እዮባ 15

ኤልፋዛ ሃሳያ

1ተማና ቢታፈ ይዳ ኤልፋዝ ሀይሳዳ ያግስ፤

2“ጭንጫ አስ ጫርኮዳ ኦይከቶናባ ኦዴቲ?

ዎይኮ ዶሎሀ ባጋ ጫርኩዋን ባ ኡሉዋ ጮ ኩን?

3ፓና ቃላን ዙዙሚ?

ዎይኮ ጋተይ ባይና ኦዳን ሞተቲ?

4ኔኒ ፆሳስ ያየይሳ አጋዳሳ፤

ሀራት ፆሳ ጎይኖና መላ ባዳሳ።

5ነ ኢታተይ ነ ኦዳን ኤረቴስ፤

ሽን ነ ጭንጫ ኦዳይ ነና ገንስ።

6ነ ዶናይ ነ ቦላ ፕርዴስ ታና ግድከ፤

ነ እንፃርሳይ ነ ቦላ ማርካቴስ።

7“አሳፐ ኮይሮ የለትዳይ ነኔ?

ኔኒ ደረት መታናፐ ካሰ የለታዲ?

8ኔኒ ፆሳ ፁራ ዱላታን ደአይ?

አሳ ጭንጫተ ነ ፃላላስ ደእዬ?

9ኑኒ ኤሮናባይ ኔኒ ኤርያባይ አይቤ?

ኑስ ጌምዳ ነዉ ቆንጭዳ አይባ ጭንጫተ ደኢ?

10ነ አዋፐ ባይራትያ አሳት፥

ጭምድ ፑሉምዳ አሳት ኑራ ደኦሶና።

11“ፆሳይ ነዉ እምዳ ምንይ ግደነዬ?

ኑኒ ካሃማተባ ኦድዳ ቃላይ ጉዬ?

12ነ ዎዛናይ ነና አይስ ዎራ ኤፊ?

ነ አይፈይ አይስ ደሬቅድ ፄሊ?

13ያታዳ ኔኒ ፆሳ ቦላ ሀንቀታዳሳ፤

ኢታ ቃላ ነ ዶናፐ ከሳዳሳ።

14አስ ፆሳ ስንን ጌሽ ግዳናዉ ዳንዳኢ?

ዎይኮ ማጫፈ የለትዳ አስ ፅሎ ግዳናዉ ዳንዳኢ?

15ፆሳይ ባ ኪታንቾታን አማነተና፤

ሀር አቶሽን ሳሎት እያ ስንን ጌሽ ግዶኮና።

16ኢታነ ቱና ግድዳ አስ፥

ናጋራ ሃዳ ኡያ አስ ዋንድ አማነታኔ?

17“አነ ስአ፥ ቆንጭሳዳ ታ ነዉ ኦዳና፥

ታኒ በእዳባ ኡባ ነዉ ኦዳና።

18ጭንጫት ባንታ አዋታፐ ኤክዳይሳ፥

ታ ነዉ ገንና ኦዳና።

19ቢታይ ኤንታ ፃላላስ እመትስ፤

ሀራ ቢታ አስ ኤንታራ ዋላከትቤና።

20አሰ ኡንኤሸ ደእያ ኢታ አስ፥

ባ ደኦ ላይ ኡባን ዋየትሸ ደኤስ።

21ዳጋንያባይ እያ ሀይን ስኤቴስ፤

እ ሳሮ ደአይስ ግሽን ይሰይሳት እያ ቦላ ከያና።

22ማፐ ከስ ኤኮይ እያዉ ሀነና፤

እያ ቃዳይ ማሻን ዮ።

23እያ አሀይ አንኮ ቁማ ግዳና፤

ባዉ ማ ጋላስ ማታትዳይሳ እ ኤሬስ።

24መቶይነ ኡንእ እያ ቦላ ያና፤

ኦላናዉ ከይዳ ካዎ መላ እያ ቦላ ጎባና።

25ሄስካ እ ባ ኩሽያ ፆሳ ቦላ ደንዳ ግሾሳ፤

ኡባ ዳንዳእያ ፆሳ ቦላ ፃልዳ ግሾሳ።

26እ ኤቀታናዉ ምኖነ ዳልጋ ጎንዳለ ኦይክስ፤

ኦቶሮን ፆሳኮ ሆርዶፌስ።

27“እያ ክላሆይ ሙምዳ ግሾ፥

እያ ፄሳይ ኩምዳ ግሾ፥

28እ ላለትዳ ካታማታን፥

ካይሳ ኬንነ፥

ኩንዳናዉ ጋክዳ ኬን ደኤስ።

29እ ባ ዱረተን ዳሮ ጋምኤና፤

እያ ዛዋይ አከና።

30ማፐ ከስ ኤከናዉ ዳንዳኤና፤

ታሽያ ታም ላብዳ ምዳነ

ጫርኮይ ጪሻ ቆቆፍዳ ምዳ ግዳና።

31ፓናባን አማነትድ ባና ጭሞፎ፤

እያፐ አይኮካ ደሞና አታና።

32ዎደይ ጋኮና እያ ኡባይ መልድ

ታሸይካ አጮና ም መላ ግዳና።

33እ ቴሮና ቃዉኤ ደእሸ ቆቆፈትያ ዎይነ መላ፤

ጪሻን ደእሸ ቆቆፈትያ ሻማሆ መላ።

34ፆሳስ ያዮና አሳ ኮቻይ ያና፤

ዎፈን ኬፀትዳ ኬይ ታማን ሜተታና።

35ኤንቲ ኢታተ ቃንትድ መቶ የሎሶና፤

ኤንታ ኡሉዋን ገነይ ኩምስ” ያግስ።