ማዝሙረ 31

ታ ሸምፕዉ ነ ኩሸን ዎስ

ዛማረታ ሀላቃስ ፃፈትዳ ዳዊታ ማዝሙረ

1አቤት ጎዳዉ፥ ታ ኔኮ ባቃታይስ፤

አዉደካ ታና ዬላዮፓ፤

ነ ፅሎተን ታና አሻ።

2ነ ሀይ ታኮ ዛራ፤

ኤለሳዳ ታና አሻ።

ኔኒ ታዉ ጌምያ ዛላ፤

ታና አሽያ ምኖ ሚፃ ግዳ።

3ኤ፥ ነ ታዉ ዛላነ ሚፃ፤

ነ ሱን ግሾ ታና ካለ፤

ኦግያ በሳ።

4ነ ታዉ ጌምያ በሰ ግድያ ግሾ፥

ኤንቲ ቆትድ ዎዳ ፅሄፐ ታና ናጋ።

5አቤት ጎዳዉ፥ ቱማ ፆሳዉ፥

ታ ሸምፑዋ ነ ኩሸን ዎይስ፤

ነ ታና ዎዛ።

6ፓና ኤቃታ ጎይነይሳታ ታ እፃይስ፤

ግዶሽን ታኒ ጎዳን አማነታይስ።

7ታ መቱዋነ ታ ኡንአ ነ በእዳ ግሾ

ታኒ መርናዉ ነ ሲቁዋን ኡፋይታና።

8ነ ታና ሞርከ ኩሸን አዳ እማባካ፤

ታ ቶሆታ ዳልጋ በሳን ኤሳዳሳ።

9አቤት ጎዳዉ፥ ታኒ መቶን ገልዳ ግሾ ታዉ ቃታ፤

ታ ዳሮ አዛንዳ ግሾ ታ አይፈይ ሙልጫትስ፤

ታ አሾይነ ታ ሸምፖይ ዳቡርስ።

10ታ ደኦይ አዛኖን፥ ታ ላይይ ኦለን ዉርስ፤

ዋየ ዳሮተን ታ ዎልቃይ ዉርስ፤

ታ መቀት አርጋጭዶሶና።

11ታ ሞርከታ ኡባስ ቅስ አታስ፤

ታ ሾሮታስ ዬላ ግዳስ።

ታ ላገታስ ዳጋንያባ ግዳስ፤

ታና በኤይሳት ታፐ ሃክዶሶና።

12ታ ሀይቅዳ አሳዳ ዶገታስ፤

መቃ ሚሸዳ ዎራ የገታስ።

13ታኒ ዳሮታ ካልካሻ ስአስ፤

ኡባ በሳራ ዳጋም ደኤስ።

ኤንቲ ታ ቦላ ቶቦሶና፤

ታና ዎናዉ ማቀቶሶና።

14ሽን ጎዳዉ፥ ታ ነናን አማነታና፤

ኔኒ ታ ፆሳ።

15ታ ደኦ ላይይ ነ ኩሽያና፤

ታና የደያ ታ ሞርከታ ኩሸፐ አሻ።

16ነ አይልያ ቦላ ነ ሶምኡዋ ፖእሳ፤

ነ ማሮተን ታና አሻ።

17አቤት ጎዳዉ፥ ታ ነና ፄግያ ግሾ፥

ታና ዬላዮፓ።

ሽን ኢታት ዬላቶ፤

ዱፎን ገልድ ስእ ጎ።

18ኦቶሮንነ ቦረን ፅሎታ ቦላ

ምንድ ሃሳያ ግሾ፥

ኤንታ ዎርዶ እንፃርሳ ስእ ኦ።

19ነና ያየይሳታስ ነ ምንጅዳ፥

ኔኮ ባቃተይሳታስ ነ ጊግስዳ፥

ኬሀተይ አይ መላ ዳሮ!

20ኔኒ ኤንታ ነ ስንን፥ ጌማ በሳን ገን ዎዳሳ፤

አሳ ኢታ ማቁዋፈ አሻሳ፤

ኢታ እንፃርሳፈ ነ ዱንካንያን ቆሳዳሳ።

21ሞርከይ ተቅዳ ካታማ ግዶን፥

ማላልስያ ባ ማሮተ ታና በስዳ፥

ጎዳይ ጋላተቶ።

22ታ ዳጋማዳ፥ “ነ ስንፈ ሃካስ” ጋስ፤

ሽን ታ ማዶ ኮያዳ ኔኮ ዋስዳ ዎደ፥

ታ ዋሱዋ ነ ስአዳሳ።

23ህንተኖ፥ ፆሳ አሳዉ፥ ጎዳ ዶስተ፤

ጎዳይ አማነተይሳታ ናጌስ፤

ሽን ኦቶራንቾታስ ኤንታ ጋትያ ቃንፄስ።

24ህንተኖ፥ ጎዳን ኡፋይስ ኦይሳቶ፥

ምንተ፤ ገንጭተ።