ማዝሙረ 65

ፆሳይ ታ አቶተ

ዛማረታ ሀላቃስ የፀትዳ ዳዊታ ማዝሙረ

1አቤት ፆሳዉ፥ ፅዮነን ነዉ ጋላት በሴስ፤

ኑኒ ኑ ቃንገ ነዉ ጋና።

2ኔኒ ዎሳ ስእያ ግሾ፥

አሳ ኡባይ ኔኮ ዮሶና።

3ኑ ናጋራይ ኑና ሙክዳ ዎደ፥

ነ ኑስ አቶተ እማዳሳ።

4ነ ዶርዳይሳትነ ነ ዳባባን ዳና መላ

ኔኮ ሺሽዳ አስ አንጀትዳይሳ።

ኑኒ ነ ሶን፥ ነ ጌሻ ዱንካንያን

ደእያ ሎኦባን ካሎስ።

5አቤት ኑ አቶተዉ፥

ማላልስያ ነ ፅሎ ኦሱዋን ኑስ ዛራ።

ሳኣ ጋፃፐ ጋፃ ጋካናዉ፥

ሃሆን ደእያ ኡባስ ነ ኡፋይስ።

6ኔኒ ነ ዎልቃን ደረታ ምንዳሳ፤

ነ ዎልቃ ዳንጫዳሳ።

7ኔኒ አባ ግርሳነ ቤታ ጉን ስእ ኦሳ፤

ያርክያ አሳ ዋሱዋ እርፅሳሳ።

8ነ ኦዳ ማላታ ግሾ፥

ሳኣ ጋፃ ጋካናዉ ደእያ አሳ ኡባይ ነዉ ያያና፤

ዶሎሀፐ ዉሎሀ ጋካናዉ ደእያ አሳ ኡባ ኡፋይሳዳሳ።

9ነ እራ እማዳ ቢታ ናጋሳ፤ ዳሮ ዱረያሳ፤

አሳስ ካይ ዶላና መላ

ፆሳ ሻፋይ ሃን ኩምዳይሳ፤

ሄሳዳ ኦዳ ነ ጊግሳዳሳ።

10ጎሻስ ሃ እማሳ፤

ቢታ ሹግሳዳ ኦላ ኩንሳ።

ነ እራን ዛራዳ እርፅሳሳ፤

ካይ ዶላና ድጫና መላ አንጃሳ።

11ላይ ካሎ ላይ ኦሳ፤

ነ አያ በሳ ኡባይ ኩምድ ፓላሀና።

12ሄን በሳታ ማታን ኩንሳ፤

ዙማታ ኡፋይስ ማይዛሳ።

13ነ ሄን በሳታ ዶርሳታ ኩንሳ፤

ዛንጋራ ቢታን ካ ኩንሳ፤

ኤንቲ ኡፋይሳን እልልሸ የፆሶና።