ጌሻ ማፃፋ
ሌወታ 15
አሳተፈ ጎግድ ቱንስያባታ
ጎዳይ ሙሰኮነ አሮናኮ ሀይሳዳ ያግስ፤ እስራኤለ አሳስ ሀይሳዳ ያግድ ኦድተ፤ “እስ አሳ አሳተፈ ጎግያባይ ደእኮ ሄስ ቱና። ጎግያባይ ደእያ ኡራ ቱና ኦያ ዎጋይ ሀይሳ፤ ሄ ጎግያባይ አግን፥ አጎና እፅን፥ ሄ ኡራ ቱና ኦስ።
“እያ አሳተፈ ጎግያባይ ደእያ ኡራይ ዝንእያ ሂፃይነ ኡትያ ኦይደ ኡባይ ቱና። እያ ሂፃ ቦችያ ኦንካ ባ ማኡዋ ሜጮ፤ ባ አሳተካ ሜጨቶ፤ ያትድ ኦማርስ ጋካናዉ ቱና ግዴስ። ጎግያባይ ደእያ ኡራይ ኡትዳባ ቦላ ኡትያ ኦንካ ባ ማኡዋ ሜጮ፤ ባ አሳተካ ሜጨቶ፤ ያትድ ኦማርስ ጋካናዉ ቱና ግዴስ።
“ጎግያባይ ደእያ ኡራ አሳተ ቦችያ ኦንካ ባ ማኡዋ ሜጮ፤ ባ አሳተ ሜጨቶ፤ ያትድ ኦማርስ ጋካናዉ እ ቱና ግዴስ።
“ጎግያባይ ደእያ አስ ቱና ግዶና አሳ ቦላ ጩትኮ፥ ሄ ኡራይ ባ ማኡዋ ሜጮ፤ ባ አሳተካ ሜጨቶ፤ ያትድ ኦማርስ ጋካናዉ እ ቱና ግዴስ።
“ጎግያባይ ደእያ ኡራይ ኡትያ ቶጋ ኮር ቱና። እያፐ ጋርሳራ ደእያባ ቦችያ ኦንካ ኦማርስ ጋካናዉ ቱና ግዴስ፤ ቃስ ሄሳ ቶክያ ኦንካ ባ ማኡዋ ሜጮ፤ ባ አሳተ ሜጨቶ፤ ያትድ ኦማርስ ጋካናዉ እ ቱና ግዴስ።
“ጎግያባይ ደእያ አስ ባ ኩሽያ ሜጨቶና ቦችያ አስ ኦንካ ባ ማኡዋ ሜጮ፤ ባ አሳተ ሜጨቶ፤ ያትድ ኦማርስ ጋካናዉ ቱና ግዴስ።
“ጎግያባይ ደእያ ኡራይ ቦችያ ኦቶ ኡባ መንተ፤ ምፈ ኦሰትዳ ሚሸ ኡባይ ሃን ሜጨቶ።
“ጎግያባይ ደእያ አስ ሄ ጎግያባፐ ጌይዳ ዎደፐ ላፑን ጋላስ ጋምኦ። ባ ማኡዋ ሜጮ፤ ባ አሳተ ፑልቶ ሃን ሜጨቶ፤ ያትድ እ ጌሽ ግዴስ። ሆስፑን ጋላሳን ናምኡ ሆለታ ዎይኮ ናምኡ ኩራቾታ ኤክድ፥ ጌሻ ዱንካንያ ፐንገ፥ ጎዳ ስን ኤህድ ካህንያስ እሞ። ካህነይ ሆለታፐ እሱዋ ናጋራ ያርሾስ፥ እሱዋ ቃስ ፁሳ ያርሾስ ያርሼስ፤ ያትድ ካህነይ ኡራ አሳተፈ ጎግያባ ግሾ ጎዳ ስንን እያ ናጋራ አቶ ያግሴስ።
“እስ አደፈ እያ አቱንይ ጉክኮ፥ ባ ኩመ አሳተካ ሜጨቶ፤ ያትድ ኦማርስ ጋካናዉ እ ቱና ግዴስ። አቱንይ ቦችዳ ማኦ ኡባይ ዎይኮ ጋልባ ኡባይ ሃን ሜጨቶ፤ ያትድ ኦማርስ ጋካናዉ ቱና ግዴስ። እስ አደይ ማጫራ አቅን፥ እያ አቱንይ ጉክኮ፥ ናምአይካ ሃን ሜጨቶ፤ ያትድ ኦማርስ ጋካናዉ ኤንቲ ቱና ግዶሶና።
“እስ ማጫስ ባ ኩሸ መቶ በእኮ፥ ላፑን ጋላስ ጋካናዉ እያ ቱና፤ እዮ ቦችያ ኦንካ ኦማርስ ጋካናዉ ቱና።
“ባ ኩሸ መቶ ዎደ እያ ዝንእያ ሂፃይነ እያ ኡትያ ኦይደይ ኡባይ ቱና። እያ ዝንእያ ሂፃ ቦችያ ኡባይ ባ ማኡዋ ሜጮ፤ ባ አሳተካ ሜጨቶ፤ ያትድ ኦማርስ ጋካናዉ ቱና ግዶ። እያ ኡትያባ ቦችያ ኡባይ ባ ማኡዋ ሜጮ፤ ባ አሳተ ሜጨቶ፤ ያትድ ኦማርስ ጋካናዉ ቱና ግዶ። እያ ዝንእያ ሂፃ ግድን ዎይኮ እያ ኡትያባ ቦችያ ኦንካ ኦማርስ ጋካናዉ ቱና።
“እስ ማጫስ ኩሸ መቶራ ደእያ ዎደ አደይ ኢራ አቅኮ፥ ሄ ኩሸ መቱዋ እ ቦችኮ፥ ላፑን ጋላስ ጋካናዉ እ ቱና ግዴስ፤ እ ዝንእያ ሂፃ ኡባይ ቱና ግዴስ።
“እስ ማጫስ፥ ባ ኩሸ መቶ ዎደይ አን፥ ሱ አጎና ጎግኮ ዎይኮ ኩሸ መቶ ዎደይ ባ ቃማፈ አድ ጎግኮ፥ ኩሸ መቶ ዎደ እያ ቱና ግድዳይሳዳ ሱይ ኤቃና ጋካናዉ እያ ቱና ግዳዉሱ። ሱ ኢፐ ጎግያ ዎደ እያ ዝንእያ ሂፃ ኡባይ፥ ባ ኩሸ መቶ በእያ ዎደ እያ ዝንእዳ ሂፃ መላነ እያ ኡትያ ኦይድያ መላ ቱና ግዴስ። ሄ ቱንዳባታ ቦችያ ኦንካ ቱና ግድያ ግሾ እ ባ ማኡዋ ሜጮ፤ ባ አሳተ ሜጨቶ፤ ያትድ ኦማርስ ጋካናዉ ቱና ግዴስ።
“ኢፐ ጎግያ ሱይ ኤቅኮ፥ እያ ሄ ዎደፐ ዶማዳ ላፑን ጋላስ ጋምኦ፤ ሄሳፈ ጉየ፥ እያ ጌሽ ግዳና። ሆስፑን ጋላስ እያ ናምኡ ሆለታ ዎይኮ ናምኡ ኩራቾታ ኤሀዳ ጌሻ ዱንካንያ ፐንገን ካህንያስ እሞ። ካህነይ ሆለታፐ እሱዋ ናጋራ ያርሾስ፥ እሱዋ ፁሳ ያርሾስ ያርሾ። ያትድ፥ ካህነይ ኢፐ ጎግያ ቱናተ ግሾ ጎዳ ስንን እ ናጋራ አቶ ያግሴስ።
“እስራኤለ አሳይ ባንታ ግዶን ደእያ ጌሻ ዱንካንያ ቱንስድ፥ ሀይቆና መላ ኔኒ ሀይሳዳ ኦዳ ኤንቲ ባንታና ቱንስያባፐ ዱማይድ ዳና መላ ናጋ።”
እያ አሳተፈ ጎግያባይ ደእያ አሳስ፥ እያ አቱይ ጉክን ቱንያ አደስ፥ ባ ኩሸ መቶ ጋሶን ቱንያ ማጫሳስ፥ አደ ግድን ማጫ ግድን ጎግያባይ ደእያ አሳስነ ቱንዳ ማጫራ አቅያ አደስ እመትዳ ዎጋይ ሀይሳ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.