ማዝሙረ 86

ፆሳ ሲቆይ ግታ

ዳዊታ ዎሳ

1ጎዳዉ፥ ታኒ ማንቆነ መቶታንቾ ግድያ ግሾ፥

ታ ዎሳ ስአዳ ታና አላ።

2ታ ነዉ ዱማትዳ አስ ግድያ ግሾ፥ ታና ደኦን ዎ፤

ነናን አማነትያ ታና፥ ነ አይልያ አሻ፤

ኔኒ ታ ፆሳ።

3ጎዳዉ፥ ጋላስ ኩመ ታ ኔኮ ዋስያ ግሾ፥

ታዉ ቃታ።

4ጎዳዉ፥ ታ ሸምፖይ ኔኮ ዋስያ ግሾ፥

ታና፥ ነ አይልያ ኡፋይሳ።

5ጎዳዉ፥ ኔኒ ኬሀነ አቶ ገይሳ፤

ነና ፄግያ ኡባስ ነ ሲቆይ ዳሮ።

6አቤት ጎዳዉ፥ ታ ዎሳ ስአ፤

ታ ዋሱዋ ሀይዛ።

7ነ ታ ዎሳስ ዛሮ እምያ ግሾ፥

ታ መቱዋ ጋላሳን ታ ኔኮ ዋሳና።

8ጎዳዉ፥ ፆሳታ ግዶን ነ መል ባዋ፤

ነ ኦሱዋራ ግነይ ባዋ።

9ጎዳዉ፥ ኔኒ መዳ ካዎተት ይድ፥

ነ ስንን ጉልባታና፤ ነ ሱን ቦንቻና።

10ኔኒ ግታ፤ ነ ማላልስያ ኦሶ ኦያ ግሾ

ፆሲ ነ ፃላላ።

11ጎዳዉ፥ ታ ነ ቱማን ሄመታና መላ፥

ታና ነ ኦግያ ታማርሳ።

ታኒ ነ ሱንስ ያያና መላ፥

ታዉ እስ ዎዛና እማ።

12ጎዳዉ ታ ፆሳዉ፥

ታኒ ነና ታ ኩመ ዎዛናን ጋላታና፤

ነ ሱን መርናዉ ቦንቻና።

13ነ ሲቆይ ታዉ ዳሮ፤

ታና ዱፎፐ አሻዳሳ።

14ፆሳዉ፥ ኦቶራንቾት ታ ቦላ ደንድዶሶና፤

ኢታ አሳታ ጩጋይ ታና ዎናዉ ኮዬስ፤

ኤንቲ ነና ዉዳ ጎኮና።

15ሽን አቤት ጎዳዉ፥

ኔኒ ቃትያነ ማርያ ፆሰ።

ኔኒ ሀንቀታናዉ ጋምኣሳ፤

ሲቆይነ አማነተ ዳርዳይሳ።

16ታኮ ስማዳ ታዉ ቃታ፤

ነ አይልያስ ዎልቃ እማ፤

ነ ጋንደ ናኣ ታና አሻ።

17ጎዳዉ፥ ነ ኬሀተ ማላታ ታና በሳ፤

ነ ታና ማደይሳነ ምንይሳ በእያ ዎደ፥

ታ ሞርከት ዬላታና።