ማዝሙረ 62

ፆሳ ፃላላን ኡፋይስ ዎ

ዳዊቲ ዛማረታ ሀላቃ ኤዶታመስ ፃፍዳ ማዝሙረ

1ፆሳ ፃላላን ታ ሸምፖ ደማስ፤

ታ አቶተይ እያፐ ዬስ።

2እያ ፃላል ታ ዛላነ ታ አቶተ፤

እ ታ ቆሰትያ አትያ በሲ ግድያ ግሾ ዳጋምከ።

3ዎዳና ሀንያ ጎዳነ ቃፅያ ድርስ ዳንያ ኡራ ዎናዉ፥

ህንተ አዉደ ጋካናዉ ደንደቲ?

4ኤንቲ እያ ቦንቾ በሳፈ ደንናዉ ኮዮሶና፤

ኤንቲ ዎርዶን ኡፋይቶሶና።

ባንታ ዶናን አንጆሶና፤

ሽን ባንታ ዎዛናን ባዶሶና። ሳላሀ

5ታ ሸምፐተ!

ፆሳ ፃላላ ስእ ጋዳ ናጋ፤

ታ ኡፋይሳይ እያፐ ዬስ።

6እያ ፃላል ታ ዛላነ ታ አቶተ፤

ታኒ ቆሰትያ በሲ ግድያ ግሾ ዳጋምከ።

7ታ አቶተይነ ታ ቦንቾይ ፆሳና፤

እ ታ ምኖ ዛላነ ታ ሚፃ።

8አሳዉ፥ ኡባ ዎደ ፆሳን አማነትተ፤

እ ህንተዉ ገሸ ግድያ ግሾ፥

ህንተ ቆፋ እያዉ ኦድተ። ሳላሀ

9አስ፥ እስ ቶሆ ሸምፕያ ጫርኮ መላ፤

ጎባ አስ ኡባይ ማዶና ሀዳ።

ምዛነን ዎን ኤንቲ ጫርኮ መላ፤

ኤንቲ እስ ቶሆ ሸምፕያ ጫርኮፈ ካዉዮሶና።

10ቦንቀን አማነቶፍተ፤

ካይሶት ሺሽድ ዱረተን ኦቶርቶፍተ።

ህንተ ዱረተይ ዳርኮካ፥

ህንተ ዎዛና እያ ቦላ ዎፍተ።

11ፆሳይ እስ ቶሆ ኦድስ፤

ታኒ ናምኡ ኦዳ ስአስ፤

ዎልቅ ፆሳሳ።

12መርና ሲቆይ ፆሳባ፤

አቤት ጎዳዉ፥ ነ አሳ ኡባስ

እያ ኦሱዋዳ ኦሱዋዳ እማና።