እዮባ 41

1“ኔኒ ሌዋታነ ጌተትያ አባ ዶኣ ማንፃቆን ኦይካናዉ፥

ዎይኮ እያ እንፃርሳ ዎዶሮን አንጫፋናዉ ዳንዳአይ?

2እያ ሲያ ሉካዳ ዳፎ አናዉ ዳንዳአይ?

ዎይኮ እያ ጋጩዋ ዎስፐን ሉካናዉ ዳንዳአይ?

3እ ነና፥ ‘ሀያና ታና አጋርክ’ ያግድ ዎሲ?

ዎይኮ ነዉ ማልኦ ቃላ ኦዲ?

4ነ እያ መርናዉ አይለ ኦዳ ሃራና መላ፥

እ ነዉ ኤሮ ግድ ጫቃኔ?

5አስ ካፎ ሎህሰይሳዳ ነ እያ ሎህሳናዉ ዳንዳአይ?

ዎይኮ እያ ቃቻዳ ነ ማጫ ናይታራ ካአና መላ ኦኔ?

6ሞሎ ዛልአንቾት እያ ጋትያ ቦላ ፓላሞና?

ዎይኮ እያ ቃንፀረድ ባይዞና?

7ኔኒ እያ ጋልባ ቶራን፥

ዎይኮ እያ ሁጵያ ማሻን ጫዳናዉ ዳንዳአይ?

8አነ እያ ነ ኩሸን ቦቻ፤

ነ እያራ ቡተትዳ ቡትያ ዶጋካ፤

ናምአን እያራ ቡተታናዉ ቆፓካ።

9ሄ ዶኣ ኦይካናዉ ፓጨይ መላ ዋየ፤

ሀር አቶሽን እያ በእዳ ኡባይ ያሻን ኮኮሬስ።

10እ ዝንእዳ በሳፈ እያ ደንናዉ ኦንካ ፃለና፤

ያትን፥ ታ ስንን ኤቃናዉ ዳንዳኤይ ኦኔ?

11ታ እያዉ ዛራና መላ ኮይሮ ታዉ ታልእዳይ ኦኔ?

ሳሎፐ ጋርሳን ደእያባ ኡባይ ታባ።

12“ታኒ ሌዋታነ ቶሆታባ፥ እያ ግታ ዎልቃባነ

ሎእያ እያ አሳተባ ቆንጭሶና አግከ።

13እያ ጋልባ ቃራናዉ ዳንዳኤይ ኦኔ?

እያ ጋጩዋ ፖቅድ ብፃላ ባርሳናይ ኦኔ?

14ያሽያ አቻይ ደእያ

እያ ጋጩዋ ፖቃናዉ ዳንዳኤይ ኦኔ?

15እያ ዞኮ ጋልባይ እሶይ እሱዋ ቦላ ዶረትድ፤

ሹቻዳ ምንዳ ጎንዳለ ዳኔስ።

16ኤንቲ እሶይ እሱዋስ ዳሮ ማታትዳ ግሾ፥

ኤንታ ግዶራ ሀር አቶሽን ጫርኮይ ካንናዉ ዳንዳኤና።

17እሶይ እሱዋራ ጋሄትድ ደእያ ግሾ፥

ኤንታ አይብካ ሻከና።

18እ ሀሽያ ዎደ ፖኦይ ፖልኡ ጌስ፤

እያ አይፈት ዎንታ ፃልቀዳ ጫዴስ።

19እያ ዶናፐ ታማ ላጮይ ከዬስ፤

ፕንፅያ ታም በንቴስ።

20እያ ሲያፐ ጩያይ፥

ታማ ቦላ ደእያ ኦቶፐ ከያ ፐንቶ መላ።

21እያ ሲራ ከያ ሸምፖይ ከንችከሎ ቦንቅሴስ፤

ታማ ላጮይ እያ ዶናፐ ከዬስ።

22እያ ሞርግያን ዎልቃይ ደእያ ግሾ፥

እ ዳሮ ያሼስ።

23እያ አሾይ እስፈ ኦይከትድ ደእያ ግሾ፥

እያ አሳተይ ብራታዳ ምኔስ።

24እያ ዎዛናይ ሹቻዳ ምኖ፤

ጋቻ ዎፃ መላ ምኖ።

25እ ደንድያ ዎደ ምኖት ያዮሶና፤

ዳጋምድ ባቃቶሶና።

26እያ ጋክያ ማሻይ አይኮካ ኦና፤

ቶር ዎይኮ ዶንገይ ዎይኮ ማሽ እያ ቆሄና።

27እ ብራታ ፅንቃ ማታዳ፥

ናሰ ብራታ ዎቅዳ ምዳ መንረስ።

28ዶንገይ እያ በትሰና፤

ያምባርሻ ሹች እያዉ ሱላ መላ።

29ጉምባ ፃምእ እያዉ ፅንቆ መላ፤

ቶራ ፆንግያ ዎደ ቀልቅስድ ሚጬስ።

30እያ ኡሉዋ ቦላ ደእያ ጋልባይ መቅዳ ኩንአ መላ ቃራ፤

ኡርቃራ እ ብያ ዎደ ማራሻ መላ ቢታ ጳልቄስ።

31አባ ፐንትዳ ሃ መላ ቱምቡል ቱምቡል ኦስ፤

ፃሮን ፐንትያ ዛይተ መላ ሽር ሽር የጌስ።

32እያ ብያ ኦገይ ፖኤስ፤

አባ ሃ ጎፖንቶ ላሜስ።

33እ ያሽ ኤሮና ግሾ፥

ቢታ ቦላ እያ መላ መተ ሀር ባዋ።

34እ ዳሮ ግታ መተታ ኡባ ካስ፤

ዶአ ኡባስ እ ካዎ” ያግስ።