ማዝሙረ 63

ታ ሸምፕያ ነና ሳሞታሱ

ይሁዳ መላ ቢታን ደእያ ዎደ ዳዊታ ማዝሙረ

1አቤት ፆሳዉ፥ ነ ታ ፆሳ፤

ታ ዎዛናይ ነና ላሞቴስ፤

ታ አሾይካ ነና አሞቴስ።

ሃ ይድ ጳልቀትዳ ቢታዳ፥

ታ አሳተይ ነና ሳሞቴስ።

2ታ ነና ጌሻ በሳን ፄላስ፤

ነ ዎልቃነ ነ ቦንቹዋ ታኒ በአስ።

3ነ ሲቆይ ደኦፐ ሎእያ ግሾ፥

ታ እንፃርሳይ ነና ቦንቻና።

4ታ ደኦ ላይን ነና ጋላታና፤

ነ ሱንን ታ ኩሽያ ፑደ ምጫና።

5አስ ሎኦ ካ ምድ ካለይሳዳ ታ ነናን ካላና።

ታኒ ታ እንፃርሳን ኡፋይሳ የን ነና ጋላታና።

6ታኒ ታ ሂፃን ነና ሀሳያይስ፤

ቃማ ኩመን ነባ ቆፓይስ፤

7ነ ታና ማድያ ግሾ፥

ታ ነ ቀፍያ ኩያን ኡታዳ ኡፋይሳን የፃና።

8ታ ሸምፕያ ኔራ ኦይከታሱ፤

ነ ኡሻቻ ኩሸይ ታና ኦይክድ ናጌስ።

9ሽን ታና ዎናዉ ኮየይሳት፥

ቢታ ጋርሳን ሞገታና።

10ኤንቲ ማሻስ አድ እመታና፤

ኤንቲ ሱመስ ካሆ ግዳና።

11ሽን ካዎይ ፆሳን ኡፋይታና።

ፆሳ ሱንን ጫቅያ ኡባይ እያ ጋላታና፤

ሽን ዎርዳንቾታ ዶናይ ጎርደታና።