እዮባ 20

ሶፋራ ሃሳያ

1ናእማ ቢታ አስ ግድዳ ሶፋር ሀይሳዳ ያግድ ዛርስ፤

2“ነ ኦዳይ ታና ላንጭስዳ ግሾ፥

ታ ኤለሳዳ ነ ኦዳስ ዛሮ እማና።

3ነ ኦዳይ ታ ቦንቹዋ ቃርያ ግሾ፥

ታ አኬካይ ነዉ ዛሮ እማና መላ ታና ደንስ።

4አስ ቢታ ቦላ ደእዳ ዎደፐ ዶምድ፥

በንፐ ሀንዳባ ኤራሳ።

5ኢታ አሳ ጬቆይ ቃን ዎደሳ፤

ፆሳ ኤሮና አሳ ኡፋይሳይ ጉ ዎደሳ።

6ኢታ አሳ ኦቶሮይ ሳሎ ጋካናዉ ቁ ጊኮካ፥

እያ ሁጰይ ሻራ ጋክድ ቦችኮካ፥

7እ ባና መላ ፕተትድ ያና፤

እያ ካሰ ኤርያ አሳይ ‘እ አዉን ደኢ?’ ያጋና።

8ኤልሞዳ ፓልድ ያና፤ ስሚድ በንተና፤

ቃማ አሙሆዳ ጮ ያና።

9እያ ካሰ በእዳ አይፈት ዛሪድ እያ በኦኮና፤

እ ባ ደእያ በሳፈ ትምእ ግድ ያና።

10አዋይ ቦንቅ ኤክዳ ሚሸ፥

እያ ናይት ባንታ ኩሸን ጉየ ዛራና።

11እያ መቀ ኩምዳ ናአተ ዎልቃይ

እያራ እስፈ ቢታን ዝንአና።

12“ኢታተ እያ ዶናን ማልእኮ፥

እ ባ እንፃርሳፈ ጋርሳን ቆስኮ፥

13ዉሮናዳ ባ ዶናን ኦይክድ፥

ዎ አግኮ፥

14እያ ኡሉዋን ጫሞ ግዳና፤

ዎያ ሾሻ ማርዘ ግዳና።

15ኢታ አስ ምትዳ ሻሉዋ ዛር ጩታና፤

እያ ኡሉዋን ደእያ ኡባ ፆሳይ ጮሻና።

16ኢታ አስ ምያባይ እያዉ ማርዘ ግድድ፥

እያ ዎና።

17ኤስነ ማ ሃዳ ጎግሽን፥

እ በኦና አታና።

18ባ ዳቡራ አይፍያ ሞና ሀራስ እማና፤

ዛልእድ ዎስዳ ዎያን ኡፋይተና።

19ሄስ ሀንዳይ እ ማንቆታ ኡንኤዳ ግሾነ

ሀራ አስ ኬፅዳ ኬ ቦንቅዳ ግሾሳ።

20“እያ ኢታ አሞይ ሸምፖ ድግስ፤

ሺሽዳ ሻሎይ እያ አሻናዉ ዳንዳኤና።

21እያ ሻሎይ ዉርያ ግሾ፥

እያ ዱረተይ ጋምኤና።

22እያዉ አቆይ ኩምድ ደእሽን፥

መቶይ አኬኮና እያ ቦላ ጋክ ዎና።

23እያ ኡሎይ ካልያ ዎደ፥

ፆሳይ ዎልቃማ ሀንቁዋ እያ ቦላ ጉሳና።

24ብራታ ማሻፈ እ ባቃታና፤

ሽን ናሰ ብራታ ዶንገይ እያ ጫዳና።

25ሄ ዶንገይ እያ ዞኮራ ካን ከያና፤

ጶልያ ፄራይ እያ ትርያ ካን አና፤

ዳጋም እያ ዎዛና ዋባቅሳና።

26እ ሺሽዳ አቆይ ሳካና ማን ያና፤

አስ ኦይቦና ታም እያ ማና፤

እያ ኬን አትዳ ሻሎ ኡባ ፁጋና።

27ሳሎት እያ ናጋራ ቆንጭሳና፤

ሳእካ እያዉ ሞርከ ግዳና።

28ፆሳ ሀንቆ ጋላሳን፥

እያ ኬነ እያዉ ደእያባ ድኦይ ኤፋና።

29ፆሳይ ጌላታስ ዎዳ ቃዳይ፥

ኢታ አሳስ ጊግስዳ ጋተይ ሀይሳ” ያግስ።