ምላልሳ 3

ፆሳይ አማንስ

1ጎዳ ሸነ ፃምአን

መቶ በእዳ አስ ታና።

2ታና ባ ስንፈ ከስድ፥

ፖኦይ ባይና ማን ዎስ።

3ጋላስ ኩመ ታና ሾጫናዉ

ዛር ዛር ባ ኩሽያ ደንስ።

4እ፥ ታ ጋልባነ ታ አሹዋ ጭምስስ፤

ታ መቀ መንስ።

5እ፥ ታ ዩሹዋ መቶንነ

ዳቡራን ድርስ።

6በን ሀይቅዳ አሳዳ

ታና ማን ዎስ።

7ታ ከሳ ኤኮና መላ፥

ታ ዩሹዋ ድርስ፤

ዴፆ ዱን ታና ዱፅስ።

8ታኒ ማደ ኮያዳ እያ ፄግን፥

እያኮ ዋስን፥ ታና ስኦና እፅስ።

9ታ ኦግያ ዎልቃማ ሹቻን ጎርድስ፤

ታ ኦግያ ጌላይስ።

10እ፥ ታዉ ዙግድ ናግያ ባባን መላ፥

ቆሰትድ ናግያ ጋሞ መላ ግድስ።

11እ፥ ታና ታ ኦግያፐ ከስድ ዱሰረስ፤

ታና አስ ባይና በሳን የግ አግስ።

12ባ ዶንግያ ዳፍድ፥

ታና ዱካናዉ ማልስ።

13ባ ዶንግያ ዳፍድ፥

ታ ዎዛና አይፈን ጫድስ።

14ታኒ አሳ ኡባስ ሚቻስ አታስ፤

ጋላስ ኩመ ቦረ የስ ግዳስ።

15እ፥ ታና መቶን ጫምስስ፤

ጫሞ ጎዳረ ኡ ታና ኡሽድ ካልስስ።

16እ፥ ታ አቻ አጨን መንስ፤

ታና ባናን የስ።

17ሳሮይ ታፐ ሃክስ፤

ታኒ እንጀ ዱሱ ዶጋስ።

18ሄሳ ግሾ፥

“ታ ዎልቃይ ታፐ ኤከትስ፤

ታኒ ጎዳን ዎዳ ኡፋይሳ ኡባይ ይስ”

ያጋስ።

19ታ መቱዋነ ታ ኡንኣ ሀሳይን ደኦይ ታና ጫምስ።

20ታ ሄሳ ኩመ ዶግከ፤ ታ ሸምፖይ አዛኔስ።

21ግዶሽን፥ ታ እስባ ታ ዎዛናን ቆፕያ ዎደ ታ ኡፋይሳን ኩማይስ።

22ሄስካ፥ ኑኒ ይቦናይ

ጎዳ ሲቁዋፐ ደንዶይሳና፤

እያ ቃይ ዉር ኤረና።

23ኤንቲ ዎንታ ዎንታ ኦራ፤

ነ ዳሮ አማንሳ።

24ጎዳይ ታ ሳማ፤

ሄሳ ግሾ፥ ታ እያን ኡፋይስ ዎና።

25እያን ባንታ ኡፋይሳ ዎይሳታስነ

እያ ኮየይሳታስ ጎዳይ ሎኦ።

26አስ ስእ ግድ ጎዳ አቶተን ናግኮ ሎኦ።

27አስ ባ ናአተን መቶ ዳንዳአ ታማርኮ ሎኦ።

28ጎዳይ መቶ ኤህያ ዎደ ስእ ግድ ኡቶ።

29እያዉ ስንፈ ኡፋይስ ዳናዉ ዳንዳእያ ግሾ ባና ዝቅ ኦ።

30እ ባ ሻካላ ባቀይሳስ እሞ፤ ጫሸ ካሎ።

31ጎዳይ አሰ መርናዉ የገና።

32እ አሳ ቦላ መቶ ኤህኮካ፥

ባ መርና ሲቁዋ ዳሮተን ዛሪድ ቃቴስ።

33እ አሳ ቦላ መቶ ዎይኮ ኡንአ ኤህድ ኡፋይተና።

34ብታን ደኢያ ቃሾ አሳታ የያ ዎደ፥

35ኡባፈ ዎልቃማ ፆሳ ስንን አሳ ማት የትያ ዎደ፥

36ፅሎ ፕርድ ይያ ዎደ ጎዳይ ሄሳ ኡባ በኤነዬ?

37ጎዳይ ኪቶናሽን ኦድድ ፖልሳናዉ ዳንዳኤይ ኦኔ?

38ኢታባ ግድን ሎኦባ ኦድ ፖለይ ኡባፈ ቃ ፆሳ ግደነዬ?

39ያትን፥ አስ ደኦን ደእሸ ባ ናጋራ ግሾ ሴረትያ ዎደ አይስ ዙዙሚ?

40አነ ኑ ኦግያ ፓጮስ፤ ጎዳኮ ስሞስ።

41ኑ ዎዛና ኑ ኩሽያራ ሳሎን ደእያ ፆሳኮ ደንድ ሀይሳዳ ያጎስ፦

42ኑ ነና ናቅዳ፤ ነዉ ማካልዳ፤

ነካ ኑስ አቶ ጋባካ።

43ነ ሀንቁዋን ካመታዳ ኑና የደዳ፤

ነ ኑስ ቃቶና ኑና ዎዳሳ።

44ኑ ዎሳይ ኔኮ ጋኮናዳ፥ ነናተ ሻራን ካማዳሳ።

45አሳ ግዶን ኑና ፕቶነ ቡረ ኦዳሳ።

46ኑ ሞርከት ኡባይ ኑ ቦላ ባንታ ዶና ዶይዶሶና።

47ኑ ዳጋማንነ ግተን ገልዳ፤ መቶንነ ኡንአን ላለትዳ።

48ታ አሳ ጋክዳ ዋይያ ጋሶን ታ አይፈፐ አፉ ሻፋዳ ጎጌስ።

49ታ አይፈይ አጎና አፉፄስ።

50ጎዳይ ሳሎፐ ዱገ በአና ጋካናዉ ሄስ ሀኔስ።

51ታ ካታማን ደእያ ማጫሳታ ቦላ ጋክዳባ ታ አይፈይ በእዳ ዎደ ታ ዎዛናይ አዛንስ።

52ጮ ታና ሞርከይሳት ካፎ ሻንካትያዳ ታና ሻንካትዶሶና።

53ታ ፓፃ ደእሽን ታና ኦላን የግድ፥

ኦላ ዶና ሹቻን ጎርድዶሶና።

54ሃ ኩምድ ታ ሁጰራ ጎግያ ዎደ ታ ያስ ጋዳ ቆፓስ።

55አቤት ጎዳዉ፥ ታ ጪሞ ኦላን ደአሸ ነ ሱን ፄጋስ።

56ታ ዋሱዋ ስአናዳ ታ ነና ዎስያ ዎደ ታና ስአዳሳ።

57ታኒ ነና ፄግዳ ዎደ ታኮ ሺቃዳ፥ “ባቦፋ” ያጋዳሳ።

58አቤት ጎዳዉ ነ ታ ሞቱዋ ሞተታዳ ታና ዎዛዳሳ።

59አቤት ጎዳዉ፥ ነ ታ ኡንኣ በአዳሳ፤

ሄሳ ግሾ፥ ነ ታዉ ፕርዳ።

60ኤንቲ ሀሎ ከያናዉ ታ ቦላ ማቀትያ ማቁዋ ኡባ በአዳሳ።

61አቤት ጎዳዉ፥ ኤንቲ ታና ጫይያ ጫሻነ

ታ ቦላ ማቀትያ ማቁዋ ኡባ ስአዳሳ።

62ታ ሞርከት ጋላስ ኩመ

ታ ቦላ ዙዙመይሳነ ካልካሸይሳ ስአዳሳ።

63ኤንቲ ኡትሸነ ኤቅሸ ታና ቦርድ የፆሶና።

64አቤት ጎዳዉ፥ ኤንቲ ኦዳ ኦሱዋስ በሲያ ዛሩዋ ኤንታዉ ቃንፃ!

65ኤንታ ዎዛና ኤይሳ፤ ነ ባደይ ኤንታ ጋኮ።

66አቤት ጎዳዉ፥ ነ ኤንታ ነ ሀንቁዋን የደ፤

ሳሎፐ ጋርሳን ኤንታ ይሳ።