ቆን 18

ባብሎነ ኩንደ

1ያትድ፥ ግታ ማት ደእያ ሀራ ኪታንቾይ ሳሎፐ ዎሽን ታ በአስ። ሄ ኪታንቹዋ ቦንቾይ ሳአ ፖእስስ። 2ሄ ኪታንቾይ ባ ቃላ ቁ ኦድ፥

“እያ ኩንዳሱ! ግታ ባብሎነይ ኩንዳሱ!

ባብሎነይ ቱና አያናት አቅያ በሲ ግዳሱ።

ዱማ ዱማ ኢታባታስ ኬ ግዳሱ፤

ቱና ካፎትነ ዶአት ሸምፕያ በሲ ግዳሱ።1

3አሳ ኮቸ ኡባ ባ ላይማተ ዎይንያ ኡሻሱ።

ሳኣ ካዎት ኢራ ላይማትዶሶና።

እ ሚኮተፈ ደንዶይሳን

ቢታን ደእያ ዛልአንቾት ዱረትዶሶና”

ያግስ።2

4ሄሳፈ ጉየ፥ ታ ሳሎፐ ሀይሳዳ ግያ ሀራ ቃላ ስአስ።

“እ ናጋራ ኢራ ኮፆና መላነ፥

እያ ኤካናዉ ደእያ ሴራ ህንተ ኤኮና መላ፥

ታ ደርያዉ ኢፐ ከይተ።3

5ህዛ፥ እ ናጋራይ ሳሎ ጋካናዉ ዶረትስ።

ፆሳይ እ ናቁዋ አኬክስ።4

6እያ እምዳይሳ መላ ዛሪድ እዉ እምተ።

እያ ኦዳ ኦሱዋስ ናምኡ ኩሸ እዉ ዛርተ።

እያ ጊግስዳ ኡሻ ቦላ ህንተ ናምኡ ኩሸ ማይያ ኡሻ እ ፁአን ኩንተ።5

7እያ ባዉ ቦንቸትዳይሳዳነ እዉ እንጀትዳይሳ መላ፥

እዮ መቶተነ ካዮይተ።

እያ ባ ዎዛናን፥

‘ታኒ ካዌዳ ኡታስ፤ ታ አዝን ባይና ማጫስ ግድከ፤

ታኒ ኡባካ ካዮትከ’ ያጋሱ።

8ሄሳ ግሾ፥ ቦሻ ኡባይ፥

ሀርገይ፥ ካዮይነ ኮሽ እዮ እስ ጋላስ ኦይካና።

ቃስ እያ ታማን ፁገታና፤

አይስ ጊኮ፥ እ ቦላ ፕርድያ ፆሳይ ዎልቃማ”

ያግስ።6

9“ኢራ ላይማትዳይሳትነ እ ሚኮተን ደእዳ፥ አላምያ ካዎት ሄ ካታምያ ፁገትን ከይያ ጩያ በእዳ ዎደ እዉ ዋስድ ዬካና።7 10ኤንቲ ሄ ካታመ ዋይያ በእድ ያይዳ ግሾ፥ ሃክ ኤቅድ፥

“ ‘ሀ ግታ ካታመ! ዎልቃማ ካታመ!

ባብሎነ፥ ነና አየ!

ኔኒ እስ ሳተ ግዶን ነ ፕርዳ ኤካዳሳ’ ያጋና።

11“ኤንታ ማርካብያ ጫና ህዛፐ ሻምያ አስ ባይና ግሾ፥ ሳአን ደእያ ዛልአንቾት ሄ ካታማስ ዋሳናነ ካዮታና።8 12ኤንታ ዎርቃ፥ ብራ፥ ቦንቾ ሹቹ፥ አልኦ ሹቻ፥ ካሎሰ ማኦ፥ ሊኖ ማኦ፥ ሃረ ማኦ፥ ዞኦ ማኦ፥ ዱማ ዱማ ሳዎ ም፥ ዳንጋርሳ ዛለ፥ አልኦ ም፥ ናሰ ብራታ፥ ጎለ ሹቹ፥9 13ቃራፋ፥ ቅማመ፥ እፃነ፥ ካርበ፥ ሽቶ፥ ዎይነ፥ ዛይተ፥ ሎኦ ለ፥ ግስተ፥ መሄ፥ ዶርሰ፥ ፓራ፥ ፓራ ጋረ፥ አይለታነ ሀራ አሳታ ሻምያ ኦንካ ባዋ።

14“ዛልአንቾት ማጫሴኮ፥ ‘ኔኒ አሞትዳ ሎኦባ ኡባይ ኔፐ ይስ። ነ አቆይነ አሌቀትዳባ ኡባይ ኔፐ ሃክስ። ኔኒ ዛራዳ ኤንታ ኡባ ደማካ’ ያግዶሶና። 15ሄ ካታማን ዛልእድ ዱረትዳ ዛልአንቾት እ መቱዋ ባብድ ኢፐ ሃክድ ኤቃና። ኤንቲ ዬካናነ ካዮታና።10 16ቃስ፥

“ ‘ሊኖ፥ ካሎሰ ማኦነ ዞኦ ማኦ ማአዳ፥

ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀትዳ፥

ሄ ግታ ካታሜስ አየ! 17ሀይሳ መላ ግታ ሻሎ ኡባይ እስ ሳተ ግዶን ይስ’ ያግዶሶና።

“ማርካብያ ላግያ ኡባይ፥ ማርካብያን ብያ ኡባይ፥ ማርካብያ ቦላ ኦያ ኡባይነ አባን ዛልእያ ኡባይ ሃክ ኤቅዶሶና።11 18ሄ ካታምያ ፁገትን ከይያ ጩያ በእዳ ዎደ፥ ‘ሀ ግታ ካታምዉ ዳንያ ሀራ ካታም ደእሻ?’ ያግዶሶና።12 19ኤንቲ ባንታ ሁጰን ባና ቆልድ፥ ዋስዶሶናነ ካዮትዶሶና።

“ ‘አባ ቦላ ማርካበት ደእያ ኡባይ፥

እ ሻሉዋን ዱረትዳ ኡባይ፥

ሄ ካታምያ እስ ሳተን ይዳ ግሾ፥

አየ! አየ!

20ሳሉዋዉ፥ እ ዩዋን ኡፋይታ!

ጌሻቶ፥ ሀዋረቶ፥ ናበቶ፥

ፆሳይ ህንተ ግሾ እ ቦላ ፕርድዳ ግሾ ኡፋይትተ’ ያግዶሶና።”13

21ያትን፥ ምኖ ኪታንቾይ ዎፃ ዳንያ ግታ ሹቹ ደንድ አባን ሆልሸ፥ “ግታ ካታምያ ባብሎነይ ዎልቃን ሆለታዳ ሀይሳዳ ኩንዳና፤ እያ ሀችፈ ጉየ ኡባካ በንቱኩ።14 22ዲ ዲፀይሳትነ የፀይሳት፥ ሱሱልኤነ ሞይዘ ፑነይሳት፥ ህዛፐ ጉየ ነ ግዶን ኡባካ ስኤቶኮና። አይ ኮቻ ዛልኤ ዛልእያ አስካ ነ ግዶን በንተና። ዎፃ ግርስ ህዛፐ ጉየ ነ ግዶን ስኤተና።1516 23ፆምፐ ፖኦይ ዛሪድ ነ ግዶን ፖኤና። ማቾ ኤከይስነ አዝና ገልያር ቃል ህዛፐ ጉየ ነ ግዶን ስኤተና። ነ ዛልአንቾት ቢታ ኡባን ኤረትዳ ዎልቃማታ። ነ ብታን ካዎተታ ኡባ ጭማዳሳ” ያግስ።

24ናበታ ሱይ፥ ጌሻታ ሱይነ ቢታ ቦላ ሀይቅዳ አሳ ኡባ ሱይ እ ግዶን በንትዳ ግሾ ባብሎነይ ፕርደታሱ።17