ጌሻ ማፃፋ
እያሱ 9
ጋባኦናታ ጭሙዋ
ዮርዳኖሰ ሻፋፐ ዉሎሀ ባጋን ደረይ ዳርያ ቢታንነ ጋን መደትራነ አባፈ ብድ ልባኖሰ ጋካናዉ ደእያ ህተታ፥ አሞረታ፥ ካናነታ፥ ፓርዘታ፥ ህወታነ ያቡሰታ ካዎት ኡባይ፥ ጋየ አሳይ ፆነትዳይሳ ስእዳ ዎደ፥ እያሱነ እስራኤለታ ኦላናዉ እስፈ ሺቅድ ዞረትዶሶና።
ጋባኦና አሳይ እያሱይ እያርኮ ቦላነ ጋየ ካታማ ቦላ ኦዳባ ስእድ፥ እያሱ ጭማናዉ ኮይዶሶና። ኤንቲ ሽንቀ ቃችድ፥ ጭማ ዎይነ ኦጎሮነ ጩርቃ ቃርፂቴ ሀረ ቦላ ጫንድ፥ እያሱኮ አሰ ኪትዶሶና። ኪተትዳ አሳት ዉርዳ ጫማ አዶሶና፤ ፔትዳ አፍላ ማእዶሶና፤ ኤንቲ ኦይክዳ ሽንቀይካ መልዳባነ መቀርትዳባ። ኤንቲ እስራኤለ አሳይ ዱንካንዳ ጉታ ጋልጋላ ብድ፥ እያሱኮነ እስራኤለ አሳኮ፥ “ኑኒ ሃሆ ጋደፐ ይዳ። ኑ ይዳይ ህንተራ ጫቀትድ ሳሮ ዳናሳ” ያግዶሶና።
ያትን፥ እስራኤለ አሳይ ጋባኦነ አሳኮ፥ “ህንተ ኑ ማታን ደእያ አሰኮሽ? ኑ አይብን ኤርድ ህንተራ ጫቀታኔ?” ያግዶሶና።
ኤንቲ እያሱኮ፥ “ኑ ነ አይለታ” ያግድ ዛርዶሶና።
እያሱይ ዛሪድ፥ “ህንተ ኦናንቴ? አዉፐ ይደቲ?” ያግድ ኦይችስ።
ኤንቲ ዛሪድ፥ “ኑኒ ነ አይለት ጎዳይ ህንተ ፆሳይ ግብፀን ኦዳይሳ ስእዳ ግሾ፥ ዳሮ ሃሆ ጋደፐ ይዳ። ቃስ ዮርዳኖሰ ሻፋፐ ሄፍንን ዉሎሀ ባጋን ደእያ ናምኡ አሞረ ካዎታ፥ ሀሰቦና ካዋ ስሆናነ አስታሮተን ደእያ ባሳነ ካዋ ኦገ ቦላ እ ኦዳይሳ ኑ ስእዳ። ኑ ቢታ ጭማትነ ኑ ቢታን ደእያ ኡባይ፥ ኦገስ ሽንቀ ጊግስ ኦይክድ ብድ ኤንታራ ጋሄትድ፥ ኤንታኮ፥ ‘ኑ ህንተ አይለታ፤ ኑ ይዳይ ህንተራ ጫቀትድ ሳሮ ዳናሳ’ ያግተ።
“ኑ ኦይክዳ ሽንቅያ በእተ። ኑ ሶፐ ኤክድ ከይያ ዎደ ሆኦ፥ ሽን ሀእ መልዳይሳነ ፑሉምዳይሳ በእተ። ሀ ዎይንያ ኦጎሮታን ኑ ኩንያ ዎደ ኦራ፥ ሽን ሀእ ዳከትዳይሳ በእተ። ኦግያ ሃሆተፈ ደንዶይሳን ኑ ማኦይነ ኑ ጫማይ ዉርስ” ያግዶሶና። ሽን ጎዳ ሸንያ ኦይቾና ደእሸ፥ እስራኤለ አሳይ ኤንታ ሽንቅያፈ ጉራ ኤክዶሶና። ያትን፥ እያሱይ ህንተና ዎኮ ግድ ሳሮ ጫቆ ኤንታራ ጫቀትስ። እስራኤለ ጭማትካ ሄ ጫቁዋ መንኮ ግድ ጫቅዶሶና።
ኤንታራ ጫቅዳ ሄን ጋላሳን ሄ አሳት ኤንታ ቢታን ደኤይሳነ ኤንታዉ ሾሮ ግደይሳ እስራኤለ አሳይ ስእዶሶና። እስራኤለ አሳይ ሄ ጋላስ ሄመትድ፥ ሄ አሳት ደእያ ካታማታ ጋክዶሶና። ኤንታ ካታማት ጋባኦና፥ ካፍራ፥ ባሮተነ ቅርያት-ይኣርማ ጌተትድ ፄገቶሶና። ሽን እስራኤለ ጭማት ኤንታዉ ጎዳ፥ እስራኤለ ፆሳ ሱንን ጫቅዳ ግሾ፥ እስራኤለ አሳይ ኤንታ ዎቦኮና። ያትን፥ አሳ ኡባይ ጭማታ ቦላ ዙዙምዶሶና። ሽን እስራኤለ ጭማት፥ “ኑ ኤንታዉ ጎዳ እስራኤለ ፆሳ ሱንን ጫቅዳ ግሾ፥ ሀእ ኤንታ ቦቻናዉ ዳንዳኦኮ። ኑኒ ኤንታዉ ሀይሳዳ ኦና፤ ኑኒ ኤንታዉ ጫቅዳ ጫቁዋ መንን ጎዳ ሀንቆይ ኑ ቦላ ዮናዳ ኤንታ ዎኮ። ኤንቲ ደኦ ጊተ። ግዶሽን እስራኤለ አሳ ኡባስ ምነ ሃ ሺሸይሳታ ግዶ” ያግዶሶና። ሄሳ ግሾ፥ ጭማት ባንታ ጫቁዋ ናግዶሶና።
እያሱይ ጋባኦና አሳ ፄግድ፥ “ኑ ማታን ደእሸ፥ ‘ኑኒ ዳሮ ሃሆ ቢታፈ ይዳ’ ግድ፥ ኑና አይስ ጭምደቲ? ህንተ ሄሳ ኦዳ ግሾ፥ ባደትዳይሳታ። ህንተ መርናዉ ታ ፆሳ ኬን ምነ ሃ ሺሽያ አይለ ግዳና” ያግስ።
ኤንቲ ዛሪድ፥ “ኑኒ ነ አይለት፥ ጎዳይ ህንተ ፆሳይ ሀ ቢታን ደእያ አሳ ኡባ ይስድ፥ ቢታ ህንተዉ እማናዉ ባ አይልያ ሙሰስ ኦድዳይሳ ስእዳ። ሄሳ ግሾ፥ ህንተዉ ባብድ ሀይሳ ኦዳ። ሀእ ኑኒ ነ ኩሸን ደኦስ። ነዉ ሎኦነ ሱረ ዳንድ በንትዳባ ኦ” ግድ ዛርዶሶና። እያሱይ እስራኤለ አሳይ ኤንታ ዎና መላ አሽስ። ሄ ጋላስ እያሱይ፥ ጋባኦና አሳታ እስራኤለታስነ ጎዳይ ዶርዳ በሳን ደእያ እያ ያርሾ በሳስ ሃነ ም ሺሽያ አስ ግዳና መላ ኦስ። ጋባኦና አሳት ሀች ጋካናዉ ሄሳ ኦሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.