ማዝሙረ 108

ፆሳይ ኑ ባጋ

ዳዊታ ማዝሙረ

1ታ ዎዛናይ ምንድ ደኤስ፤

አቤት ፆሳዉ፥ ታ ዎዛናይ ምንድ ደኤስ።

ታ ነዉ የፃና፤ ነና ሳባና።

2ታ ሸምፐ፥ ባርካ፤

ዲነ ማስንቆይ ደንዳ፤

ታ ዎንታ ጉራ ደንዳና።

3አቤት ጎዳዉ፥ ታ ነና አሳ ግዶን ጋላታና፤

ካዎተ ግዶን ነና ሳባና።

4ነ መርና ሲቆይ ሳሎፐ ቃ፤

ነ አማነተይ ሻራፐ ቃ።

5አቤት ፆሳዉ፥ ሳሎፐ ቦላራ ነ ቁ ቁ ጋ፤

ነ ቦንቾይ ሳአ ኡባ ቦላ ግዶ።

6ነ ዶሰይሳት አታና መላ፥

ነ ኡሻቻ ኩሸን ኑና አሻ፤

ኔኒ ታ ዎሳ ስአ።

7ፆሳይ ባ ጌሻ በሳን ሀይሳዳ ያግስ፤

“ታ ፆናዳ ሴከማ ሻካና፤

ሱኮታ ዛንጋራ ግሻና።

8ጋላድነ ምናሰይ ታባ፤

ኤፍሬም ታ ሁጰን ዎያ ኡከ፤

ይሁድ ታ ካዎታ ፃምኣ።

9ሞአበይ ታ ሜጨትያ ጋባተ፤

ኤዶመይ ታባ ግደይሳ ኤርሳናዉ

ታ ጫማ እያ ቦላ ዎና።

ፍልስፄመ ፆናዳ ገሬራና” ያግስ።

10ጎዳዉ፥ ግምበትዳ ካታማኮ፥ ታና ኤፋናይ ኦኔ?

ኤዶመ ጋካናዉ ታና ካለናይ ኦኔ?

11አቤት ፆሳዉ፥ ኑና አግዳይ ነና ግድኪ?

አቤት ፆሳዉ፥ ነ ኑ ቶራንቾታራ ኦላስ ከያካ።

12አሳ ማዶይ ፓና ግሾ፥

ሞርክያ ኦላናዉ ነ ኑና ማዳ።

13ፆሳ ዎልቃን ኑ ሞርከታ ፆናና፤

ኑ ሞርከታ ካዉሻናይ እያ።