ምላልሳ 1

የሩሳላመ ዋየ

1ካሰ አስ ኩምዳ ካታምያ

ሀእ ዋናዳ አስ ባይና በሲ ግዳዴ?

ካሰ ካዎተታ ግዶን ግታ ግድዳራ

ሀእ ዋናዳ አምኦ ግዳዴ?

ካታማታ ግዶን ካዎ ግድዳራ

ሀእ ዋናዳ አይለ ግዳዴ?

2ቃማ ይባታ ዬሆ ዬካሸ አቃዉሱ፤

አፉ እ አይፈ ካረራ ዱገ ዎስ።

ካሰ እዮ ዶሰይሳታፐ

ሀእ እዮ ምንያ እሶይካ ባዋ።

እ ላገት እዮ አድ እምዶሶና፤

እዉ ሞርከ ግድዶሶና።

3ይሁድ ናቀታዳ፤ አይለታዳ ድኤታሱ፤

ሀእ ካዎተታ ግዶን ደአዉሱ፤

ሽን ሸምፖ በሲ ደማቡኩ።

እያ መቶታዳ ደእሽን፥

የደይሳት እዮ ደምዶሶና።

4ላይ ባኣለ ቦንቻናዉ ያ አስ ባይና ግሾ፥

ፅዮነ ኦገት ዬኮሶና።

እ ድርሳ ፐንገት ባይሳትዶሶና፤

እ ካህነት ኦሎሶና።

ያን ደእያ ጌላኦ ናይት ኡንኤትዶሶና፤

እያካ ኡንኤታዳ ዬካዉሱ።

5እ ሞርከት እዉ ጎዳ ግድዶሶና፤

ኤንታዉ እንጀትን ደእዶሶና።

እ፥ ናጋራ ጋሶን ጎዳይ እዮ ኡንኤስ፤

እ ናይት ሞርከታን ድኤትድ ብዶሶና።

6ፅዮን ቦንቾይ ኢፐ ቃረትስ፤

እ፥ ሀላቃትካ ምያ በሲ ይዳ ጋራዳ ሀንዶሶና፤

ኤንቲ ዎልቃ ይድ

ባንታና የደይሳታ ስንፈ ባቃትዶሶና።

7የሩሳላመይ ባ መቱዋነ ባ ኡንአ ጋላሳን፥

በን ባ ቦንቾ ሻሉዋ ሀሳያዉሱ።

እ፥ አሳይ ሞርከታ ኩሸን አድ እመትዳ ዎደ፥

እዮ ማድያ እሶይካ በንትቤና።

እ ሞርከት እዮ ፄልድ፥

እ ዩዋን ሚጭዶሶና።

8የሩሳላመይ ግታ ናጋራ ኦዳ ግሾ ቱናሱ፤

እዮ ቦንችዳ ኡባይ እ ካሉዋ በእዳ ግሾ ካስ፤

እያ ኦላሸ ጉየ ስማሱ።

9ቱናተ እ አፍላ ቦላ በንትስ፤

ስንፈ ባ ቦላ ያናባ ቆፓቡኩ።

እ ኩንደይ ዳጋንያባ ግድስ፤

እዮ ምንያ ኦንካ ባዋ።

እያ፥ “አቤት ጎዳዉ፥ ታ ኡንኤተ በአ!

ታ ሞርከት ታና ፆንዶሶና” ያጋሱ።

10ሞርከት እ ቦንቾ ሻሉዋ ቦንቅዶሶና፤

ካሰ ነ ማባራ ግዶ ገሎና መላ፥

ኔኒ ድግዳ አሳት፥ እ ኬ ገልሽን በአሱ።

11እ አሳት ኮሻትድ ካ ደማናዉ ኦሎሶና፤

ኤንቲ ደኦን ዳናዉ ባንታ ሻሉዋ ካን ላሞሶና።

የሩሳላመይ ሀይሳዳ ያጋሱ፤

አቤት ጎዳዉ፥ ታና ፄላ፤

ታ ካዉሻተ በአ!

12ህንተኖ፥ ሀይሳራ አይሳቶ፥

ሀይስ ህንተዉ አይኮካ ዳነኔ?

አነ በእተ፤ አኬክተ፤

ባ ኤፅያ ሀንቆ ጋላሳን፥

ፆሳይ ታ ቦላ ኤህዳ

መቱዋ መላ መቶይ ደኢ?

13ቦላፈ ታማ ዱገ የድስ፤

ሄ ታማይ ታ መቀ ግዶ ገልስ።

ታ ቶሆይ ፅሄን ኦይከትስ፤ ታና ጉየ ዛርስ፤

ታና ጋላስ ኡባ ላባንድ የግ አግስ።

14ታ ኦዳ ናጋራ ኡባ ሺሽ ቃችድ፥

ቃምባራዳ ታ ጋናን ዎስ፤

ያትድ ታ ዎልቃ ዉርስስ።

ታ ኤቀታናዉ ዳንዳኦና አሳስ፥

ታና አድ እሚስ።

15ጎዳይ ታ ግዶን ደእያ

ዎልቃማ ኦላንቾታ ኡባ ድግስ።

ታ ያላጋታ ይሳናዉ ዎደ ቃችስ፤

ዎይነ የይሳዳ፥

ጎዳይ ይሁዳ ጌላኦታ የስ።

16ታኒ ዬካሸ ታ አፉ ጉሰይ ሄሳሳ፤

ታና ምንይነ ካትስያ ኦንካ ባዋ፤

ሞርከይ ጎብን፥ ታ ናይት ኡንኤትዶሶና።

17ፅዮነይ ባ ኩሽያ ምጫሱ፤

ሽን እዮ ምንያ ኦንካ ባዋ።

እ ዩሹዋን ደኤይሳት

እዮ ሞርካናዳ ጎዳይ ኦስ።

የሩሳላመይ ኤንታ ግዶን ቱና ግዳሱ።

18እያ ሀይሳዳ ያጋሱ፤ “ጎዳይ ፅሎ፤

እያ ኪተቶና እፅዳይ ታና።

ህንተኖ፥ አሳቶ ኡባይ ስእተ፤ ታ መቱዋካ በእተ፤

ታ ፓንትነ ታ ጌላኦት ድኤትዶሶና።

19ታ ላገታ ፄጋስ፤ ሽን ኤንቲ ታና ጭምዶሶና፤

ካህነትነ ጭማት ባንታ ሸምፑዋ አሻናዉ፥

ካ ኮይሸ ካታማ ግዶን ሀይቅዶሶና።

20አቤት ጎዳዉ፥ ታ ዋይያ በአ!

ታ ጋርሳይ ዳጋምስ።

ታኒ ዳሮ ማካልዳ ግሾ፥ ታ ዎዛናይ መቅስ፤

ካረን ማሽ ዉርሴስ፤ ሶን ሀይቆይ ደኤስ።

21አሳይ ታ ዘለልሳ ስእዶሶና፤

ሽን ታና ምንያ እስ አስካ ባዋ።

ታ ሞርከት ታ መቱዋ ስእዶሶና፤

ነ ታ ቦላ ኦዳባን ኡፋይትዶሶና።

ኤንቲ ታዳ ሀናና መላ፥

ኤንታ ቦላ ነ አዋጅዳ ጋላሳ ኤሀ!

22ኤንታ ኢታተ ኡባይ ነ ስን ጋኮ፤

ታ ናጋራ ግሾ ታና ሴርዳይሳዳ ኤንታካ ሴራ፤

ታ ዘለልሳይ ዳርስ፤ ታ ዎዛናይካ መቅስ።”