ማዝሙረ 22

ፅሎ አሳ መቶነ ኡፋይስ

ዛማረታ ሀላቃስ ፃፈትዳ ዳዊታ ማዝሙረ

“ጉራ ገንኤ” ጌተትያ ዲ ጩን የፀትዳ ማዝሙረ

1ታ ፆሳዉ፥ ታ ፆሳዉ፥ ታና አይስ አጋዲ?

ታና ማዳ ጋዳ ታ ነና ዎስያ ዎደ፥

አይስ ታፐ ሃካይ?

2ታ ፆሳዉ፥ ጋላስ ኩመ ታ ኔኮ ዋሳስ፤

ሽን ነ ታና አላካ።

ቃማ ኡባን ኔኮ ዋሳይስ፥

ሽን ዎፓተ ደምከ።

3ግዶሽን ኔኒ ጌሽ፤

እስራኤለ ጋላታይ ነ አራታ ዩሾን ደኤስ።

4ኑ አዋት ነናን አማነትዶሶና፤

ነናን አማነትን፥ ነ ኤንታ አሻዳሳ።

5ኔኮ ዋስድ አትዶሶና፤

ነናን አማነትድ ዬላትቦኮና።

6ሽን ታ አሰ ግድከ፤ ጉፁነ፤

ታ አሳን ካትዳይሳነ ቦረትዳይሳ።

7ታና በእያ ኡባይ ቀልቅሶሶና፤

ባንታ ሁጵያ ቃሸ ደሬቆሶና።

8“እ ጎዳን አማነትስ፤ አነ እያ አሾ፤

ጎዳይ እያ ዶስኮ፥ አነ እያ አሾ” ያጎሶና።

9ግዶሽን ታኒ ታ አየ ኡሎፐ

ሱረ የለታናዳ ኦዳይ ነና።

ታ አየ ን ምያ ዎደካ

ታና ናግዳይ ነና።

10ታ የለቶሶፐ ዶማዳ ነናን ድጫስ፤

ታ አየ ኡሎፐ ዶምን ነ ታ ፆሳ።

11መቶይ ታኮ ማትያ ግሾነ

ታና ማድያ አስ ባይና ግሾ፥

ሀእ ኔኒ ታፐ ሃኮፋ።

12ዳሮ ሞርከት ቃይጭያ ቦራዳ ታና ተቅዶሶና፤

ቃይጭያ ባሳነ ኮርማታዳ ታና ኦይክዶሶና።

13መንረድ ጉድያ ጋሞዳ

ባንታ ዶና ታ ቦላ ዶዮሶና።

14ታኒ ሃዳ ጎጋስ፤

ታ መቀይ ባ ከሱዋፐ ከይስ፤

ታ ዎዛናይ ኦይሳዳ ታ ጋን ትልእስ።

15ታ ቆይ ኩንአዳ መልስ፤

ታ እንፃርሳይ ኮቶኑዋራ ኦይከትስ፤

ነ ታና ሀይቅዳ አሳዳ ባናን የጋዳሳ።

16ካናት ታና ተቅዶሶና፤

ኢታ አሳት ታ ዩሹዋ ኦይክዶሶና፤

ታ ኩሸታነ ታ ቶሆታ ጫዶሶና።

17ታ መቀት ታይበቶሶና፤

ታ ሞርከት ታና ደሬቆሶና።

18ታ ማኡዋ ሻክድ ኤኮሶና፤

ታ አዱሳ ማኡዋ ቦላ ሳማ የጎሶና።

19ታ ጎዳዉ፥ ነ ታ ማታይ ታፐ ሃኮፋ፤

ታ ዎልቃዉ፥ ታና ማዳናዉ ኤለሳዳ ሃያ።

20ታና ማሻፈ ከሳ ኤካ፤

ታ አልኦ ደኡዋ ካናታፐ አሻ።

21ጋሞታ ዶናፐ ታና አሻ፤

ቃይጭያ ባዞ ቦራታ ካጨፐ ታና ናጋ።

22ታኒ ነ ሱን ታ እሻታስ ኦዳና፤

ኤንታ ሺቁዋን ነና ጋላታና።

23ህንተኖ፥ ጎዳ ያየሳቶ፥ እያ ጋላትተ፤

ህንተኖ፥ ያይቆባ ዛረቶ፥ እያ ቦንችተ።

ህንተኖ፥ እስራኤለ ኮቻቶ፥

ያሻን እያ ቁ ቁ ኦተ።

24እ ኡንኤትዳይሳ ካና፤

ኤንታ ቆሁዋ በእሸ ቀል ጌና።

ባ ሶምኡዋ ኤንታፈ ገንና፤

ኤንቲ እያኮ ዋስያ ዎደ፥

ኤንታዉ ዞኮ ዛርቤና።

25ታ ነ ሎኦ ኦሱዋ ግሾ ግታ ሺቆን ጋላታና፤

ታ ቃንገ ነዉ ያይያ አሳ ስንን ጋና።

26ማንቆት ምድ ካላና፤

ጎዳ ኮየይሳት እያ ጋላታና፤

ኤንቲ መርናዉ ኡፋይሳን ዳና።

27ሳአ ጋፃ ጋካናዉ ደእያ አሳ ኡባይ፥

አኬካን ጎዳኮ ስማና፤

አሳ ዛረ ኡባይ እያ ጎይናና።

28ማት ኡባይ ጎዳሳ፤

እ ካዎተታ ሃሬስ።

29ሳአን ደእያ ዱረ ኡባይ እያ ጎይናና፤

ባንታና ሀይቆፐ አሻናዉ ዳንዳኦናይሳትነ

ቢታን ስምያ ኡባይ እያዉ ጉልባታና።

30ያና የለታይ እያዉ ኪተታና፤

ስን የለታስ ጎዳባ ኦዳና።

31ቡሮ የለትቦና አሳስካ፥

እያ ጌሻተ ኦዳና።