እያሱ 10

አው ኤቅስ

1እያሱይ እያርኮ ካታማ ኦል ይስድ፥ እያ ካዋ ዎዳይሳዳ፥ ጋየ ካታማ ኦል ይስድ፥ እያ ካዋ ዎዳይሳ የሩሳላመ ካዎይ አዶን-ፀደቅ ስእስ። ቃስ ጋባኦና አሳይ እስራኤለ አሳራ ሳሮ ዳናዉ ጫቀትዳይሳ ስእስ። 2ጋባኦን ሀንኮ ካዎ ካታማታዳ ግታ ካታማ፤ ሄ ካታማይ ጋየ ካታማፐ አስ፤ እያን ደእያ አደትካ ምኖ ኦላንቾ ግደይሳ ኤርያ ግሾ፥ አዶንፀደቅነ እያ አሳይ ዳሮ ያይዶሶና። 3ሄሳ ግሾ፥ የሩሳላመ ካዎይ አዶን-ፀደቅ፥ ከብሮና ካዋ ሆሀማስ፥ ያርሙታ ካዋ ፕራማስ፥ ላክሶ ካዋ ያፍአስነ፥ ኤግሎና ካዋ ዳብራስ ሀይሳዳ ያግድ ኪትስ፤ 4“ጋባኦና አሳይ እያሱራነ እስራኤለ አሳራ ሳሮ ደአናዉ ጫቅዳ ግሾ፥ ኤንታ ኦላናዉ ይድ ታና ማድተ” ያግስ። 5ሀ እቻሹ አሞረ ካዎት ባንታ ኦላንቾታ እስፈ ጋድ፥ ጋባኦና ኦልዶሶና።

6ጋባኦና አሳይ ጋልጋላን ዱንካንዳ እያሱኮ፥ “ኑና ነ አይለታ አጎፋ፤ ኤለሳ ያዳ ኑና አሻ። ደረይ ዳርያ ቢታን ደእያ አሞረ ካዎት ኡባይ ኑና ኦላናዉ ባንታ ኦላንቾታ እስኖ ኦዳ ግሾ፥ ነ ኑና ማዳ” ያግድ ኪትዶሶና።

7ሄሳ ግሾ፥ እያሱይ፥ ባራ ደእያ ኦላንቾታነ ምኖ አሳታ ኡባ፥ ጋልጋላፐ ኤክድ ብስ። 8ጎዳይ እያሱኮ፥ “ኤንታዉ ባቦፋ፤ ታኒ ኤንታ ነ ኩሸን አዳ እማስ። ኤንታፈ እስ አስካ ኔራ ኤቀታናዉ ዳንዳኤና” ያግስ። 9እያሱይ ጋልጋላፐ ቃማ ኩመ ሄመትሸ አቅድ፥ ጋባኦነ አሳይ ቆፖና ደእሽን ኤንታ ቦላ ኦላ ደንስ። 10ጎዳይ እስራኤለ አሳ ስንን ኤንታዉ ዎዛና ካሀ ይስስ። እስራኤለ አሳይ ኤንታ ጋባኦናን ዎዶሶና። እስራኤለት ኤንታ ቤት-ሆሮና ኤፍያ ኦግያ ኦይድ ጎድሸ፥ አዜቃነ ማቀዳ ጋካናዉ ጎድዶሶና። 11ኤንቲ ቤት-ሆሮናፐ ዱገ አዜቃ ኤፍያ ኦግያራ እስራኤለ አሳ ስንፈ ባቃትሽን፥ ጎዳይ ግታ ሻቻ ሹቹ ሳሎፐ ኤንታ ቦላ ቡክስስ። እስራኤለ አሳይ ዎዳ አሳፐ፥ ሻቻይ ዎዳ አሳይ ዳሮ።

12ጎዳይ እስራኤለ አሳስ አሞረታ፥ አድ እምዳ ጋላስ፥ እስራኤለ አሳይ ስእሽን፥ እያሱይ፥

“አዋይ ጋባኦና ቦላ ዉሎና ኤቆ።

አጌናይካ ኤሎና ዛንጋራ ቦላ ኤቆ”

ያግድ ጎዳ ዎስስ።

13እስራኤለ አሳይ ባንታ ሞርከታ ፆናና ጋካናዉ፥ አዋይ ዉሎና ኤቅስ፤ አጌናይካ ባ ደእያ በሳፈ ቃፅቤና።

ሄስ ያሻራ ማፃፋን ፃፈትስ። አዋይ ሳሎስ ግዶን ቃፆና ኤቅስ፤ እስ ጋላስ ኩመ አዋይ ዉሎና ጋምእስ። 14ጎዳይ አሳ ቃላ ስእዳ ሄ ጋላሳ መላ ጋላስ ሀይሳፈ ካሰካ ሀይሳፈ ስንንካ ዴና። ቱማካ ጎዳይ እስራኤለ አሳስ ኦለትስ። 15ሄሳፈ ጉየ፥ እያሱይነ እያ ኦላንቾት ባንታ ዱንካንዳ ጉታ ጋልጋላ ስምዶሶና።

እቻሹ አሞረ ካዎታ ሀይቁዋ

16ሄ እቻሹ አሞረ ካዎት ባቃትድ፥ ማቀዳ ጎንጎሉዋን ቆሰትዶሶና። 17እቻሹ ካዎት፥ ማቀዳ ጎንጎሉዋን ቆሰትድ ደእሽን ደምዳይሳ እያሱስ ኦድዶሶና።

18እያሱይ ዛሪድ፥ “ግታ ሹቻታ ጎንዶርስድ፥ ጎንጎሉዋ ዶና ጎርድተ፤ ኤንታ ናጋና መላ አሰ ያን ዎተ። 19ሽን ህንተ ያን ጋምኦፍተ፤ ኤንቲ ባንታ ካታማ ገልድ አቶና መላ ህንተ ሞርከታ ጎድድ ኤንታ ዎተ። ጎዳይ ህንተ ፆሳይ ኤንታ ህንተ ኩሸን አድ እምስ” ያግስ። 20ጉ አሳት ባቃትድ ባንታ ግምበትዳ ካታማ ገልድ አትኮካ፥ እያሱይነ እስራኤለ አሳይ አሳ ኡባ ዎዶሶና። 21ሄሳፈ ጉየ፥ እስራኤለ አሳ ኡባይ ሳሮን ስሚድ፥ እያሱይ ዱንካንድ ደእያ ጉታ ማቀዳ ይዶሶና። ሄ ዎደፐ ዶምድ ኦንካ እስራኤለ አሳ ቦላ እስ ቃላካ ኦደታናዉ ፃልዳ አስ ባዋ።

22ሄሳፈ ጉየ፥ እያሱይ፥ “ጎንጎሉዋ ዶና ዶይድ፥ ሄ እቻሹ ካዎታ ከስድ፥ ታዉ ሀ ኤክድ ዪተ” ያግስ። 23ጎንጎሉዋ ዶና ዶይድ፥ የሩሳላመ ካዋ፥ ከብሮና ካዋ፥ ያርሙታ ካዋ፥ ላክሶ ካዋነ ኤግሎና ካዋ እያኮ ኤህዶሶና። 24ኤንቲ ሄ ካዎታ እያኮ ኤህዳ ዎደ፥ እያሱይ እስራኤለ አሳ ኡባ ባኮ ፄግድ፥ ባራ ብዳ ቶራ ሞጮናታኮ፥ “ሃ ይድ፥ ህንተ ቶሁዋ ሀ ካዎታ ቆያን ዎተ” ያግስ። ኤንቲ ይድ ኪተትዳይሳዳ ኦዶሶና። 25እያሱይ ኤንታኮ፥ “ህንተ ኦለትያ ህንተ ሞርከታ ቦላ ጎዳይ ሀይሳዳ ኦና ግሾ፥ አይኮይ ባዋ ያዮፍተ፤ ምንተ” ያግስ።

26እያሱይ ሄ እቻሹ ካዎታ ዎድ፥ እቻሹ ም ቦላ ካቅስ፤ ኤንታ አሀይ ኦማርስ ጋካናዉ ያን ፔእስ። 27አው ዉልያ ዎደ እያሱይ፥ “አሀ ዎስድ፥ ኤንቲ ካሰ ቆሰትዳ ጎንጎሉዋን ሆልተ። ያትድ፥ ሄ ጎንጎሉዋ ዶና ግታ ሹቻን ጎርድተ” ያግድ ኪትስ። ሄ ሹቻት ሀች ጋካናዉ ያን ደኦሶና።

28ሄ ጋላስ እያሱይ ማቀዳ ካታማ ኦይክስ፤ ካታማ ካዋካ ዎስ፤ ካታማን ደእያ አሳ ኡባ እስ አስካ አሾና ይስስ። እያርኮ ካታማ ካዋ ቦላ ኦዳይሳዳ፥ ማቀዳ ካታማ ካዋ ቦላ ኦስ።

ዱገሀ ካታማታ ፆነተ

29ያፐ ስሚድ፥ እያሱይነ እያ ኦላንቾት ኡባይ ማቀዳፐ ብድ ልብና ካታማ ኦልዶሶና። 30ጎዳይ ሄ ካታማነ ካታማ ካዋ ኤንታ ኩሸን አድ እምስ። እያሱይ ካታማን ደእያ አሳፐ እሱዋካ አሾና ማሻን ዎስ። እያርኮ ካታማ ካዋ ቦላ ኦዳይሳዳ ልብና ካታማ ካዋ ቦላ ኦስ።

31እያሱይነ እያ ኦላንቾት ልብና ካታማፐ ላክሶ ካታማ ብድ፥ ሄ ካታማ ኦልዶሶና። 32ጎዳይ ላክሶ ካታማ እስራኤለ አሳ ኩሸን አድ እምን፥ እያሱይ ሄ ካታማ ዩሹዋ ተቅድ ናምአን ጋላሳን ኦይክስ። ልብና ካታማን ኦዳይሳዳ ላክሶ ካታማን ደእያ አሳ ኡባ ማሻን ዎስ። 33ሄ ዎደ፥ ገዘራ ካዎይ ሆራም፥ ላክሶ ካዋ ማዳናዉ ይስ፥ ሽን እያሱይ እያነ እያ ኦላንቾታ ይስስ፤ ኤንታፈ እስ አስካ አትቤና።

34ሄሳፈ ስሚድ፥ እያሱይነ እያ ኦላንቾት ኡባይ ላክሶ ካታማፐ ኤግሎና ካታማ ብድ፥ ሄ ካታማ ዩሹዋ ተቅድ ኦልዶሶና። 35ሄ ጋላስ ኤግሎና ካታማ ኦይክድ፥ ላክሶ ካታማን ኦዳይሳዳ ማሻን አሰ ኡባ ዎዶሶና።

36ያት ስሚድ፥ እያሱይነ እያ ኦላንቾት ኤግሎናፐ ከብሮና ብድ፥ ከብሮና ኦልዶሶና። 37ሄ ካታማነ እያ ዩሹዋን ደእያ ጉ ካታማታ ኦይክድ እያን ደእያ አሳነ ካዋ ዎዶሶና። እያሱይ ኤግሎናን ኦዳይሳዳ ሄ ካታማ ቦላካ ኦስ።

38ሄሳፈ ጉየ፥ እያሱይነ እያራ ደእያ እስራኤለ ኦላንቾት ጉየ ስሚድ ዳብራ ካታማ ኦልዶሶና። 39ሄ ካታማነ እያ ዩሹዋን ደእያ ጉ ጉታታ ኦይክድ፥ እያን ደእያ አሳነ ካዋ ዎዶሶና። እያሱይ ከብሮናነ ልብና ካታማታ ቦላ ኦዳይሳዳ ዳብራ ቦላ ኦስ።

40እያሱይ ሄ ቢታን ደእያ ካታማታ ኡባ ኦይክስ። ደረይ ዳርያ ቢታን፥ ነገበ ጋን፥ ሎቡዋነ ኤንታ ካዎታ ኡባ ኦይክስ። ጎዳይ እስራኤለ ፆሳይ እያ ኪትዳይሳዳ፥ ቢታ ቦላ ደእያ አስ እሱዋካ አሾና ኡባ ዎድ ይስስ። 41እያሱይ ቃደስ-ባርነፈ ብድ ጋዛ ጋካናዉ ቃስ ጎሸና ቢታፈ ብድ ጋባኦና ጋካናዉ ደእያ ኡባ ኦልድ ፆንስ። 42ጎዳይ፥ እስራኤለ ፆሳይ፥ እስራኤለታስ ኦለትዳ ግሾ እያሱይ ሀ ካዎታነ ኤንታ ቢታ ኡባ ኦልድ ኦይክስ። 43ሄሳፈ ጉየ፥ እያሱይነ እስራኤለ ኦላንቾት ባንታ ዱንካንዳ ጉታ ጋልጋላ ስምዶሶና።