ማዝሙረ 5

ዎንታ ዎሳ

ዛማረታ ሀላቃስ ፃፈትዳ ዳዊታ ማዝሙረ

ሱሱልኤን የፀትያ ማዝሙረ

1አቤት ጎዳዉ፥ ታ ቃላ ስአ፤

ታ ኦልያ ቆፓ።

2ታ ካዋዉ፥ ታ ፆሳዉ ታ ዋሱዋ ስአ፤

ታ ማደ ኮያዳ ዎስያ ዎሳ ሀይዛ።

3አቤት ጎዳዉ፥ ዎንታ ዎንታ

ታ ቃላ ስኣሳ።

ዎንታ ዎንታ ታ ዎሳ ነ ስን ሺሻይስ፤

ታ ነ ዛሩዋ ናጋይስ።

4ኔኒ ኢታተን ኡፋይቶና ፆሰ፤

ኢታባይ ኔራ ዴና።

5ኦቶራንቾት ነ ስንን ኤቆኮና፤

ኢታባ ኦያ ኡባ ነ እፃሳ።

6ዎርዶ ኦደተይሳታ ነ ይሳሳ፤

ጎዳይ ሱ ጉሰይሳታነ

ጭመይሳታ እፄስ።

7ሽን ታ ነ ግታ ማሮተን ነ ኬ ገላና፤

ነ ጌሻ በሳኮ ስማዳ ነና ቦንቾን ጎይናና።

8አቤት ጎዳዉ፥ ታ ሞርከታ ግሾ ጋዳ፥

ታና ነ ፅሎተን ካለ፤

ነ ኦግያ ታ ስንን ሱርሳ።

9ኤንታ መተርሻን ቱም ባዋ፤

ኤንታ ዎዛናን ይሶይ ኩምስ።

ኤንታ ዶናይ ዶየትዳ ዱፎ መላ፤

ኤንቲ ባንታ እንፃርሳን ጭሞሶና።

10ኤንቲ ነ ቦላ ማካልዳ ግሾ፥

አቤት ፆሳዉ፥ ኤንታ ፕርዳ፤

ኤንታ ቶባይ ኤንታ ኤክድ ቦ፤

ኤንታ ዳሮ ናጋራ ግሾ ኤንታ የደ።

11ሽን ኔኮ ባቃትድ አትዳ ኡባይ ኡፋይቶ፤

ኤንቲ መርናዉ ኡፋይሳን የፆ።

ነ ሱን ዶስያ ኡባይ ነናን ኡፋይታና መላ፤

ኔኒ ኤንታ መርናዉ ናጋ።

12አቤት ጎዳዉ፥ ኔኒ ፅሎታ አንጃሳ፤

ጎንዳለን አሸይሳዳ ነ ኬሀተን እያ አሻ።