ማዝሙረ 36

አልኦ ግድዳ ፆሳ ሲቆ

ጎዳ አይለይ፥ ዳዊቲ ዛማረታ ሀላቃስ ፃፍዳ ማዝሙረ

1ኢታ አስ ባ ዎዛናን ኢታባ ቆፔስ፤

እ ባ ዎዛናን ፆሳስ ያየና።

2እ ባና ዳሮ ናሽያ ግሾ፤

ባ ናጋራ በአናዉ ዎይኮ እፃናዉ ዳንዳኤና።

3እያ ዶናን ገነይነ ዎርዶይ ኩምስ፤

ጭንጫተነ ሎኦባ ኦሶ አግስ።

4ባ ሂፃን ዝንእድ ገነ ቆፔስ፤

ባና ሎኦ ግዶና ኦገን ካለስ፤

ኢታባ እፀና።

5ጎዳዉ፥ ነ ሲቆይ ሳሎታ ጋኬስ፤

ነ ቱማተይ ሻራፐ አስ።

6ነ ፅሎተይ ቃ ደረታፐ አስ፤

ነ ፕርዳይ አባ ጪሙዋፈ ዝቃ፤

ጎዳዉ፥ ኔኒ አሰነ ዶአ ናጋሳ።

7ፆሳዉ፥ ነ ሲቆይ አይ መላ አልኦ!

አሳይ ነ ቀፍያ ጋርሳን ቆሰትድ አቴስ።

8ኤንቲ ነ ግብራፐ ምድ ካሎሶና፤

ነ ኬሀተ ሻፋፐ ኡይድ አሎሶና።

9ደኦ ፑልቶይ ኔፐ ከዬስ፤

ነ ፖኡዋን ኑኒ ፖኦ በኦስ።

10ነና ኤረይሳታስ ነ ሲቆይ፥

ዎዛና ሱረታስ ነ ፅሎተይ ቃንፀተና።

11ኦቶራንቾታ ቶሆይ ታና የፎ፤

ናጋራንቾታ ኩሸይ ታና የደፎ።

12ኢታ አሳታ ኩንደ በእተ፤

ኤንቲ ኩንድዶሶና፤ ደንዳናዉ ዳንዳኦኮና።