ምላልሳ 2

ቃይ ባይና ሴራ

1ጎዳይ ባ ሀንቆ ሻራፐ ጋርሳን፥

ፅዮነ ናእዉ፥ ዋትድ ዎደ!

እስራኤለ ቦንቹዋ ሳሎፐ ሳአ ሆልስ፤

ባ ሀንቁዋ ጋላስ፥

እያ ቶሆይ የያ በሳ ቆፕቤና።

2ጎዳይ ይሁዳን ኬታ ኡባ ቃቶና ይስስ፤

ባ ሀንቁዋን ይሁዳ ቢታ ሚፃ ኡባ ላልስ፤

ሄ ካዎተነ ሀላቃታ ሳአን ዱገ የግድ ካዉሽስ።

3ባ ዎልቃማ ሀንቁዋን እስራኤለ ዎልቃ መንረስ፤

ሞርከይ እያ ኦላናዉ ያ ዎደ

ጎዳይ ባ ኡሻቻ ኩሽያ ኤንታ ቦላፈ ድግስ።

ባ ዩሹዋን ደእያባ ኡባ ምያ ታማዳ፥

ያይቆባ ቦላ ታማ ላጮይ ኤፅስ።

4ሞርከዳ እ ባ ዶንግያ ኤንታ ቦላ ዳፍስ፤

ኡንኤያ እያ ኡሻቻ ኩሸይ ጊግስ።

አይፌስ ሎእያ አሳ ኡባ ዎስ፤

ፅዮነ ቦላ ባ ሸንያ ታማዳ ቆልስ።

5ጎዳይ ሞርከዳ ሀንድ፥ እስራኤለ ይስስ፤

ካዎ ጋታነ ሚፃ ኡባ ላልስ

ይሁዳ አሳስ ዬሆነ ካዮ ጉጅስ።

6ባ ኬ አታክልተ ጋደን ደእያ ሻቃራዳ ሾድድ ሆልስ፤

ላይ ባለትነ ሳምባታት ዶገታናዳ ኦስ፤

ባ ግታ ሀንቁዋን ካዋነ ካህንያ ካዉሽስ።

7ጎዳይ ባ ያርሾ በሳ ካስ፤ ባ ኬ አጋግስ፤

ካዎ ጋታ ግምብያ ሞርከታ ኩሸን የግስ።

ላይ ባኣለ ቦንችያ ጋላሳ ዎጫማዳ፥

ሞርከት ፆሳ ኬን ዎጫምዶሶና።

8ጎዳይ ፅዮን ናኤ ድርሳ ግምብያ፥

ላላናዉ ቃችስ፤ እ ቦላ ዋ ዎዶሮ የግስ።

እዮ ይሶና ደእሸ ባ ኩሽያ ዛረና፤

ግምበይነ ሚፃይ እስፈ ኩንዳናዳ ኦስ።

9የሩሳላመ ፐንገ ሳንቃት ቢታን ሞገትዶሶና፤

ኤንታ ጎርደ ምታ መንረድ ይስስ።

ካዎይነ ሞርናት ድኤትድ ካዎተታ ግዶ ብዶሶና፤

ህገ ታማርሰይ ባዋ፤

ናበትካ ህዛፐ ጉየ ቆንጨ በኦኮና።

10ፅዮነ ጭማት ስእ ግድ ቢታን ኡትዶሶና፤

ባንታ ሁጰን ባና ቆልድ ካዮ ማኦ ማእዶሶና፤

የሩሳላመ ጌላኦት ሳአን ዱገ ሆክዶሶና።

11ታ አሳይ ይዳ ግሾ፥

ጉ ናይት ካታማ ኦግያ ቦላ

ዳቡርድ ኩንድዳ ግሾ፥

ታ አይፈይ አፉን ቱልጫትስ፤

ታ ዎዛናይ አዛኖን ዳጋምስ።

12ኤንቲ ባንታ አየታኮ፥

“ካ እማ! ሃ እማ”

ያግድ ዋሶሶና፤

ካታማ ኦግያን ማዱንፅድ ላባንያ አሳዳ፥

ኤንቲ ዳቡርን ኤንታ ሸምፖይ ኤንታ አየታ ክኦን ከዬስ።

13የሩሳላመ ናተ፥ ታኒ ነባ አይ ጋኔ?

ነ ቆሁዋ ታ አይብራ ግናዮ?

ዶሰትዳ ፅዮነ ጌላኤ፥ ታ ነና ዋታዳ ምን?

ነ ማዱንይ አባ መላ ጪሞ፤

ነና ኦን ፓናዉ ዳንዳኢ?

14ነ ናበት ዎርዶነ ፓና ቆንጨ በእዶሶና፤

ነ ድኤቶና መላ ነ ናጋራ ቆንጭስድ ኦድቦኮና፤

ኤንቲ ባለያ ዎርዶ ቆንጨ ነዉ በእዶሶና።

15ነ ማታራ አያ ኡባይ ባ ኩሽያ ባቄስ፤

“ቢታን ኡባፈ አዳ ሎእያ ካታምያ ሀኖ?

ቢታ ኡባስ ኡፋይስ ጌተትዳ ካታምያ ሀኖ?”

ያግድ ነና ቀልቅስሸ ባንታ ሁጵያ ቃዶሶና።

16ነ ሞርከት ኡባይ ባንታ ዶና

ነ ቦላ ዶይዶሶና፤

ነ ቦላ ቀልቅስዶሶና።

ባንታ አቻ ቃርጭሸ ሀይሳዳ ያጎሶና፤

ኑ ኤንታ ይስዳ፥ ኑ አሞትዳይ ሄሳ

ዉርሰን በእዳ።

17ጎዳይ ባ ቆፕዳባ ኦስ፤

ካሰ ኦድዳ ባ ቃላ ፖልስ።

የሩሳላመስ ቃቶና እዮ ላልስ

እ ሞርከት ኡፋይታና መላ፥

ሞርከታ ዎልቃ ምንስ።

18ፅዮነ፥ ነ ድርሳ ግምበይ ጎዳኮ ዋሶ!

ነ አፉይ ቃማነ ጋላስ ሻፋዳ ጎጎ!

ነዉካ ሸምፖፋ፤

ነ አይፍያስ ሸምፖ እሞፋ!

19ቃማ ደንዳዳ ዋሳ፤

ጎዳ ስንን ነ ዎዛና ሃዳ ጉሳ።

ኮሻትድ ኦገ ዶናን ኩንድዳ ነ ናይታ ሸምፑዋስ

ነ ኩሽያ እያኮ ፑደ ደንዳ ዎሳ!

20አቤት ጎዳዉ፥ በአ!

ካሰ ሀይሳዳ ኔኒ ኦደ ቦላ ኦዲ?

አየት ባንታ ክኦን ኮእስድ

ድችዳ ባንታ ናይታ ሞ ጋይ?

ካህነትነ ናበት ፆሳ ኬን ሀይቆ ጋይ?

21ጭምነ ናአተ ኦገ ቦላ ኩንድዶሶና፤

ጌላኦትነ ፓንት ማሻን ዉርዶሶና።

ኔኒ ነ ሀንቁዋ ጋላስ ኤንታ ዎዳሳ፤

ኤንታዉ ቃቶና ኤንታ ቡዳሳ።

22ግብራ ጋላስ አሰ ፄገይሳዳ፥

ዳጋንያ ታ ሞርከታ ኡባ በሳፈ ፄጋዳሳ።

ጎዳ ሀንቆ ጋላሳን

ኦንካ ከስ ኤክቤና ዎይኮ አትቤና።

ታኒ ታ ክኦን ኮእሳዳ ድችዳ

ናይታ ኡባ ሞርከይ ዎድ ይስስ።