ማዝሙረ 19

ፆሳ ህገን ቦረይ ባዋ

ዛማረታ ሀላቃስ ፃፈትዳ ዳዊታ ማዝሙረ

1ሳሎት ፆሳ ቦንቹዋ ሃሳዮሶና፤

ሳሎ ጉፋንይ እያ ኩሸ ኦሱዋ አዋጄስ።

2እስ ጋላስ ሀራ ጋላሳስ ሄሳ ኦዴስ፤

እስ ቃም ሀራ ቃማስ ኤራተ ቆንጭሴስ።

3ኦድ ዎይኮ ቃል ባዋ፤

ኤንታ ግርሳይ ስኤተና።

4ግዶሽን ኤንታ ኦዳይ ሳአ ኡባን ላለትስ፤

ኤንታ ቃላይ ቢታ ጋፃ ጋክስ።

አው ደእያ በሲ ፆሳይ ሳሎን ጊግስስ።

5ባ ሶፐ ከይያ ምሽራዳ፥

ጋደ ዎፃናዉ ኡፋይትድ ጊግዳ አሳዳ፥

አዋይ ዎንታ ዎንታ ከዬስ።

6እስ ባጋ ሳሎ ጋፃፐ ከይድ፥

ሀራ ባጋ ሳሎ ጋፃ ጋካናዉ ቤስ፤

እያ ሱላፐ ጌምያባይ ባዋ።

7ጎዳ ህገይ ሱረ፤

ሸምፖ ዛሬስ።

ጎዳ ኪታይ አማነትዳይሳ፤

አኬክ ፓጭዳይሳታ ጭንጫ ኦስ።

8ጎዳ ዎጋይ ልከ፤

ዎዛና ኡፋይሴስ።

ጎዳ ኪታይ ጌሽ፤

አይፈ ፖእሴስ።

9ጎዳስ ያሽ ጌሽ፤

መርናዉ ኤቅድ ደኤስ።

ጎዳ ፕርዳይ ኩመ ቱማነ ፅሎ።

10ዎርቃፈ አድ ኮየቴስ፤

ዋላህ ባይና ዎርቃፈ አድ ሎኦ።

ኤሳፈ አድ ሎኦ

እልሎ ኤሳፈ አድ ማልኦ።

11ነ አይለይ ናገታና መላ ዞሬስ፤

ነ ህግያ ናጎይ ዳሮ ጎኤስ።

12ባ ቆሁዋ ደመይ ኦኔ?

አቤት ጎዳዉ፥ ጌምዳ ናጋራፐ ታና ጌሻ።

13ታና ነ አይልያ፥

ኤርሸ ኦያ ናጋራፐ ናጋ።

ናጋር ታና ሃሮና መላ ማዳ፤

ሄ ዎደ ታኒ ሱረ ግዳና፥

ግታ ባላፐ ጌያና።

14አቤት ጎዳዉ፥ ታ ዛላዉ፥ ታና ዎዘይሶ፤

ታ ዶናፐ ከይያ ቃላይነ

ታ ዎዛና ቆፋይ ነና ኡፋይስያባ ግዶ።