ማዝሙረ 30

ቆሆፐ አትዳ አሳ ጋላታ

ኬ አንጅሶስ ዳዊቲ የፅዳ ማዝሙረ

1አቤት ጎዳዉ፥ ነ ታና ኦላፈ ከስዳ ግሾነ

ታ ሞርከት ኡፋይቶና መላ ኦዳ ግሾ፥

ታ ነና ቁ ቁ ኦና።

2አቤት ጎዳዉ፥ ታ ፆሳዉ ታና ማዳና መላ፥

ታ ነና ፄግን ነ ታና ፓዳሳ።

3አቤት ጎዳዉ፥ ዱፎ ገሎናዳ ታና ናጋዳሳ፤

ኦላን ዎናዳ ታና ፓፃ አሻዳሳ።

4ህንተኖ ፆሳ አሳዉ፥

ጎዳስ የፅተ፤

እያ ጌሻ ሱን ሳቢተ።

5እያ ሀንቆይ ጉ ዎደሳ፥

ሽን እያ ኬሀተይ ደኦ ላይ ኡባሳ።

ቃማ ዬክሸ አቅኮ፥

ዎንታ ዛው ባይና ኡፋይስ ግዴስ።

6ታ ናገታዳ ደኤይሳ ኤርዳ ዎደ

“ህዛ ታ ቃፅከ” ያጋስ።

7አቤት ጎዳዉ፥ ነ ታዉ ኬህዳ ዎደ፥

ዙማዳ ታና ምንዳ ኤሳዳሳ።

ሽን ነ ሶምኡዋ ሀራ ሶ ዛርዳ ዎደ፥

ታ ዳጋማስ።

8አቤት ጎዳዉ፥ ታ ነና ፄጋስ፤

ነና ማሮታ ዎሳስ፤

9“ታ ዱፎ ገልኮ ነና አይ ጎኢ?

ቢታ ግዶ ገልዳ አስ

ዋትድ ነና ጋላታናዉ ዳንዳኢ?

ነ አማነተ ዋትድ ማርካታኔ?

10አቤት ጎዳዉ፥ ነ ታና ስአ፤

ታዉ ቃታ።

አቤት ጎዳዉ፥ ነ ታዉ ማዶ ግዳ” ያጋስ።

11ታ ዬሁዋ የን ላማዳሳ፤

ካዮ ማኡዋ ታፐ ቃራዳ፥

ታና ኡፋይስ ማይዛዳሳ።

12ሄሳ ግሾ፥ ታ ነና ሳባና፤ ስእ ጊከ።

አቤት ጎዳዉ፥ ታ ፆሳዉ፥ ታ ነና መርናዉ ጋላታና።