ናህመ 1

ናህመ ዎሳ

1ሀካልያ ናኣ ናህመ ቃላይ ሀይሳ። አርፀክስስ ፋርሰ ቢታን ካዎትን ላታማን ላይን፥ ክስለ ጌተትያ አጌናን፥ ታኒ ናህመይ ዋና ካታማ ግድያ ሱሳን ደአይስ። 2ታ እሻታፐ እሶይ፥ ሀናን፥ ሀራ አሳታራ እስፈ ይሁዳፐ ታኮ ይን፥ ታኒ የሩሳላመባነ ባብሎነ ድኤቶና አትዳ አይሁደታባ ኤንታ ኦይቻስ።

3ኤንቲ ዛሪድ፥ “ባብሎነ ድኤቶና አትዳ አሳይነ ድኤትድ ስምዳ አይሁደት ግታ መቶንነ ካዉሻን ደኦሶና። የሩሳላመ ግምበ ድርሳይ ላለትስ ቃስ ግምብያ ፐንገት ታማን ፁገትዶሶና” ያግዶሶና።

4ታ ሀይሳ ኡባ ስእዳ ዎደ ኡታዳ ዬካስ። ዳሮ ጋላስ አዛኖንነ ፆማን ሳሎ ፆሳ ሀይሳዳ ያጋዳ ዎሳስ።

5“አቤት ጎዳዉ፥ ሳሎ ፆሳዉ፥ ግታዉ፥ ቦንቸትዳይሶ፥ ነና ዶሰይሳታስነ ነ ኪታ ናገይሳታስ ነ መርና ሲቆ ጫቁዋ ናጋሳ። 6ታኒ ነ አይለይ፥ ነ አይለ ግድዳ እስራኤለ አሳ ግሾ ቃማነ ጋላስ ዎስያ ዎሳ ስአናዉ ነ ሀይይ ሀይዞ፤ ነ አይፈይ ታና ፄሎ። ኑ እስራኤለ አሳይ ኦዳ ናጋራ ኡባ ነዉ ፓፃይስ፤ ቱማ ታንነ ታ ማይዛት ነና ናቅዳ። 7ኑኒ ነ ቦላ ዳሮ ኢታ ናጋራ ኦዳ፤ ኔኒ ነ አይልያ ሙሰ ባጋራ ኑስ እምዳ ኪታ፥ ዎጋነ ህግያ ናግቦኮ። 8ነ አይልያ ሙሰስ ነ ኦድዳ ቃላ ሀያና ቆፓ፤ ኔኒ፥ ‘ህንተ ታዉ አማነቶና እፅኮ፥ ታኒ ህንተና አይሁደ ግዶና ቢታታን ላላና። 9ሽን ህንተ ታኮ ስሚድ፥ ታ ኪታ ናግኮ፥ ህንተ ሀር አቶሽን ሳኣ ጋፃ ጋካናዉ ላለትኮካ፥ ታ ሱንይ ፄገታና መላ ዶርዳ በሳ ዛራዳ ኤሀና’ ግዳይሳ ቆፓ።

10“ኔኒ ነ ግታ ዎልቃንነ ነ ምኖ ቀስያን ዎዛ ኤክዳ ነ አይለታነ ነ አሳታ። 11አቤት ጎዳዉ፥ ታኒ ነ አይለይ ዎስያ ዎሳነ ነና ቦንቻናዉ ዶስያ፥ ነ አይለታ ዎሳ ነ ሀይይ ስኦ። ታ ነ አይለይ ሀች ኦናዉ ኮይዳባይ ታዉ ኡሻጫናዳ፥ ካዋ ስንን ታዉ ሳባ እማ” ያጋስ።

ታኒ ሄ ዎደ ካዋስ ዎይነ ኡሻ ትግያ አስ።