ማዝሙረ 80

ፆሳዉ፥ ኑና ኦራ

አሳፍ ዛማረታ ሀላቃስ ፃፍዳ ማዝሙረ

“ጪሻ ጩ” ጌተትያ ማርካተ ማዝሙረ

1ዮሰፋ ዶርሳ ዉደዳ ካለይሶ፥

እስራኤለ ሄንንቹዋዉ ኑና ስአ።

ክሩበታ ቦላ ደእያ አራታን ኡትዳይሶ፥

ነ ፖኡዋን ቆንጫ።

2ኤፍሬማ፥ ብንያመነ ምናሰ ስንን በንታ፤

ነ ዎልቃ ቃዳ ኑና አሻናዉ ሃያ።

3ፆሳዉ ኑና ዛራ፤

ኑ አታናዳ ነ ሶምኡዋ ኑስ ፖእሳ።

4ኡባፈ ዎልቃማ ጎዳዉ ፆሳዉ፥

ነ አሳ ዎሳ ቦላ አዉደ ጋካናዉ ሸነታይ?

5ኔኒ ኤንታ ዬሆ ካዳ ሙዛዳሳ፤

አፉ ሃዳ ኡሻዳሳ።

6ኑ ሾሮት ኑ ቢታ ኤካናዉ

ባንታ ግዶን ኦያና መላ ኦዳሳ፤

ኑ ሞርከት ኑ ቦላ ሚጭዶሶና።

7ኡባፈ ዎልቃማ ፆሳዉ ኑና ዛራ፤

ኑ አታናዳ ነ ሶምኡዋ ኑስ ፖእሳ።

8ግብፀፈ ዎይነ ኤሀዳሳ፤

ካዎተታ የደዳ፥

ኤንታ ቢታን እያ ቶካዳሳ።

9ኔኒ ቢታ ቄፃዳሳ፤

እ ፃጶ የድድ፥ ዳይድ ቢታ ጋክስ።

10ደረት እያ ኩያን፥

ልባኖሰ ዝጋት እያ ታሽያን ካመትዶሶና።

11ባ ታሸታ መደትራነ አባ ጋካናዉ፥

ባ ፄራታ ኤፍራፂሳ ሻፋ ጋካናዉ የድስ።

12ያትን፥ ኦገራ አያ ኡባይ

እያ አይፍያ ዱናዳ፥

እያ ዩሾን ደእያ ግምብያ አይስ ላላዲ?

13ባዞ ጉዱንይ እያ ቦላ ጉፕስ፤

ዎራ ዶአት እያ ምዶሶና።

14ኡባፈ ዎልቃማ ፆሳዉ ኑኮ ስማ፤

ሳሎራ ዱገ ፄላዳ፤ ሀ ዎይንያ ናጋ።

15እ ነ ኡሻቻ ኩሸይ ቶክዳ ፃጶ፤

ኔኒ ነዉ ድችዳ ፑተ።

16ነ ሞርከት ነ ዎይንያ ቃንፅዶሶና፤

ታማን ፁግዶሶና፤

ኤንታ ነ ሀንቁዋን ይሳ።

17ነ ኩሸይ ነ ኡሻቻን ደእያ አሳ፥

ኔኒ ነዉ ድችዳ አሳ ናጎ።

18ህዛ ኑኒ ጉየ ስሞኮ፤

ኑና ፓፃ ዎ፤ ነ ሱን ጋላታና።

19ኡባፈ ዎልቃማ ጎዳዉ ፆሳዉ፥ ኑና ዛራ፤

ኑ አታናዳ ነ ሶምኡዋ ኑስ ፖእሳ።