ሌወታ 24

ፆምፐታ ናጎ

1ጎዳይ ሙሰኮ ሀይሳዳ ያግስ፤ 2ፆምፐይ ቶኦና ኤፅሸ ዳና መላ እያዉ ኮሽያ ጉምእድ ፅልስዳ ሻማሆ ዛይተ ነዉ ኤሀና መላ እስራኤለ አሳ ኪታ። 3ጌሻ ዱንካንያ ግዶን ደእያ ማርካተ ማጋራጁዋፈ ካረ ባጋራ ኦማርሳፈ ዎንታ ጋካናዉ አሮን ጎዳ ስንን ሄ ፆምፕያ ኡባ ዎደ ኤ። ያና የለተ ኡባስ ሄስ መርና ዎጋ ግዶ። 4ፆምፐ ዎያ ዋላህ ባይና ዎርቃ ኮጫ ቦላ ደእያ ፆምፐት ጎዳ ስንን ኡባ ዎደ ኤፃና መላ አሮን ናጎ።

5ታማነ ናምኡ ክሎ ግራመ ግድያ ሎኦ ለ ኤካዳ ታማነ ናምኡ ኡይ ኡካ። 6ሄ ኡይታ ኡሱፑና ኡሱፑና ናምኡ ማራን ጎዳ ስንን ደእያ ዋላህ ባይና ዎርቃ ፃርጴዛ ቦላ ዎ። 7ጎዳስ ፁገታናዉ ሺቅዳ ካ ያርሾ ግደይሳ ኤርሳናዉ፥ ናምኡ ማራታ ምየን ጌሻ እፃነ ዎ። 8ሀ ኡይ ሳምባታን ሳምባታን ኡባ ዎደ አሮን እስራኤለ አሳ ግሾ መርና ጫቆ ኦድ ጎዳ ስንን ዎ። 9ሄስ አሮናነ እያ አደ ናይታ ጋክያ ግሾ፤ ኤንቲ እያ ጌሻ በሳን ሞ። ሄስ ጎዳስ ፁሳ ያርሹዋፈ ዎጋዳ አሮናነ እያ ናይታ ጋክያ ግሾ ግድያ ግሾ ኡባፈ ጌሽ።

ሱረ ፕርዳ

10ባ አየን እስራኤለ፥ ባ አዋን ግብፀ አስ ግድዳ እስ ኡራይ ደኤስ። እስ ጋላስ እ ሀራ እስራኤለ አሳራ ሄራን ዋትስ። 11ባ አየን እስራኤለ ግድዳ ኡራይ ጎዳ ሱን ጫይስ፤ ያትን እያ አሳይ ሙሰኮ ኤህዶሶና። ሄ ኡራ አይያ ዳነ ኮቸ ግድዳ ደብራ ናአ። እ ሱንይ ሳሎምቶ። 12ሄ ኡራ ዋታነኮ ጎዳ ሸነይ ቆንጫና ጋካናዉ እያ ናግስዶሶና።

13ጎዳይ ሙሰ ሀይሳዳ ያግስ፤ 14ሄ ጫይዳ ኡራ ጉታፐ ጋፃ ከሳ። እ ጫይሽን ስእዳ አሳ ኡባይ ባንታ ኩሽያ እያ ሁጵያ ቦላ ዎ፤ እስራኤለ ማባራ ኡባይ እያ ሹቻ ጫድድ ዎ። 15እስራኤለ አሳስ ሀይሳዳ ያጋዳ ኦዳ፤ እስ አስ ባ ፆሳ ጫይኮ፥ እ ባ ናጋራን ኦይሸታና። 16ጎዳ ሱን ጫይያ አስ ሀይቆ፤ እስራኤለ ማባራ ኡባይ እያ ሹቻን ጫዶ። በተ አስ ዎይኮ ጋደ አስ ጎዳ ሱን ጫይኮ ሀይቆ።

17አሰ ዎዳ አስ ሀይቆ። 18አሳ መሄ ዎዳ አስ ኦንካ ባ ዎዳ መህያ ግሾ ፓፃ መህያ ቃንፆ። 19እስ አስ ባ ሾሩዋ ቆህኮ፥ እ ኦዳይሳዳ እያ ቦላ ኦሰቶ። 20መንኮ መኦ፤ አይፈ ግሾ አይፈ፤ አቻ ግሾ አቸ። አሳ ቦላ ቆሆ ጋዳ ኦንካ እ ጋዳ ቆሁዋዳ እያ ቦላ ጋኮ። 21መሄ ዎዳ አስ ሄ መህያ ጋትያ ቃንፆ፤ ሽን አሰ ዎዳ አስ ሀይቆ። 22በተ አሳስነ እስራኤለ አሳስ ህገይ እስኖ ግዶ። ታኒ ጎዳ ህንተ ፆሳ።

23ሙሰይ ሄሳ እስራኤለ አሳስ ኦድስ፤ ኤንቲ ሄ ጫይዳ ኡራ ጉታፐ ጋፃ ከስድ፥ ሹቻን ጫድድ ዎዶሶና። ያትድ እስራኤለ አሳይ ጎዳይ ሙሰ ኪትዳይሳዳ ኦዶሶና።