ቆን 15

ዉርሰ ቦሻታ

1ታኒ ሳሎን ሀራ ግታነ ማላልስያ ማላታ በአስ። ፆሳ ዉርሰ ሀንቁዋ ቆንጭስያ ላፑን ቦሻታ ኦይክዳ ላፑን ኪታንቾት ደኦሶና።

2ቃስ ታማራ ዋላከትዳ ቡርጩኮ አባ ዳነይሳ በአስ። ሄ አባ ጋፃን ዶኣ፥ እያ ምስልያነ እያ ሱን ታይቡዋ ፆንዳይሳታ በአስ። ፆሳይ ኤንታዉ እምዳ ዲ ኦይክድ ኤቅዶሶና። 3ኤንቲ ፆሳ አይልያ ሙሰ ማዝሙርያነ ዶርሳ ማዝሙርያ ሀይሳዳ ያግድ የፆሶና።

“ጎዳዉ፥ ኡባፈ ዎልቃማ ፆሳዉ፥

ነ ኦሶይ ግታነ ማላልስያባ።

ደረ ኡባ ካዋዉ፥

ነ ኦገይ ፅሎነ ቱማ።1

4ጌሽ ነ ፃላላ ግድያ ግሾ፥

ጎዳዉ፥ ነዉ ያዮናይነ

ነ ሱን ቦንቾናይ ኦኔ?

ነ ፅሎ ኦሶይ አሳ ኡባስ ቆንጨ ግድያ ግሾ፥

ካዎተ ኡባይ ነ ስን ይድ ጎይናና”

ያግድ የፆሶና።2

5ሄሳፈ ጉየ፥ ሳሎን ዶየትድ ደእያ ፆሳ ኬ፥ እካ ማርካተ ዱንካንያ በአስ።3 6ላፑን ቦሻታ ኦይክዳ ላፑን ኪታንቾት ፆሳ ኬፈ ከይዶሶና። ኤንቲ ጌሽነ ጶልያ ሊኖ ማኦ ማእዶሶና፤ ባንታ ትራን ዎርቃ ዳንጮ ዳንጭዶሶና። 7ኦይዱ መተታፐ እሶይ፥ መርናዉ ደእያ ፆሳ ሀንቆይ ኩምዳ ላፑን ዎርቃ ፁአታ ላፑን ኪታንቾታስ እሚስ። 8ፆሳ ቦንቹዋፈነ እያ ዎልቃፈ ደንዶይሳን ፆሳ ኬይ ጩያን ኩምስ። ላፑን ኪታንቾት ኦይክዳ ላፑን ቦሻት ፖለታና ጋካናዉ ፆሳ ኬ ኦንካ ገላናዉ ዳንዳእቤና።4