ማዝሙረ 111

ፆሳ ጋላትተ

1ጎዳ ጋላትተ፤

ሱረታ ሺቆን

ታ ኩመ ዎዛናን ጎዳ ጋላታና።

2ጎዳ ኦሶት አይ መላ ግተ!

ኤንታን ኡፋይትያ ኡባይ ኤንታ ቆፔስ።

3እያ ኦሶት ቦንቾንነ ቴማን ኩምስ፤

እያ ፅሎተይ መርናዉ ደኤስ።

4እያ ማላልስያ ኦሶይ ሀሳየትሸ ዳናዳ ኦስ፤

እ ኬሀነ ቃትያ ጎዳ።

5ባዉ ያየይሳታስ ካ እሜስ፤

ባ ጫቆ ቃላ መርናዉ ባለተና።

6አላጋታ ቢታ ባ አሳስ አድ እምድ፥

ባ ግታ ዎልቃ ባ አሳ በስስ።

7እያ ኩሸ ኦሶት ቱማነ ሱረ፤

እያ ዎጋ ኡባይ አማነትዳይሳ።

8ኤንቲ መርናዉ ኤቅድ ደኦሶና፤

ቱማተንነ ሱረተን እመትዶሶና።

9እ ባ አሳ ዎዝስ፤

ጫቁዋ ኤንታራ መርናዉ ኤስስ፤

እያ ሱንይ ጌሽነ ያሸይሳ።

10ጭንጫተስ ኮይሮይ ጎዳስ ያሽ፤

እያ ዎጋ ናገይሳታስ ሎኦ አኬክ ደኤስ።

ጎዳይ መርናዉ ጋላተቶ!