ጌሻ ማፃፋ
ሌወታ 25
ሳምባታ ላይ
ሲና ዙማ ቦላ ጎዳይ ሙሰኮ ሀይሳዳ ያግስ። ኔኒ እስራኤለ አሳስ ሀይሳዳ ያጋዳ ኦዳ፤ ታኒ ህንተዉ እምያ ቢታ ህንተ ገልያ ዎደ ቢትያ ባ ሁጰን ጎዳ ሳምባታ ቦንቾ። ኡሱፑን ላይ ኩመ ህንተ ጋደን ዘርተ፤ ኡሱፑን ላይ ኩመ ህንተ ዎይነ ፄራ ፁንቅተ፤ እያ አይፍያ ማፅተ። ሽን ላፑን ላይይ ቢታስ ሸምፖ ሳምባታ፤ ሄስ ጎዳ ሳምባታ። ሄ ላፑን ላይን ጋደን ዘሮፕተ፤ ህንተ ዎይነ ፄራ ፁንቆፍተ። ህንተ ቢታን አሰቦ ካፅዳባ ሺሾፕተ፤ ዎይነ ፄራ ፁንቆፍተ፤ አይፍያ ማፆፕተ። ሄ ላይይ ቢታስ ኩመ ሸምፖ ላይ ግዶ። ሄ ሳምባታ ላይን ቢታይ ኦሰቶና ደእሽን ካፅያ ካ ኔኒ፥ ነ አደ አይለይ፥ ነ ማጫ አይለይ፥ ነ ሶን ኡነ ኦይ፥ ጉ ዎደስ ደእያ በተ አስ ማናዉ ዳንዳኤስ። ሄሳዳካ፥ ነ መህያስነ ነ ቢታን ደእያ ዶአታስ ግድያ ካ ደማና፤ ቢታን ካፅያባ ኡባይ ሜተቶ።
እሻታማን ላይ
ላይታስ ግዶን ደእያ ላፑን ሳምባታታ ታይባ፤ ላፑን ሳምባታታስ ላይ ታይቦይ ላፑን ቶሆ ላፑና፤ ሄስካ ኦይታማነ ኡዱፉን ላይ። ላፑን አጌናን፥ ታማን ጋላስ ቦንቸትያ ናጋራ አቶተ ጋላሳን ሞይዘ ፑንያ አስ ቢታ ኡባ ኪታ። እሻታማን ላይ ዱማይድ፥ ሄ ቢታን ደእያ ኡባስ ላአተ አዋጅተ። ሄስ ህንተዉ እሻታማን ላይ ባኣለ። ሄ ዎደ ህንተ ኡባይ ህንተ ጋድያኮነ ህንተ ሶ አሳኮ ስምተ። ሄ ላይይ ህንተዉ እሻታማን ላይ ባኣለ። ሄ ላይን ዘሮፕተ፤ አሰቦ ካፅዳባ ጫኮፍተ፤ ፄራ ፁንቆና አይፍዳ ዎይነ አይፍያ ማፆፕተ። ሄስ እሻታማን ላይ ባኣለ ግድያ ግሾ እ ህንተዉ ጌሽ፤ ጎዮና ጮ ደንባን ካፅዳባ ሚተ።
ሄ እሻታማን ላይ ባኣለ ዎደ አስ ኡባይ ባ ጋደ ስሞ።
ህንተ፥ ህንተ ሾሩዋፐ ጋደ ሻምኮ ዎይኮ እያዉ ባይዝኮ እሶይ እሱዋ ጭሞፍተ። ህንተ እሻታማን ላይ ባልያፐ ጉየ ደእያ ላይታ ታይቡዋን ህንተ ሾሩዋፐ ሻምተ። ህንተ ሾሮይ ጋደይ ካ እማናዉ ደእያ ላይታ ታይቡዋዳ ባይዞ። ላይ ታይቦይ ዳሮ ግድኮ ጋተይ ዳሬስ፤ ላይታ ታይቦይ ጉፅኮ ጋተይ ጉፄስ። ጋድያ ሎኦተዳ ህንተ ሾሮይ ህንተዉ ባይዜስ። ህንተ እሶይ እሱዋ ጭሞፍተ፤ ሽን ህንተ፥ ህንተ ፆሳ ያይተ። ታኒ ጎዳ፥ ህንተ ፆሳ።
ህንተ ሀ ቢታን ሳሮ ዳና መላ ታ ኪታ ፖልተ፤ ታ ህግያ ናግተ። ቢታይ ባ አይፍያ ህንተዉ እምን ህንተ ካላና ጋካናዉ ማና፤ ሄ ቢታን ህንተ ሳሮ ዳና። ሄኮ፥ ኑኒ ዘሮና አግድ፥ ቃስ ካ ሺሾና አግድ፥ ላፑን ላይን አይ ማኔ? ጊኮ፥ ታኒ ኡሱፑን ላይን ታ አንጁዋ ህንተዉ ኪታና፤ ቢታይ ሄ ላይስ ግድያ ካ እማና። ሆስፑን ላይን ህንተ፥ ህንተ ቢታን ዘርያ ዎደ ሻቻ ካ ማና። ህንተ ዘርያ ካ ኡዱፉን ላይን ሺሻና ጋካናዉ ሻቻ ካ ማና።
ሻሎ ዛሮ ዎጋ
ቢታይ ታባ ግድያ ግሾነ ህንተ ሄ ቢታን እማነ በተ ግድድ ደእያ ግሾ ቢታ ስሞናዳ ኦድ ባይዞፕተ። ህንተ ኦይክዳ ጋድያ ጎዳት፥ ዎዛና ማታይ እስራኤለ ኡባን ናገታናዉ በሴስ።
እስ እስራኤለ አስ ማንቅድ ባ ጋድያፐ ባይዝኮ፥ እያ ማታ ዳቦይ ሄ ጋድያ እያዉ ዎዞ። እያው ሄ ጋድያ ዎዝያ ዳቦይ ይኮ፥ እ ዎንቶ ዱረትድ ዎዝያ ሚሸ ደምኮ ዛሪድ ዎዛናዉ ዳንዳኤስ። ባ ባይዝዳ ዎደፐ ዶምድ ደእያ ላይ ታይብድ፥ አትዳ ላይ ሚሽያ ሻምዳይሳስ ዛሮ፤ ያትድ እ ባ ጋድያ ስሞ። ሽን እያዉ ሄ ጋድያ ዎዛናዉ ግድያ ሚሸይ ይኮ፥ እሻታማን ላይ ባለይ ጋካናዉ ጋደይ ሻምዳ ኡራ ኩሸን ጋምኦ። እሻታማን ላይ ባኣለ ዎደ እያ ጋደይ እያዉ ስሞ።
እስ አስ ግምበትዳ ካታማ ግዶን ደእያ ኬ ባይዝኮ፥ እ ባይዝዳ ዎድያፐ ብድ እስ ላይ ኩማና ጋካናዉ ዛሪድ ዎዛናዉ ዳንዳኤስ። ሽን እስ ላይ ግዶን ዎዛናዉ ዳንዳኤቶና እፅኮ፥ ሄ ግምበትዳ ካታማ ግዶን ደእያ ኬይ ሻምዳ ኡራስነ እያ ኮቻስ ግዴስ። እሻታማን ላይ ባኣለ ዎደ ስመና። ሽን ግምበትቦና ሄራን ደእያ ኬት ጋደ መላ ዎዘቶሶና። እሻታማን ላይ ባኣለ ዎደ ባይዝዳይሳስ ስሞሶና።
ግዶሽን፥ ሌወት ካታማታን ደእያ ባንታ ኬ ባንታ ኮይዳ ዎደ ዎዛናዉ ዳንዳኦሶና። ሌወታፐ እስ አስ ኤንታ ካታማ ግዶን ደእያ ኬ ባይዝድ ዎዛናዉ ፆነትኮ፥ ሄ ኤንታ ካታማ ግዶን ደእያ ኬይ እሻታማን ላይ ባልያ ዎደ ስሜስ። ሌወታ ካታማ ግዶን ደእያ ኬይ እስራኤለ አሳ ግዶን ሌወታሳ። ሽን ኤንታ ካታማ ዩሹዋን ደእያ ሄን ቢታይ ኤንታዉ መርና አቆ ግድያ ግሾ ባይዘተና።
ታልኤ ዎጋ
እስ እስራኤለ አስ ማንቅድ ባና አይሳናዉ ፆነትኮ፥ እማዳ ዎይኮ በተ አሳዳ እ ኔራ ዳና መላ ማዳ። እያ ኔራ ዎናዉ እያፐ የሎ ኤኮፋ ዎይኮ ዎ ሞፓ። ሽን ነ ፆሳ ያያ። ነ ብራ እያዉ የሎራ ታልኦፋ፤ ነ ካ እያዉ ዎራ ባይዞፓ። ህንተዉ ካናነ ቢታ እማናዉነ ህንተ ፆሳ ግዳናዉ፥ ህንተና ግብፀ ቢታፈ ከስዳ፥ ታኒ፥ ጎዳ ህንተ ፆሳ።
እስ እስራኤለ አስ ማንቅድ፥ ባና ነዉ አይለ ኦድ ባይዝኮ እያ አይለዳ ኦስሶፓ። እ በተ አሳዳ ኡነ ኦድ እሻታማን ላይ ባለይ ጋካናዉ ኔራ ደኦ። ሄ ዎደ እ ባ ናይታራ እስፈ ነ ሶፐ ከይድ ባ ሶ አሳኮ ቦ፤ ባ አዋ ጋደ ስሞ። እስራኤለ አሳይ ታኒ ግብፀ ቢታፈ ከስዳ ታ አይለ ግድያ ግሾ ኤንቲ አይለተስ ባይዘቶፎ። ኔኒ ኤንታ ኡንኤዳ ሃሮፓ፤ ሽን ኔኒ፥ ነ ፆሳ ያያ።
ነዉ አደነ ማጫ አይለይ ዳና መላ ኮይኮ፥ ነ ዩሹዋን ደእያ ካዎተታፐ ሻማ። ህንተ ቢታን ደእያ በተ አሳ ናይታ ሻማናዉ ዳንዳኤታ። ህንተ ቢታን ደእሸ የለትዳ ኤንታ ሶ አሳፐ ህንተዉ ሻሎ ኦናዉ ዳንዳኤታ። ህንተፈ ጉየ፥ ህንተ ናይት ኤንታ መርናዉ ላታና መላ ህንተ ናይታስ እምተ። ህንተ ኤንታ ኡባ ዎደ ህንተ አይለ ኦናዉ ዳንዳኤታ፤ ሽን እስራኤለ አስ ኡንኤድ ሃሮፕተ።
ነ ማታን ደእያ እማ ዎይኮ በተ አስ ዱረትኮ፥ እያ ማታን ደእያ እስራኤለ ኡራይ ማንቅድ፥ ነ ማታን ደእያ እማስ ዎይኮ በተ ኡራስ ዎይኮ እማ አድያ ኮቻፈ እሱዋስ ባና ባይዝኮ፥ እ ባይዘትድ ስምን፥ እያ ዎዛናዉ ዳንዳኤቴስ፤ እያ ዳቦታፐ እሶይ እያ ዎዞ። እያ አዋ እሻይ፥ ዎይኮ እያ አዋ እሻ ናአይ ዎይኮ እያ ያራፐ ማታ ዳቦይ እያ ዎዞ፤ ዎይኮ እ ባ ሁጰን ዱረትድ ባና ዎዞ። እ ባና ሻምዳ ኡራራ ግድድ፥ እ ባና ባይዝዳ ላይፈ ዶምድ እሻታማን ላይ ባለይ ጋካናዉ ደእያ ላይታ ታይቦ። እያ ላአተ ጋተይ፥ ሄ ላይ ታይቡዋ ኬና ግዶ። እ ባና ሻምዳይሳራ ጋምእዳ ዎድያ ጋተይ እስ አስ ኡነ ኦድ ደምያ ሚሽያራ ግና ግዶ። እሻታማን ላይ ባለይ ጋካናዉ ዳሮ ላይ አትዳባ ግድኮ፥ ባ ባይዘትዳ ጋትያፐ ሄ ላይ ታይቦን ባና ዎዝያ ጋትያ ቃንፆ። እሻታማን ላይ ባለይ ጋካናዉ አትዳ ላይይ ጉ ግድኮ፥ ባና ሻምዳይሳራ እስፈ ታይብድ፥ ሄ ላይ ታይቦን ባና ዎዝያ ጋትያ ቃንፆ። እ ላይን ላይን ኡነ ኦያ አሳዳ ባና ሻምዳይሳራ ደኦ፤ እያ ጎዳይ እያ ኡንኤድ ሃራናዉ በሰና።
ሽን እ ሄሳ መላ ሀኖን ዎዘቶና እፅኮ፥ እሻታማን ላይ ባለይ ጋክያ ዎደ እነ እያ ናይት አይለተፈ ከዮ። እስራኤለ አሳይ፥ ታ ግብፀ ቢታፈ ከስዳ ታ አይለ። ታኒ፥ ጎዳ ህንተ ፆሳ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.