ማዝሙረ 2

ጎዳን ትየትዳይሳ አይሱዋ

1ካዎተት አይስ ደንዶና?

አሳይ አይስ ጮ ማቀቶና?

2ካዎት ጎዳ ቦላነ እ ትይዳይሳ ቦላ ደንድዶሶና፤

ደርያ ሃረይሳት ኤንታ ቦላ ሺቅዶሶና።

3“ኤንታ ሳንላታ ዱስ፤

ኤንታ ቃሾ ዎዶሩዋ ሆሎስ” ያግዶሶና።

4ሳሎን ኡትዳይስ ኤንታ ቦላ ሚጬስ፤

ጎዳይ ኤንታ ቀልቅሴስ።

5እ ባ ሀንቁዋን ኤንታ ዳጋንስ፤

ባ ይሉዋን ኤንታ ያሽሴስ።

6“ታ ጌሻ ዙማ ፅዮነ ቦላ

ታ ካዋ ካዎስ” ያጌስ ጎዳይ።

7ታኒ ጎዳ ህግያ አዋጃና፤

ጎዳይ ታና፥ “ኔኒ ታ ናኣ፤

ታኒ ሀች ነዉ አዋ ግዳስ።

8ነ ታና ኦይቻ፤

ታ ነዉ ካዎተታ እማና፤

ሳአ ኡባይ ነባ ግዳና።

9ኔኒ ብራታ ፃምአን ኤንታ መንና፤

መቃ ሚሸዳ ኤንታ ትንቸረና” ያግስ።

10ህዛ፥ ካዎቶ ኤዮፕተ፤

ሀ ሳኣ ሃረይሳቶ አኬክተ።

11ጎዳ ያሻን ጎይንተ፤

ኮኮርድ ኪተትተ።

12ጎዳይ ሀንቀትን ኦገን ህንተ ዮናዳ

እያ ቱማተን ጎይንተ።

እያ ሀንቆይ ኤሶን ኤፅ ከያና፤

እያን ቆሰትድ አትዳ ኡባይ አንጀትዳይሳታ።