ሌምሶ 31

ካዋ ልሙኤላ ሌምሶታ

1ሀይሳፈ ካልድ ፃፈትዳ ሌምሶይ፥ ካዋ ልሙኤላ አይያ ካዋ ልሙኤላ ታማርስዳይሳ።

2ታ ናአዉ፥ ታ ኡሎፐ ዎዳይሶ፥

ታኒ ቃንገታዳ የልዳይሶ፥

3ማጫሳን ነ ዎልቃ ዉርሶፋ፤

ካዎታ ይስያ ማጫሳታን ነ ምኖተ ይሶፋ።

4“ልሙኤላ፥ ዎይነ ኡሽ ካዎታስ በሰና፤

ማይያ ኡሽ ሹማታስ በሰና።

5ኤንቲ ኡያ ዎደ ህገ ባሎሶና፤

ናቀትዳ አሳ ማታ ቀል ጎሶና።

6ማያ ኡሹ ሀይቃና ሀንያ ኡራስነ

ሳእ ኢትዳ ኡራስ እምተ።

7ኤንቲ ባንታ ማንቆተነ

ባንታ ዋይያ ዶጋናዉ ኡዮ።

8ባንታ ግሾ ኦደታናዉ ዳንዳኦና አሳ ግሾ ነ ኦዴታ፤

ማድያ አስ ባይናይሳታ ግሾ ነ ኤቃ።

9ኤንታ ምየን ኤቃዳ ኤንታዉ ሱረ ፕርዳ፤

ማንቆታነ መቶታንቾታ ማታ ናጋ” ያጋዳ ታማርሳሱ።

ዎዛናማ ማቾ

10“ዎዛናማ ማቾ ኦን ደማናዉ ዳንዳኢ?

እ ጋተይ ዞኦ አልኦ ሹቻፈ አስ።

11እ አዝናይ እዮ አማነቴስ፤

እያዉ ኮሽያባፐ አይብካ ፓጨና።

12እያ ባ ደኦ ላይ ኡባን፥

እያዉ ሎኦባፐ አትሽን፥ ኢታባ ኦኩ።

13ሱፈነ ሊኖ ኮያዳ፥

ኡፋይታሸ ባ ኩሸን ኦዉሱ።

14እያ ዛልአንቾታ ማርካበ መላ፤

ባ ካ ሃሆ ቢታፈ ሺሻዉሱ።

15እያ ባ ሶ አሳስ ካ ጊግሳናዉነ

ባ ማጫ አይለታስ ኦሶ እማናዉ፥

ሳእ ዎንቶና ደእሽን ደንዳዉሱ።

16ሎኦ ጋደ ኮያዳ ሻማዉሱ፤

ባ ኩሸን ኦዳ ደምዳ

ሚሸን ዎይነ ቶካዉሱ።

17እያ ባ ፄሳ ምንዳ ዳንጫዉሱ፤

ባ ቀስያ ኦሶስ ምንዉሱ።

18እያ ዎ ደማናዉ ምናዳ ዛልአዉሱ፤

እያ ኦሸ ቃምስያ ግሾ እ ፆምፐይ ቶኤና።

19እያ ባ ህንርትያ ኦይካዉሱ፤

ባ ብራን ሎይዳ ሱቃዉሱ።

20እያ ማንቆታስነ መቶታንቾታስ እማዉሱ።

21እ ሶ አሳ ኡባይ ሆእያ ማኦ ማእያ ግሾ፥

ሻች ቡክኮካ እያ ህርጉኩ።

22አልጋ ቦላ ሂፅያ ማኦ ስካዉሱ፤

ሊኖፐ ኦሰትዳ ኦቻ ቴራ ዳንያ ማኦ ማአዉሱ።

23ቢታ ጭማት ሺቅያ ዱቡሻን

እ አዝናይ ቦንቸትዳ አስ።

24ሊኖፐ ማኦነ ዳንጮ ኦዳ፥

ዛልአንቾታስ ባይዛዉሱ።

25እያ ምኖነ ቦንቾ አስ፤

ያና ላይ ኡባን ኡፋይታዳ ደአዉሱ።

26ጭንጫተን ባ ዶና ዶያዉሱ፤

አማንያ ዞረይ እ እንፃርሳን ደኤስ።

27እያ ባ ሶ አሳ ደኡዋ እንጀያናዉ ኡባ ዎደ ኦዉሱ፤

አዛላተ እ ቦላ በንትድ ኤረና።

28እ ናይት ደንድድ፥ እዮ ናሾሶና፤

እ አዝናይ እዮ ያግድ ጋላቴስ፤

29ሎኦባ ኦያ ዳሮ ማጫሳት ደኦሶና፤

ሽን ነ ኤንታ ኡባፈ አሳ” ያጌስ።

30ማል ጭሜስ፤

የገልሳተ ያና።

ሽን ጎዳ ያይያ ማጫስያ፥

እያ አንጀትዳሮ።

31እያ ኦዳባ ኡባስ እዮ ዎይትተ፤

እ ኦሶ ኡባይ ዳባባን እዮ ጋላትሶ።