ጌሻ ማፃፋ
ሌወታ 14
ጎጋ ሀርገፈ ጌሾ ዎጋ
ጎዳይ ሙሰኮ ሀይሳዳ ያግስ፤ ጎጋ ሀርገይ ኦይክዳ ኡራይ ጌይያ ጋላስ ኦናዉ ኮሽያ ዎጋይ ሀይሳ። ሄ ኡራ ካህንያኮ ኤሀናዉ ኮሼስ። ካህነይ ጉታፐ ጋፃ ከይድ እያ ሀርግያ በኦ። እ በእያ ዎደ ጎጋ ሀርገይ ኡራ አሳተፈ ይዳባ ግድኮ፥ ካህነይ ናምኡ ቱና ግዶና ካፎታ፥ ዝጋ ም ቃንፆ፥ ዞኦ ቃጭናነ ህሶጰ ቦንጮ ሄ ሀርግያፈ ጌይያ ኡራ ግሾ ኤሀና መላ ኪቶ። ሄሳፈ ጉየ፥ ካህነይ ናምኡ ካፎታፐ እሱዋ ፑልቶፈ ዱቅድ ከረን ቆልዳ ሃ ቦላ ሹካና መላ ኪቶ። ሀንኮ ካፉዋ ዞኦ ቃጭናራነ ህሶጰ ቦንጮራ ኤክድ፥ ከረን ደእያ ፑልቶ ሃ ቦላ ሹክዳ ካፉዋ ሱን ናቆ። ሄ ሱ፥ ሄ ጎጋ ሀርግያፈ ጌይያ ኡራ ቦላ ላፑን ቶሆ ዉርፆ፤ ሄ ኡራይ ቱና ግዶናይሳ ኤርሶ፤ ፓፃ ደእያ ካፉዋ ደምባ የዶ።
ሄ ሀርግያፈ ጌይያ ኡራይ ባ ማኡዋ ሜጮ፤ ባ አሳተ ቦላ ደእያ እክሰ ኡባ ሜደቶ፤ ባ አሳተ ሜጨቶ። ሄሳፈ ጉየ፥ እ ጌይድ ጉታ ገሎ፥ ሽን ባ ዱንካንያ ግዶ ገሎና ላፑን ጋላስ ካረን ጋምኦ። ላፑን ጋላስ ባ ሁጵያ፥ ቡቻ፥ ዴሙዋነ ባ አሳተ ቦላ ደእያ ሀራ እክሰ ኡባ ሜደቶ፤ ቃስ ባ ማኡዋ ሜጮ፤ ባ አሳተካ ሜጨቶ፤ ሄሳፈ ጉየ፥ እ ጌሽ ግዳና።
ሆስፑን ጋላሳን ቦረይ ባይና ናምኡ ኡርገ ዶርሳታነ እስ ላይ ግድዳ እስ ማጫ ዶርሰ ኤሆ። ቃስ ካ ያርሾስ ዛይተራ ሙኑቀትዳ ሄ ክሎ ግራመ ሎኦ ለነ እስ ልትሮ ዛይተፐ ስኮ ኤሆ። እያ ጌሽያ ካህነይ ኡራነ እ ኤህዳ ያርሾታራ እስፈ ጌሻ ዱንካንያ ፐንገን ጎዳ ስንን ሺሾ።
ካህነይ ናምኡ ዶርሳ ኡርገታፐ እሱዋ ኤክድ፥ እስ ልትሮስ ስኮ ዛይተራ እስፈ ናቆ ያርሾ ኦድ ሺሾ፤ ሄ ሺቅዳ ያርሹዋ ዩሾ ያርሾ ኦድ ጎዳ ስንን ሺሾ። ያትድ፥ እ ሄ ዶርሳ ኡርግያ ናጋራ ያርሾነ ፁሳ ያርሾ ሹክያ ጌሻ በሳን ሹኮ። ናጋራ ያርሹዋ መላ ናቆ ያርሾይካ ካህንያስ እመቴስ፤ እካ ኡባፈ አዳ ጌሽ። ካህነይ ናቆ ያርሹዋ ሱፈ ጉ ኤክድ፥ ሄ ጌይያ ኡራስ ኡሻቻ ባጋ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ትዮ። ሄሳፈ ጉየ፥ ካህነይ ዛይትያፐ ጉራ ኤክድ፥ ባ ሀድርሳ ኩሽያ ቃቃን ትጎ።
ሄ ሀድርሳ ኩሽያ ቃቃን ደእያ ዛይትያ ባ ኡሻቻ ኩሸ ብራያ የድ የድ ኤክድ፥ ጎዳ ስንን ላፑን ቶሆ ዉርፆ። ያትድ፥ ባ ኩሽያ ቃቃን ደእያ ዛይትያፐ ኤክድ፥ ጌይያ ኡራስ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ካሰ ናቆ ያርሹዋ ሱ ትይዳ በሳን ትዮ። ቃስ ባ ኩሽያ ቃቃን አትዳ ዛይትያ ካህነይ ጌይያ ኡራ ሁጰን ጉሶ፤ ያትድ ጎዳ ስንን ሄ ኡራ ናጋራ አቶ ያግሶ።
ሄሳፈ ጉየ ካህነይ ጌይያ ኡራ ናጋራ አቶተስ ሺቅዳ ያርሹዋ ያርሼስ፤ ካልድ ቃስ ፁሳ ያርሾስ ሺቅዳ መህያ ሹኬስ። ካህነይ ፁሳ ያርሹዋ ካ ያርሹዋራ እስፈ ያርሾ በሳን ዎድ ፁጌስ፤ ያትድ ኡራ ናጋራ አቶ ያግሴስ፤ ሄ ኡራይ ጌዬስ።
ሽን ኡራይ ሄሳ ኡባ ኤሀናዉ ዳንዳኦና ማንቆ ግድኮ፥ ጎዳ ስንን እያ ናጋራ አቶተስ ዩሻናዉ ናቆ ያርሾስ እስ ዶርሳ ኡርገ ኤሆ። ካ ያርሾስ ዛይተራ ሙኑቀትዳ እስ ክሎ ግራመ ሎኦ ለነ እስ ልትሮ ዛይተፐ ስኩዋ ኤሆ። ባዉ ዳንዳኤትዳ መላ ናምኡ ሆለ ዎይኮ ናምኡ ኩራቾ እሱዋ ናጋራ ያርሾስ፥ እሱዋ ፁሳ ያርሾስ ኤሆ።
ሆስፑን ጋላስ ባ ቱናተፈ ጌይያ ኡራይ ጌሻ ዱንካንያ ፐንገን ጎዳ ስን ኤህድ ካህንያስ እሞ። ካህነይ ናቆ ያርሾስ ይዳ ዶርሳ ኡርግያነ ዛይትያ ኤክድ፥ ዩሾ ያርሾ ኦድ ጎዳ ስንን ዩሾ። ናቆ ያርሾስ ይዳ ዶርሳ ኡርግያ ሹኮ፤ ሄ ኡርግያ ሱፈ ጉራ ኤክድ፥ ሀ ጌይያ ኡራ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ትዮ። ካህነይ ዛይትያፐ ጉራ ባ ሀድርሳ ኩሽያ ቃቃን ትጎ። ሀድርሳ ኩሽያ ቃቃን ደእያ ዛይትያፐ ኡሻቻ ኩሽያ ብራያ የድ ኤክድ፥ ጎዳ ስንን ላፑን ቶሆ ዉርፆ። ካህነይ ባ ኩሽያ ቃቃን ደእያ ዛይትያፐ ጉራ ኤክድ፥ ጌይያ ኡራስ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ካሰ ናቆ ያርሾ ሱ ትይዳ በሳን ትዮ። ጎዳ ስንን ኡራ ናጋራ አቶተስ ካህነይ ባ ኩሸን አትዳ ዛይትያ ጌይያ ኡራ ሁጰን ትጎ። ሄሳፈ ጉየ፥ ጌይያ ኡራይ ባዉ ዳንዳኤትዳይሳ መላ ሆለ ዎይኮ ኩራቾ ኤሆ። እሱዋ ናጋራ ያርሾስ ናምአንዋ ፁሳ ያርሾስ ካ ያርሹዋራ እስፈ ሺሾ። ካህነይ ጌይያ ኡራ ናጋራ ጎዳ ስንን እያ ናጋራ አቶ ያግሶ። ባ አሳተ ቦላ ደእያ ጎጋ ሀርግያፈ ጌያናዉ ማንቆተ ድግዳ ኡራስ ደእያ ዎጋይ ሀይሳ።
ኬ ቦላ ከይያ ቡቃ
ጎዳይ ሙሰኮነ አሮናኮ ሀይሳዳ ያግስ፤ “ታኒ ህንተዉ እምያ ካናነ ቢታ ህንተ ገልያ ዎደ ሄ ቢታን ደእያ ህንተ ኬፈ እሱዋን ታኒ ቡቃ የድያ ዎደ፥ ሄ ኡራይ ካህንያኮ ብድ፥ ‘ታ ኬ ቦላ ቡቃ ዳንያባይ ደኤስ’ ያግድ ኦዶ። ካህነይ ሶ ገልድ ቡቃ ቆሙዋ በአናፐ ካሰትድ፥ ሶን ደእያባይ ኡባይ ቱና ጌተቶና መላ ሶን ደእያባ ኡባ ካረ ከሳና መላ ኪቶ፤ ሄሳፈ ጉየ፥ ካህነይ በአናዉ ሶ ገሎ። እ ገልድ በእያ ዎደ ቡቃይ ጎዳ ቦላ ጭሊሎ ዎይኮ ዞኦ ማላ በስኮነ ቃስ ጎዳ ምድ ኦላይድ ግዶ ገልኮ፥ ካህነይ ካረ ከይድ፥ ኬ ላፑን ጋላስ ጋካናዉ ጎርዶ። ላፑን ጋላሳን ካህነይ ሄ ኬ ዛሪድ ፄልያ ዎደ ሄ ቡቃይ ኬ ጎዳ ቦላ ዳልግኮ፥ ቡቃይ ደእያ ሹቻ ኡባ ጎዳፐ ሾድድ፥ ካታማፐ ጋፃ ከስድ ቱና በሳን የጋና መላ ኪቶ። ካልድ ጎዳ ሜሽዳ ኡርቃ ሶ ባጋራ ቦክድ፥ ዩሽ አድ ቆቆፋና መላ ኦ፤ ያትድ ሄ ኡርቃ ካታማፐ ጋፃን ደእያ ቱና በሳን የጎ። ሄሳፈ ጉየ፥ ሄ ሾደትዳ ሹቻታ በሳን ሀራ ሹቻታ ዎ፤ ሀራ ኡርቃን ኬ ሜሾ።
“ሹቻይ ሾደትን፥ ኡርቃይ ቆቆፈትን፥ ሀራ ኡርቃ ሜሽ ስምን፥ ቡቃይ ኬ ግዶን ዛር በንትኮ፥ ካህነይ ሄሳ በኦ። እ በእያ ዎደ ቡቃይ ሄ ኬ ግዶን ዳልግኮ፥ ሄስ አሳፐ አሰ ኦይክያ ቡቃ ሀርገ ግድያ ግሾ ሄ ካይ ቱና። ሄሳ ግሾ ሄ ኬ፥ እያ ሹቻ፥ እያ ምነ እ ሜሸትዳ ኡርቃ ኡባ ላልድ ካታማፐ ጋፃ ኤፍድ፥ ቱና በሳን የጎ። ሄ ኬይ ጎርዳን ጋምእያ ዎደ እያ ግዶ ገልያ ኦንካ ኦማርስ ጋካናዉ ቱና። ሄ ኬን አቅያ ዎይኮ ካ ምያ ኡራይ ባ ማኡዋ ሜጮ።
“ሽን ካህነይ ይድ ፄልያ ዎደ ኬይ ሜሸትድ ስምን፥ ዛሪድ ዳልጎና እፅኮ፥ ቡቃይ ይዳ ግሾ፥ ሄ ኬይ ቱና ግዶናይሳ ካህነይ ኤርሶ። ኬ ጌሻናዉ ናምኡ ካፎታ፥ ዝጋ ም ቃንፆ፥ ዞኦ ቃጭናነ ህሶጰ ቦንጮ ኤሆ። ካፎታፐ እሱዋ ፑልቶፈ ዱቅድ ከረን ቆልዳ ሃን ሹኮ። ሄሳፈ ጉየ፥ ዝጋ፥ ህሶጰ ቦንጩዋ፥ ዞኦ ቃጭናነ ፓፃ ደእያ ካፉዋ ኤክድ፥ ከረን ደእያ ሹከትዳ ካፉዋ ሱንነ ፑልቶ ሃን የድ ኤክድ ላፑን ቶሆ ሄ ኬ ዉርፆ። ያትድ፥ ካህነይ ሄ ኬ ካፉዋ ሱን፥ ፑልቶ ሃን፥ ፓፃ ደእያ ካፉዋን፥ ዝጋ ምን፥ ህሶጰ ቦንጩዋንነ ዞኦ ቃጭናን ጌሾ። ፓፃ ደእያ ካፉዋ ካታማፐ ጋፃ የዶ። ሄሳዳ ኦድ፥ ኬ ጌሽያ ዎጋ ፖሌስ፤ ኬይ ጌሽ ግዴስ።
“ዱማ ዱማ ጎጋ ሀርጌስነ ጎኦ ሀርጌስ እመትዳ ዎጋይ ሀይሳ። ማኦ ቦላ ዎይኮ ኬ ቦላ ከይያ ቡቃ ሀርገ ግድን፥ ክፃ ግድን፥ መርኮ ግድን፥ እራለ ግድን፥ እስባይ ቱና ግደይሳነ ቱና ግዶናይሳ ኤርስያ ዎጋይ ሀይሳ።”
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.