እዮባ 6

እዮባ ሃሳያ

1ሄሳፈ ጉየ እዮብ ዛሪድ፥

2ታ ዋየይነ ታ አዛኖይ ኡባይ

ምዛነን ልከትድ በኤትያኮ፥

3አባ ጋፃን ደእያ ሻፍያፐ አድ ዴፃና፤

ሄሳ ግሾ፥ ታ ቃላይ ነና ማላልሰናሽን።

4ኡባ ዳንዳእያ ፆሳ ዶንገት ታና ጫድዶሶና፤

ታ አሳተይ ኤንታ ዪሻ ኡዬስ፤

ፆሳ ዳጋንይ ታ ቦላ ሳልፕስ።

5ሀረይ ዎይኮ ቦር ማት ደእሽን ዋስዬ?

6ማልኦና ካ ማፅነይ ገሎና ሜተትዬ?

ዎይኮ ጱጱለ ሃ ማልእዬ?

7ሄሳ መላ ካ ታና ሱከየና፤

ሄሳ መላ ካ ታ ሚኮ ታና ሳኬስ።

8ታ ዎሳ ፆሲ ስእያኮ አይቤ?

ታ አሙዋካ ታዉ ኩንያኮ አይቤ?

9ፆሳ ሸነ ግድን እ ታና መንረያኮ፥

እ ባ ኩሽያ የድድ ታና ይስያኮ፥

10ታ ጌሻ ፆሳ ቃላ ካዳቦና ግሾ፥

ዋየይ ዳርኮካ ኡፋይሳን ታ ጉፓና።

11ታ ፓፃ ዳናዉ ታዉ አይባ ዎልቅ ደኢ?

ታዉ አይባ ኡፋይስ ደእሽን ዳንዳእያና?

12ታ ዎልቃይ ሹቻ መለዬ?

ዎይኮ ታ አሾይ ናሰ ብራታ መለዬ?

13ታኒ ታና ማዳናዉ አይባ ዎልቅ ታዉ ደኢ?

ማዶ ደማናዉ ፄልያ በስካ ባዋ።

14መቶን ደእያ አስ ኡባ ዳንዳእያ ፆሳስ ያየይሳ አግኮካ፥

እያ ላገት እያዉ ኬሀተ በሳናዉ ኮሼስ።

15ሽን ታ እሻት ህንተ እር ቡኮና ዎደ መልያ ሻፋ መላ ታና ጭሜታ።

16ባልጎ አጌናን ሀ ሻፋይ ሻቻን ኩሜስ።

17ሽን ቦነይ ጋክያ ዎደ ሻቻይ ትልኤስ፤

ሻፋይካ መሌስ።

18ጫና መሄ ላግሸ ብያ ዛልአንቾት፥

ሃ ኮያናዉ ባንታ ኦግያፐ ጋፃ ከይድ፥

መላ ቢታን ቶይላትሸ ዮሶና።

19ቴማ ቢታ ዛልአንቾት ሃ ኮዮሶና፤

ሳባ ቢታ ኦገ አሳት ኡፋይስ ቃንፆኮና።

20ኤንቲ አማነትድ ኮይድ ይዳ ግሾ ይሎትዶሶና፥

ሄ በሳ ጋክድ ዬላትዶሶና።

21ህንተካ ታዉ ሄ ሻፋታ መላ ግድደታ፤

ታና ጋክዳ መቱዋ በእድ ያይደታ።

22ሀኖሽን ታ ህንተና፥ “ታዉ እስባ እምተ”

ዎይኮ፥ “ህንተ ሻሉዋራ ታና ዎዝተ” ጋድና?

23“ታና ታ ሞርከታ ኩሸፐ አሽተ”

ዎይኮ፥ “ቃይ ባይና አሳ ኩሸፐ ታና ዎዝተ” ጋድና?

24“ታ ስእ ጋና፤ ህንተ ታና ታማርስተ፤

ታ አይ ባልዳኮ አነ ታና በስተ።

25ቱማ ኦድ ጫምኮካ ኤከቴስ!

ሽን ህንተ ኦዳይ አይብስካ ማደና።

26ህንተ ታ ሃሳያ ጫርኮ መላ ሀዳ ኦታ፤

ያትን፥ ኡፋይስ ቃንፅዳይሳስ ታዉ አይ ዛሮ እማናዉ ኮዬቲ?

27አው ባይና ናአ ቦላ ሳማ የጌታ፤

ህንተ ላግያ ባይዛናዉ ዋሽሴታ።

28አነ ሻማ አይፈን ታና ፄልተ፤

ታ ህንተ ስንን ዎርዶትያና?

29ሀያና፥ አነ ዛረድ ቆፕተ፤

ታኒ ፅሎ ታ ቦላ ጮ ፕርዶፍተ።

30ታ እንፃርሳን ዎርዶይ ደኢ?

ታ ዶናይ ዎርዶነ ቱማ ሻካናዉ ዳንዳኤኔ?”