ጌሻ ማፃፋ
አይሰይሳታ 11
ጋላዳ ቢታን ደእያ ዮፍታሄይ ምኖ ኦላንቾ። እያ አዋ ሱንይ ጋላዳ፤ ሽን እያ አይያ ላይማ ማጫስ። ጋላዳ ማችያ እያዉ አደ ናይታ የላሱ። ኤንቲ ድጭድ ጋክዳ ዎደ ባንታ እሻ ዮፍታሄ፥ “ኔኒ ሀራ ማጫሳፐ የለትዳ ናአ ግድያ ግሾ ኑ አዋ አቁዋፐ አይኮካ ላታካ” ያግድ ሶፐ የደዶሶና። ያትን፥ ዮፍታሄይ ባ እሻታፐ ባቃትድ፥ ቶባ ቢታን ደእስ። ያን እ ደእሽን ጉ ዎራንት እያኮ ሺቅድ እያ ካልዶሶና።
ጉ ዎደፐ ጉየ አሞነት እስራኤለታራ ኦለትዶሶና። አሞነት እስራኤለታራ ኦለትዳ ዎደ ጋላዳ ቢታ ጭማት ቶባፐ ዮፍታሄ ዛሪድ ኤሀናዉ ብዶሶና። ኤንቲ እያኮ፥ “አሞነታ ኑኒ ኦላና መላ ያዳ ኑስ ሀላቃ ግዳ” ያግዶሶና።
ሽን ዮፍታሄይ፥ “ታና እፅድ፥ ታ አዋ ኬፈ የደቤከቲ? ሀእ ህንተና መቶይ ጋክን ታኮ አይስ ይደቲ?” ያግስ።
ጋላዳ ጭማት፥ “ግዶሽን ሀእ ኑኒ ኔኮ ስምዳ፤ ኔኒ ኦላ ካለዳ አሞነታ ኑስ ኦላና መላነ ጋላዳ ቢታስ ሀላቃ ግዳና መላ ኮዮስ” ያግዶሶና።
ዮፍታሄይ፥ “አሞነታራ ኦለታና መላ ህንተ ታና ጉየ ዛርን፥ ጎዳይ ኤንታ ታ ኩሸን አድ እምኮ፥ ህንተ ቱማ ታና ሀላቃ ኦኔ?” ያግስ።
ጋላዳ ጭማት፥ “ጎዳይ ኑ ግዶን ማርካ፤ ኔኒ ግያባ ኑ ኦና” ያግዶሶና። ዮፍታሄይ ጋላዳ ጭማታራ ብስ፤ ኤንቲ እያ ባንታ ሀላቃነ ካለይሳ ኦዶሶና። ዮፍታሄይ ምፅጳን ጎዳ ስንን ዛሪድ ቃላ ገልስ።
ዮፍታሄይ አሞነ ካዋኮ አሰ ኪትድ፥ “ኔኒ ኑ ቢታ ኦላና መላ ኑኒ ነዉ አይ ኦዶ?” ያግድ ኦይችስ።
አሞነ ካዎይ ዮፍታሄይ ኪትዳ አሳኮ፥ “እስራኤለ አሳይ ግብፀፈ ከይዳ ዎደ አርኖና ሻፋፐነ ያቦቃ ሻፋፐ ግዶን፥ ዮርዳኖሰ ሻፋ ጋካናዉ ደእያ ታ ቢታ ኤክዶሶና። ሀእ ታ ቢታ ታዉ ሳሮን ዛርተ” ያግድ ዛርስ።
ዮፍታሄይ ናምአን አሞነ ካዋኮ አሰ ኪትስ። ኪተትዳ አሳይ፥ “እስራኤለ አሳይ ሞአበ ቢታ ዎይኮ አሞነ ቢታ ኤክቤና። እስራኤለ አሳይ ግብፀፈ ከይዳ ዎደ ባዞ ካን ብድ፥ ዞኦ አባ ጋክስ፤ ያፐ ቃደሳ ብስ። እስራኤለ አሳይ ኤዶመ ካዋኮ፥ ‘ነ ቢታራ ኑና አርኪ?’ ያግድ አሰ ኪትስ፤ ሽን ኤዶመ ካዎይ አና እፅስ። ሄሳዳካ፥ ሞአበ ካዋኮ ኪትን፥ እካ አና እፅስ፤ ያትን፥ እስራኤለ አሳይ ቃደሳን ጋምእስ።
“ዉርሰን ኤንቲ ባዙዋ ካንድ፥ ኤዶመነ ሞአበ ቢታ ጋፃ ኦይክድ፥ ሞአበ ቢታፈ ዶሎሀ ባጋራ ይድ አርኖና ሻፋፐ ሄፍን ባጋን ዱንካንዶሶና። ሽን አርኖና ሻፋይ ሞአበ ዛዋ ግድዳ ግሾ ሞአበ ባጋ ፕንቦኮና።
“ሄሳፈ ጉየ፥ እስራኤለ አሳይ ሀሰቦና ካታማን ደእያ አሞረታ ካዋ ስሆናኮ አሰ ኪትድ፥ ‘ሀያና፥ ነ ቢታራ ኑና አርክ’ ያግድ ኦይችስ። ሽን ስሆነይ እስራኤለ አሳ አማነቶና ግሾ አናዉ ኮይቤና። እ ባ ኦላንቾታ ኤክድ ያሃፃን ዱንካንድ እስራኤለ አሳ ኦልስ። ጎዳይ እስራኤለ ፆሳይ ስሆናነ እያ ኦላንቾታ እስራኤለ አሳ ኩሸን አድ እምን፥ ኤንታ ፆንዶሶና። ያን ደእያ አሞረታ ቢታ ኡባ ላትዶሶና። አርኖና ሻፋፐ ብድ ያቦቃ ሻፋ ጋካናዉ፥ ባዙዋፈ ብድ ዮርዳኖሰ ሻፋ ጋካናዉ ደእያ አሞረታ ቢታ ኡባ ኤክዶሶና።
“ሄሳዳ ኦድ ጎዳይ፥ እስራኤለ ፆሳይ ባ አሳ እስራኤለ ስንፈ አሞረታ የደድ ይስስ። ያትን፥ ኔኒ ዛራዳ ነዉ ኤካናዉ ዋታ ቆፓይ? ኔኒ ነ ፆሳይ ካሞሽ ነዉ እመይሳ ኤክኪ? ሽን ኑኒ፥ ጎዳይ ኑ ፆሳይ ኑስ እምዳባ ኡባ ላትድ ዳና። ግዶሽን ኔኒ ስፎራ ናኣ፥ ሞአበ ካዋ ባላቃፐ ምናይ? እ እስራኤለ አሳራ ኦየትደ ዎይኮ ኦለትዴ? እስራኤለ አሳይ ሀሰቦና፥ አሮኤራነ ኤንታ ዩሹዋን ደእያ ጉታታ ኡባ፥ ቃስ አርኖና ሻፋ ማታን ደእያ ካታማታ ኡባ ላትድ ሄ ፄቱ ላይ ደእስ። ያትን፥ ሄ ዎደ አይስ ዎ ኤካብኪ? ታኒ ህንተና አይኮካ ቆሀብከ፤ ሽን ታና ኦላናዉ ደንዳዳ ናቀይ ነና። ፕርድያ ጎዳይ ሀች እስራኤለፐነ አሞነፐ ግዶን ፕርዶ” ያግስ።
ሽን ዮፍታሄይ ኪትዳ ኪታ አሞነታ ካዎይ ስኦና እፅስ።
ሄ ዎደ ጎዳ አያናይ ዮፍታሄ ቦላ ዎን፥ ጋላዳነ ምናሰ ቢታ ካን ብድ፥ ጋላዳ ቢታን ደእያ ምፅጳ ስምስ። ያፐ ኦላንቾታ ካለድ አሞነ ቢታ ብስ። ዮፍታሄይ ጎዳስ ቃንገትድ፥ “ኔኒ አሞነታ ታ ኩሸን አዳ እምኮ፥ ታኒ ኦላ ፆናዳ ሶ ስምያ ዎደ ታና ሞካናዉ ታ ሶፐ ከይያ አይብካ ኔሳ፤ ታኒ እያ ፁግያ ያርሾ ኦዳ ነዉ ሺሻና” ያግስ።
ሄሳፈ ጉየ፥ ዮፍታሄይ አሞነታ ኦላናዉ ዛዋ ብን፥ ጎዳይ ኤንታ እያ ኩሸን አድ እሚስ። አሮኤራፐ ብድ ምንታነ አቤል-ክራምማ ጋካናዉ ደእያ ላታሙ ካታማታ ኦልድ ይስስ፤ ዳሮ አሳ ዎስ። ሄሳፈ ጉየ፥ አሞነት እስራኤለታስ ሃረትዶሶና።
ዮፍታሄይ ባ ሶ ምፅጳ ስምያ ዎደ እያ ናእያ ካራቦ ኦይካዳ የፃሸነ ዱራሸ እያ ሞካናዉ ከያሱ። እያዉ ኢፐ አትሽን፥ ሀራ ናእ ባዋ። እ እዮ በእዳ ዎደ አዛንድ ባ ማኡዋ ዳክድ፥ “ሀይ ታ ናተ! ታና ካዉሻዳሳ፤ ታና መቶን የጋዳሳ። ታኒ ጎዳስ ቃንጋስ፤ ጋና አጋናዉ ዳንዳእከ” ያግስ።
ናእያ፥ “ታ አዋዉ፥ ኔኒ ጎዳስ ቃንግዳባ ግድኮ፥ ጎዳይ ነ ሞርከታ፥ አሞነታ ቦላ ኔኒ ሀሎ ከይዳ ግሾ ነ ቃንግዳባ ታ ቦላ ፖላ” ያጋሱ። ሽን እያ ባ አዋኮ፥ “ታዉ እስባ ኦርክ። ታኒ አዝና ገሎና አትያ ግሾ፥ ታ ላገታራ ባዳ ዙማ ቦላ ታ ጌላኦተስ ዬካና መላ ናምኡ አጌናስ ታና የዳርክ” ያጋዳ ኦይቻሱ።
እ፥ “ባ” ያግድ፥ ናምኡ አጌናስ እዮ የድስ። እያ ባ ላገታራ ዙማ ቦላ ከያዳ ባ ጌላኦተስ ኤንታራ ዬካሱ። ናምኡ አጌናፐ ጉየ፥ ባ አዋኮ ስማዳ ያሱ። እ አዋይ ጎዳስ ቃንግዳ ባ ቃንገ ጋስ፤ እያ ጌላኦሽን ሀይቃሱ።
ሄ ዎደፐ ዶምድ፥ እስራኤለ ማጫ ናይት ላይን ላይን ኦይዱ ጋላስ ባንታ ሶፐ ሃክ ብድ፥ ጋላዳ አድያ ዮፍታሄ ናኤስ ዬከይስነ ካዮተይስ ሜዘ ግድስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.