ጌሻ ማፃፋ
ታይቦ 10
ብራ ብራታፐ ኦሰትዳ ሞይዘታ
ጎዳይ ሙሰኮ፥ አሳ ሺቆስ ፄጋናዉነ ዱንካንዳ ጉታፐ ደንናዉ ማድያ ናምኡ ሞይዘታ ብራፐ ቆፃዳ መ። ሀ ናምኡ ሞይዘት ፑነትያ ዎደ አሳ ኡባይ ጌሻ ዱንካንያ ፐንገን ኔኮ ሺቆ። ሽን እስ ሞይዘ ፃላል ፑነትኮ፥ እስራኤለ ኮቻ ሀላቃት ነ ስን ሺቆ። ሞይዘይ ኮይሮ ፑነትያ ዎደ ጌሻ ዱንካንያፐ ዶሎሀ ባጋን ዱንካንዳ ኮቻይ ደንዶ። ሞይዘይ ናምአን ፑነትያ ዎደ ዱገሀ ባጋን ዱንካንዳ ኮቻይ ደንዶ። ሞይዘይ ሄሳ ፑነትያ ዎደ ጉታፐ ደንዳናዉ ማላ ግዶ። አሳ ሺሻናዉ ሞይዘ ፑና፥ ሽን ሀንኮይሳዳ ዱማ ማላራ ፑኖፋ። ካህነት፥ አሮና ናይት ሞይዘ ፑኖ። ሀይስ ነዉነ ያና የለተ ኡባስ መርና ዎጋ ግዶ።
“ህንተ ጋድያ ቦላ ኦላ ደንዳ ህንተ ሞርክያራ ህንተ ኦለታናዉ ከይያ ዎደ ሄ ሞይዘታ ጎችድ ፑንተ። ሄ ዎደ ጎዳይ፥ ህንተ ፆሳይ ህንተና አኬክድ፥ ህንተ ሞርከታፐ አሻና። ህንተ ኡፋይሳ ጋላሳታን ሄስካ አጌና ፄሮን፥ ኤረትዳ ባለታን፥ ፁሳ ያርሾ ዎደንነ እስፈተ ያርሾ ዎደ ሞይዘ ፑንተ። ሄስ ፆሳ ስንን ህንተና አኬክስያባ ግዳና። ታኒ ጎዳ፥ ህንተ ፆሳ” ያግስ።
እስራኤለት ሲና የድድ ደንዱዋ
አሳይ ግብፀፈ ከይን፥ ናምአን ላይን፥ ናምአን አጌናን፥ ላታማን ጋላሳን፥ ሻራይ ጌሻ ዱንካንያ ቦላፈ ደንድስ። ያትን አሳይ ሲና መላ ቢታፈ ማራን ማራን ደንድዶሶና፤ ሻራይ ፓራና መላ ቢታ ጋክድ ዎስ። ጎዳይ ሙሰ ኪትዳይሳዳ ኤንቲ ባናዉ ኮይሮ ደንድዶሶና።
ኮይሮ ይሁዳ ኮቻ ባጋን ዱንካንዳ ኮቻይ ባንታ ማላ ኤክድ ከይዶሶና። ኤንታና ካለይ አምናዳበ ናኣ ናአሶና። ይሳኮራ ኮቻ ካለይ ዙአራ ናኣ ናትናኤላ። ዛብሎና ኮቻ ካለይ ሄሎና ናኣ ኤልኣባ።
ያትን፥ ጌሻ ዱንካነይ ሾደትን፥ ገድሶና ኮቻትነ መራራ ኮቻት ቶክድ ደንድዶሶና።
ካልድ ሮቤላ ኮቻ ባጋን ዱንካንዳ ኮቻይ ባንታ ማላ ኦይክደ ከይዶሶና። ሮቤላ ኮቻ ካለይ ሻደኡራ ናኣ ኤልዙራ። ስሞና ኮቻ ካለይ ዙርሻዳያ ናኣ ሳሉምኤላ። ጋደ ኮቻ ካለይ ራጉኤላ ናኣ ኤልያሳፋ።
ያትን ቃሃታ ኮቻይ ጌሻ ሚሸታ ቶክድ ደንድዶሶና። ኤንቲ ካልያ ጉታ ጋካናፐ ስን ጌሻ ዱንካነይ ቶከትድ ኡቴስ።
ካልድ ኤፍሬማ ኮቻ ባጋን ዱንካንዳ ኮቻት ባንታ ማላ ኦይክድ ከዮሶና። ኤፍሬማ ኮቻ ካለይ አምሁዳ ናኣ ኤልሻማአ። ምናሰ ኮቻ ካለይ ፓዳዙራ ናኣ ጋማልኤላ። ብንያመ ኮቻ ካለይ ጋድዮና ናኣ አብዳና።
ዉርሰን ዳነ ኮቻ ባጋን ዱንካንዳ ኮቻይ፥ ኡባስ ጉየ ባጋራ ካተ ግድድ፥ ባንታ ማላ ኦይክድ ከይዶሶና። ዳነ ኮቻ ካለይ አምሳዳያ ናኣ አክኤዘራ። አሴራ ኮቻ ካለይ ኦክራና ናኣ ፓግኤላ። ንፍታለመ ኮቻ ካለይ ኤናና ናኣ አክራ። እስራኤለ አሳይ ባንታ ዘረን ዘረን ጉታፐ ደንድድ ብያ ማራይ ሄሳ።
ሙሰይ ምድያመ አድያ ራጉኤላ ናኣ ሆባባኮ፥ “ጎዳይ ኑስ እማና ግዳ ቢታ ላታናዉ ቦስ፤ ጎዳይ እስራኤለ አንጃና ግዳ ግሾ ኑራ የ፤ ኑኒ ነዉ ሎኦባ ኦና” ያግስ።
ያትን ሆባብ፥ “አካይ፥ ታኒ ታ ቢታ ታ ዳቦታኮ ባና” ያግስ።
ሙሰይ ዛሪድ፥ “ሀያና፥ ኑና የጋዳ ቦፓ። ኑ ብያ መላ ቢታን ኑኒ ዱንካናና በሳ ነ ኤራሳ፤ ኑ ባና ኦግያ ኑና ካለናዉ ዳንዳኣሳ። ኔኒ ኑራ ቢኮ፥ ጎዳይ ኑስ እምያ አንጁዋ ኡባ ኑ ኔው ሻካና” ያግስ።
አሳይ ጎዳ ዙማፐ ደንድድ፥ ሄ ጋላሳ ኦገ ብዶሶና። ጎዳ ጫቆ ታቦተይ ኤንቲ ሸምፓና በሲ ኮይሸ ሄ ጋላስ ኤንታፈ ስን ስን ብስ። ኤንቲ ዱንካንዳ ጉታፐ ደንድያ ዎደ ኡባን ጎዳ ሻራይ ጋላስ ጋላስ ኤንታፈ ቦላራ ደኤስ። ታቦተይ ደንድያ ዎደ ኡባን ሙሰይ፥ “አቤት ጎዳዉ፥ ደንዳ፤ ነ ሞርከት ላለቶ፤ ነና እፀይሳት ነ ስንፈ ባቃቶ” ያጌስ። ታቦተይ ሸምፕያ ዎደ ኡባን ሙሰይ፥ “አቤት ጎዳዉ፥ ዳሮ ሙኩላን ታይበትያ እስራኤለ አሳኮ ስማ” ያጌስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.