዎሳ ኬ
“ትያትሮና ዎሳ ኬ ኪታንቹዋስ ሀይሳዳ ያጋዳ ፃፋ።
ታማ ላጮ ዳንያ አይፈይ ደኤይስ፥ ቃስ ታማን ሴርዳ ናሰ ብራታ ዳንያ ቶሆይ ደኤይስ፥ ፆሳ ናአይ፥ ሀይሳዳ ያጌስ፦ ታኒ ነ ኦሱዋ፥ ነ ሲቁዋ፥ ነ አማኑዋ፥ ነ ኦሱዋነ ነ ገንጫ ኤራይስ። ኔኒ ኮይሮ ኦይሳፈ ሀእ አዳ ኦይሳካ ኤራይስ።
ግዶሽን፥ ታ ነና ቦርያ እስባይ ደኤስ፤ ባና ናበ ግያ ማጫስዉ፥ ኤልዛቤሎ፥ አይኮካ ጋባካ። ሄ ማጫስያ ኤቃስ ያርሸትዳ ካ ምድ ቱናናዳነ ላይማታናዳ ኦዳ ታ አይለታ ባለሱ።7 እያ ባ ናጋራፐ ስማና መላ ታ እዉ ዎደ እማስ፥ ሽን እያ ስማናዉ ኮያቡኩ። ኤንቲ እ ባላ ኦግያፐ ስሞና እፅኮ፥ ታ እዮ ኢታ ሀርገን የጋና፤ ኢራ ላይማተይሳትካ ኢታ ዋየ ዋየታና። ታኒ እ ናይታ ዎና፤ ቃስ ዎሳ ኬ ኡባይ ታ አሳ ቆፋነ አሳ ዎዛና ኤረይሳ ግደይሳ ኤራና። ታ እሱዋስ እሱዋስ ህንተ ኦሱዋዳ ኦሱዋዳ እማና።”8 ሽን ትያትሮናን ደእያ ሀራታ፥ ሄ ኢታ ትምርትያ ኤክቦናይሳታነ፥ “ፃላሄ ግታ ፁራ” ጌተትያ ሀ ትምርትያ ታማርቦና ህንተና ሀራ ዴፆ ቶሆ ቶስከ። ግዶሽን፥ ታ ያና ጋካናዉ ህንተዉ ደእያባ ምን ናግተ።
ፆነይሳስነ ዉርሰ ጋካናዉ ታዉ ኪተትያ ኦደስካ ካዎተታ ሃራና መላ ማታ እማና።9
“እ ኤንታ ብራታ ፃምአን ሃራና፤
መቃ ሚሸዳካ መንረና።”
ሄ ማታይ ታኒ ታ አዋፐ ኤክዳ ማታ መላ። ቃስ ታ እያዉ ባካላ ፆልንቶ እማና። ጌሻ አያናይ ዎሳ ኬታስ ግያባ ስእያ ሀይ ደእያ ኦንካ ስኦ።
Source notes (9)
- Cross-reference መ 2:9፤ ቆን 22:2፤ ህዝ 28:13፤ 31:8.
- Cross-reference እሳ 44:6፤ 48:12፤ ቆን 1:17፤ 22:13.
- Cross-reference ቆን 20:14፤ 21:8.
- Cross-reference ታይቦ 22:5.
- Footnote ማና፦ እስራኤለ አሳይ መላ ቢታን ሄመትያ ዎደ ሳሎፐ ፆሳይ ኤንታዉ እምዳ ዱማ ካ ዎይኮ ኪታንቾ ካ።
- Cross-reference ከሳ 16:14.
- Cross-reference 1 ካዎ 16:31፤ 2 ካዎ 9:22.
- Cross-reference ማዝ 7:9፤ ኤርም 17:10፤ ማዝ 62:12.
- Cross-reference ማዝ 2:8-9.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.