ጌሻ ማፃፋ
ሌወታ 13
ጎጋ ሀርገ ህገታ
ጎዳይ ሙሰኮነ አሮናኮ ሀይሳዳ ያግስ፤ “እስ አሳ አሳተ ቦላ ክፅ ዎኮ ዎይኮ ሻቶይ ዎይኮ እራለይ ከይኮ እያ ጎጋይ ሀርገን ላመትኮ፥ ሄ ኡራ ካህንያ አሮናኮ ዎይኮ ካህነ ግድዳ እያ አደ ናይታፐ እሱዋኮ ኤሆ። ካህነይ እያ ጎጋ ቦላ ደእያ ማዱን በኦ። ሄ ማዱንፅዳ በሳን ደእያ እክሰይ ቦፅኮነ ማዱንይ ኦላትኮ፥ ሄስ ጎጋ ሀርገ። ካህነይ ሄሳ በእድ ኡራይ ቱና ግደይሳ ኤርሶ። ሽን እያ ጎጋ ቦላ ደእያ ማዱንይ ቦ ግድድ፥ ጎጋፐ ካንድ ኦላትቦናባ ግድኮ ሄ ማዱን ቦላ ደእያ እክሰይ ቦፆናባ ግድኮ፥ ካህነይ ሄ ኡራ ዱማ ኬን ላፑን ጋላስ ጎርድድ ዎ። ላፑን ጋላስ ካህነይ እያ ዛሪድ በኦ፤ እ በእያ ዎደ ማዱንይ ኡራ ጎጋ ቦላ ዳልጎና ካሰይስዳ ደእኮ፥ ካህነይ ሄ ኡራ ናምአን ዱማ ኬን ላፑን ጋላስ ጎርድድ ዎ። ቃስካ ላፑን ጋላስ ካህነይ እያ በኦ፤ እ በእያ ዎደ ማዱንይ ዳልጎና እፅድ ይ ይ ቢኮ፥ ካህነይ እ ቱና ግደይሳ ኤርሶ። ሄስ ጎኦ ግደይሳ ኤርሶ፤ ሄ ኡራይ ባ ማኡዋ ሜጭድ ቱና ግዶናይሳ ኤርሴስ። ሽን እ ጌያናዉ ባና ካህንያ በስዳፐ ጉየ፥ ሄ ጎኦይ እያ ጎጋ ቦላ ዳልግ ዳልግ ቢኮ እ ዛሪድ ባና በሳናዉ ካህንያኮ ቦ። ካህነይ እያ በኦ፤ ሄ ጎኦይ ኡራ ጎጋ ቦላ ዳልግ ዳልግ ቢኮ፥ ሄስ ጎጋ ሀርገ ግድያ ግሾ ካህነይ እ ቱና ግደይሳ ኤርሶ።
“ኦንካ ጎጋ ሀርገን ኦይከትኮ እያ ካህንያኮ ኤሆ። ካህነይ እያ በእያ ዎደ እያ ጎጋ ቦላ ቦ ክፅ ደእኮ፥ እክሰይ ቦ ላምኮነ ሄ ክፃ ግዶን አሾይ በንትኮ፥ ሄስ ጎጋ ቦላ ጋምእዳ ሀርገ ግድያ ግሾ፥ ካህነይ እ ቱና ግደይሳ ኤርሶ። እ ቱና ግደይስ ኤረትዳ ግሾ፥ እያ ዱማ ኬን ጎርድድ ዎናዉ ኮሸና። ካህነይ ጎጋ ሀርገይ አድያ አሳተ ቦላ ዳልግኮ፥ ሁጰፐ ቶሆ ጋካናዉ ኡባ ማእዳባ ግድኮ በኦ። ሄ ጎጋ ሀርገይ እያ አሳተ ኡባ ማእኮ፥ እያ አሳተይ ኩመ ላመትድ ቦ ግድዳ ግሾ፥ እ ቱና ግዶናይሳ ካህነይ ኤርሶ። ሽን ሄ ማዱን ግዶራ አሾይ በንትኮ እ ቱና። ካህነይ ሄ አሹዋ በእድ ሄ ኡራይ ቱና ግደይሳ ኤርሶ። ሄ አሾይ ጎጋ ሀርገ ግድያ ግሾ እ ቱና። ሽን ሄ አሾይ ቃስካ ላመትድ ቦፅኮ፥ ሄ ኡራይ ካህንያኮ ቦ። ካህነይ እያ በኦ፤ እያ ማዱንይ ቦፅዳባ ግድኮ፥ ሄ ኡራይ ቱና ግዶናይሳ ካህነይ ኤርሶ፤ እ ቱና ግዳና።
“እስ አሳ ቦላ መርኮይ ዎድ ፓፅዳባ ግድኮ፥ እያ በሳን ቦ ክፃይ ዎኮ ዎይኮ ዞእዳ እራለይ ከይኮ ሄ ኡራይ ካህንያኮ ቦ። ካህነይ እያ በኦ፤ ሄ ማዱንይ ኦላትኮ፥ ማዱን ቦላ ደእያ እክሰይ ላመትድ ቦፅኮ፥ ሄ ኡራይ ቱና ግደይሳ ካህነይ ኤርሶ። ሄስ መርኮዳ ዶምዳ ጎጋ ሀርገ። ሽን ካህነይ በእያ ዎደ እክሰይ ቦፆናባ ግድኮ፥ ማዱንይ ጎጋ ካንድ ኦላትቦናባ ግድኮ፥ ቃስ ይ ይ ቢኮ፥ ካህነይ እያ ዱማ ኬን ላፑን ጋላስ ጎርድድ ዎ። ሄስ እያ ጎጋ ቦላ ዳልግ ዳልግ ቢኮ፥ ሄስ ጎጋ ሀርገ ግድያ ግሾ ሄ ኡራይ ቱና ግደይሳ ካህነይ ኤርሶ። ሽን ሄ እራለይ ዳልግ ዳልግ ቦና እስ በሳን ደእኮ፥ ሄስ መርኮይ ፓፅዳ ቤታ ግድያ ግሾ፥ ሄ ኡራይ ቱና ግዶናይሳ ኤርሶ።
“ታም እስ አስ ሚኮ ሄ ምዳ በሳን ቦ ዎይኮ ዞኦ እራለይ ከይኮ፥ ካህነይ ሄ በሳ በኦ። ሄ በሳን ደእያ እክሰይ ቦፅኮነ ሄ ማዱንይ ኦላትኮ፥ ሄስ ጎጋ ሀርገ። እ ታማይ ምዳ በሳራ ከይዳ ግሾ ካህነይ እ ቱና ግደይሳ ኤርሶ። ሽን ካህነይ በእያ ዎደ ሄ ማዱን ቦላ ደእያ እክሰይ ቦፆናባ ግድኮ፥ ማዱንይ ጎጋ ካንድ ኦላትቦናባ ግድኮነ ቃስ ይ ይ ብዳባ ግድኮ፥ ካህነይ እያ ዱማ ኬን ላፑን ጋላስ ጎርድድ ዎ። ላፑን ጋላስ ካህነይ እያ በእያ ዎደ ሄ በሳይ ዳልግ ዳልግ ቢኮ፥ ሄስ ጎጋ ሀርገ ግድያ ግሾ እ ቱና ግደይሳ ካህነይ ኤርሶ። ሽን ሄ ማዱንይ ጎጋ ቦላ ዳልጎና አግድ እስ በሳን ኡትኮነ ይ ይ ቢኮ፥ ሄስ ታማይ ምዳ በሳን አትዳ ቤታ ግድያ ግሾ፥ እ ቱና ግዶናይሳ ካህነይ ኤርሶ።
“እስ አደይ ዎይኮ ማጫሳ ሁጰን ዎይኮ ጋጮ ቦላ ማዱን ከይኮ፥ ካህነይ ሄ ማዱን በእያ ዎደ ማዱንይ ጎጋ ካንድ ኦላትኮ እያ ቦላ ደእያ እክሰይ ሌእድ ጋላልኦ ዳንኮ፥ ሄስ ሁጰን ዎይኮ ጋጮ ቦላ ከይያ ቃችያ ጎጋ ሀርገ ግድያ ግሾ፥ ሄ ኡራይ ቱና ግደይሳ ካህነይ ኤርሶ። ቃስ ካህነይ ሄ ሀርግያ በእያ ዎደ ጎጋ ካንድ ኦላትቦናባ ግድኮ፥ ካሬ እክሰይ እያ ቦላ ይኮ፥ ሄ ቃችያ ሀርገይ ደእያ ኡራ ካህነይ ዱማ ኬን ላፑን ጋላስ ጎርድድ ዎ። ላፑን ጋላስ ካህነይ ሄ ሀርግያ በእያ ዎደ ቃችያ ሀርገይ ዳልጎናባ ግድኮ፥ እያ ቦላ ጋላልኦ ዳንያ እክሰይ ባይናባ ግድኮነ ጎጋ ካንድ ኦላትቦናባ ግድኮ፥ ሄ ኡራ ቃችያ በሳን ደእያ እክስያ ግዶናሽን፥ ማዱን ዩሾን ደእያ እክስያ ሜዶ። ካህነይ ሄ ኡራ ዱማ ኬን ሀራ ላፑን ጋላስ ጎርድድ ዎ። ላፑን ጋላስ ካህነይ ሄ ቃችያ በሳ በእያ ዎደ ኡራ ጋልባ ቦላ ዳልጎና እፅኮነ ጎጋ ካንድ ኦላቶና እፅኮ፥ ሄ ኡራይ ቱና ግዶናይሳ ካህነይ ኤርሶ። ኡራይ ባ ማኡዋ ሜጭድ ጌሽ ግዳና። ሽን እ ጌይዳፐ ጉየ፥ ቃችያ ሀርገይ ሄ ኡራ ጋልባ ቦላ ዳልግ ዳልግ ቢኮ፥ ካህነይ እያ በእያ ዎደ ሄ ቃችያ ሀርገይ ዳልግዳባ ግድኮ፥ ሄ ኡራይ ቱንዳ ግሾ ካህነይ ጋላልኦ ዳንያ እክስያ ኮዮፖ። ሽን ካህነይ በእያ ዎደ ሄ ቃችያ በሳይ ዳልጎናባ ግድኮነ ካሬ እክሰይ እያ ቦላ ዶልዳባ ግድኮ፥ ሄ ቃችያ በሳይ ፓፅስ። ሄ ኡራይ ቱና ግዶና ግሾ፥ እ ጌሽ ግደይሳ ካህነይ ኤርሶ።
“እስ አደ ዎይኮ ማጫሳ ጎጋ ቦላ ቦ እራለይ ከይኮ፥ ካህነይ በእያ ዎደ ኤንታ ጎጋ ቦላ ደእያ እራለይ ቡላ ግድኮ፥ ሄስ ጎጋ ቦላ ጮ ከይዳባ ግድያ ግሾ ሄ ኡራይ ቱና ግደና።
“እስ አሳስ ሁጰ ብናናይ ቆቆፈትኮ፥ ቦአ ግዴስፐ አትሽን፥ እ ቱና ግደና። እስ አስ ስንራ ቦአትኮ፥ እያ ቲሽ ምስፐ አትሽን፥ እ ቱና ግደና። ሽን እያ ቦእ ዎይኮ ቲሽ ምዳይሳ ቦላ ዞኦ ዎይኮ ቦ ማዱን ከይኮ፥ ሄስ እያ ቦአን ዎይኮ እያ ቲሻ ቦላ ከይዳ ጎጋ ሀርገ። እያ ካህነይ በእያ ዎደ እያ ቦእ ዎይኮ ቲሽ ምዳይሳ ቦላ ደእያ ማዱንይ ጋልባ ቦላ ከይያ ጎጋ ሀርገ መላ ዞኦ ግድኮ፥ ሄ ኡራይ ቱማ ጎጋ ሀርገን ኦይከትዳ ሀርጋንቾ። እ ቱና ግድያ ግሾነ እያ ሀርገይ እያ ሁጰን ደእያ ግሾ እ ቱና ግደይሳ ካህነይ ኤርሶ።
“ጎጋ ሀርገይ ኦይክዳ አስ ፔትዳ ማኦ ማኦ፤ ባ ሁጵያ ፕፆፖ፤ ባ ዶና ካሞ፤ ባ ቃላ ቁ ኦድ፥ ‘ታኒ ቱና፥ ታኒ ቱና!’ ያጎ። ሄ ሀርገይ እያ ቦላ ደእዳ ዎደ ኡባን እ ቱና። እ ቱና ግድያ ግሾ፥ አሳፐ ሻከትድ፥ ጉታፐ ካረን ባርካ ደኦ።
“አይ ማኦ ቦላ ቡቅዳ በሲ በንትኮ፥ ሄ ማኦይ ሱፈ ግድን ዎይኮ ሊኖ ግድን፥ ቃጭናፐ ዎይኮ ሻሎፐ ዳደትዳ ሊኖ ዎይኮ ሱፈ ግድን፥ ጋልባ ዎይኮ ጋልባፈ ኦሰትዳ ማኦ ግድን፥ ሄ ማኡዋ ቦላ በንትዳ ቡቃይ ጭሊሎ ዎይኮ ዞኦ ማላ በስኮ፥ እ ቃጭናፐ ዎይኮ ሻሎፐ ዳደትዳባ ግድን፥ ጋልባ ዎይኮ ጋልባፈ ኦሰትዳባ ግድን፥ ሄስ አሳፐ አሰ ኦይክያ ሀርገ ግድያ ግሾ፥ ሄሳ ካህነይ በሳናዉ ኮሼስ። ካህነይ ሄ ቡቃ በእድ፥ ሄ ቡቅዳ ማኡዋ ዱማ ኬን ላፑን ጋላስ ጎርድድ ዎ። ላፑን ጋላስ ካህነይ ሄ ማኡዋ በእያ ዎደ ሄ ማኡዋ ቦላ ደእያ ቡቃይ ዳልግ ዳልግ ቢኮ፥ እ ቃጭና ዎይኮ ሻሎ ግድን፥ ጋልባ ዎይኮ ጋልባፈ ኦሰትዳ ማኦ ግድን፥ ሄስ እሱዋፈ እሱዋ ኦይክያ ቡቃ ሀርገ ግድያ ግሾ ሄ ማኦይ ቱና። ሄ ማኦይ ቃጭና ዎይኮ ሻሎ ግድን፥ ሊኖ ዎይኮ ሱፈ ግድን፥ ጋልባፈ ኦሰትዳባ አይባ ግድን፥ ካህነይ እያ ፁጎ። ሄስ እሱዋፈ እሱዋ ኦይክያ ቡቃ ሀርገ ግድያ ግሾ፥ እ ፁገታናዉ በሴስ።
“ሽን ካህነይ በእያ ዎደ ሄ ቡቃ ማኡዋ ቦላ ዳልግቦናባ ግድኮ፥ እ ቃጭና ዎይኮ ሻሎ ዎይኮ ጋልባፈ ኦሰትዳባ አይባ ግድን፥ ሄ ቡቃይ ደእያ ማኡዋ ሜጫና መላ ካህነይ ኪቶ። ሄሳፈ ጉየ፥ ሄ ማኡዋ ዱማ ኬን ሀራ ላፑን ጋላስ ጎርድድ ዎ። ሄ ማኦይ ሜጨትዳፐ ጉየ ቃስካ ካህነይ በእያ ዎደ ሄ ቡቃይ ባ ማላ ላሞናባ ግድኮነ ዳልግ ዳልግ ቦና እፅኮካ እ ቱና። ሄ ቡቃ በሳይ ማኡዋስ ጉየ ባጋራ ዎይኮ ስን ባጋራ ደእኮካ ሄ ማኦይ ታማን ፁገታናዉ ኮሼስ። ሽን ሄ ማኡዋ ሜጭ ስምን ካህነይ በእያ ዎደ ቡቃይ ይ ይ ቢኮ፥ እ ጋልባ ግድን፥ ቃጭና ዎይኮ ሻሎ ግድን፥ ሄ ቡቃይ ደእያ በሳ ካህነይ ዳክድ ከሶ። ሄሳፈ ጉየ፥ ማኡዋ ቦላ ስሚድ ከይኮ፥ ሄ ማኦይ ቃጭና ዎይኮ ሻሎ ግድን፥ ጋልባፈ ኦሰትዳባ ግድን፥ ሄስ ዳልግ ዳልግ ቢኮ ሄ ቡቃይ ደእያ ማኦይ ታማን ፁገታናዉ በሴስ። ሽን ሜጨትዳ ማኦይ ቃጭና ዎይኮ ሻሎ ግድን፥ ዎይኮ ጋልባፈ ኦሰትዳባ ማኦ ግድን፥ ቡቃ ማላይ ይኮ፥ ሄ ማኦይ ናምአን ሜጨቶ፤ ሄሳፈ ጉየ፥ እ ጌዬስ” ያግስ።
እስ ማኦይ ሱፈ ዎይኮ ሊኖ ግድን፥ ቃጭና ዎይኮ ሻሎ ግድን፥ ዎይኮ ጋልባፈ ኦሰትዳባ ግድን፥ ሄ ማኡዋ ጌሽ ዎይኮ ቱና ያግሳናዉ ዳንዳእያ ዎጋይ ሀይሳ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.