እዮባ 1

እዮባ ፓጨተ

1ኡፀ ቢታን እዮባ ጌተትያ እስ አስ ደኤስ፤ እ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ። 2እያዉ ላፑን አደ ናይትነ ሄ ማጫ ናይት ደኦሶና። 3እያዉ ላፑን ሙኩሉ ዶርሳት፥ ሄ ሙኩሉ ግማለት፥ እቻሹ ፄቱ ዋ ቦራት፥ እቻሹ ፄቱ ማጫ ሀረትነ ዳሮ አይለት ደኦሶና። ዶሎሀ ባጋ ቢታን ደእያ አሳ ኡባፈ እ አዳ ዱረ አስ።

4እያ አደ ናይት ባንታ ሶን ሶን ግብራ ጊግስድ፥ ባንታ ሄ ምቸታ ፄግድ እስፈ ሞሶናነ ኡዮሶና። 5ግብራ ጋላሳት ፖለትያ ዎደ እዮብ ባ ናይታ ፄግስድ፥ “ኦን ኤር ታ ናይት ባንታ ዎዛናን ፆሰ ባድድ ናጋራ ኦና አጎኮና” ግድ ዎንታ ጉራ ደንድድ፥ ኤንታና ጌሻናዉ ባ ናይታ እሱዋ እሱዋ ሱን ፄግድ ፁሳ ያርሾ ያርሼስ። እዮብ ሄሳ ኡባ ዎደ ኦስ።

እዮባ ኮይሮ ፓጨተ

6እስ ጋላስ ኪታንቾት ጎዳ ስንን በንታናዉ ይዶሶና፤ ፃላሄይካ ቃስ ኤንታራ ይስ። 7ጎዳይ ፃላህያኮ፥ “ኔኒ አዉፐ ያዲ?” ያግስ።

ፃላሄይ፥ “ታኒ ሳአ ኡባን ያነ ሃነ ዩያሸ ጋምአስ” ያግድ ዛርስ።

8ጎዳይ ፃላህያኮ፥ “ያትን፥ ኔኒ ታ አይልያ እዮባ ሎይ በአዲ? ሳአ ቦላ እያ መላ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ ባዋ” ያግስ።

9ፃላሄይ ዛሪድ፥ “ቱማ እዮብ ፆሳስ ጮ ያዪ? 10እያነ እያ ሶ አሳ፥ እያዉ ደእያባ ኡባ ኔኒ ድራዳ ናጋብኪ? እ ኦያ ኦሶ ኡባ ኔኒ አንጅዳ ግሾ እያ መሄ ዉደይ ቢታ ኡባ ቦላ ዳርስ። 11ሽን ኔኒ ነ ኩሽያ የዳዳ፥ እያዉ ደእያ አቁዋ ኡባ ሾጭያኮ፥ ቱማ እ ነና ሶምኦን ባዳና” ያግስ።

12ጎዳይ ፃላህያኮ፥ “ኤሮ ሎኦ፥ እያዉ ደእያባ ኡባይ ነ ኩሸና፥ ሽን እያ ቦቾፋ” ያግስ። ሄሳፈ ጉየ፥ ፃላሄይ ጎዳ ስንፈ ከይድ ብስ።

13እስ ጋላስ እዮባ አደ ናይትነ ማጫ ናይት ባንታ ባይራ እሻ ሶን ሞሶናነ ዎይነ ኡሽ ኡዮሶና። 14እስ ኪተትዳ አስ እዮባኮ ይድ፥ “ኑኒ ቦራታ ዋፅድ ጎይሽን፥ ሀረትካ ኑ ማታን ምሽን፥ 15ሳባ ቢታ አሳት አኬኮና ይድ ኦላ ከስድ፥ ኡባ ቦንቅድ ኤክዶሶና፤ ቃስ አይለታካ ማሻን ዎዶሶና። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።

16እ ቡሮ ኦድሽን ሀራ አስ ይድ፥ “ሳሎፐ ታም ዎድ ዶርሳታነ ሄመይሳታ ምስ። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።

17እ ቡሮ ኦድሽን ሀራ አስ ይድ፥ “ካልዳወት ሄ ጩጋን ሻከትድ ይድ፥ ኑና ኦልድ ግማለታ ኡባ ኤክ ብዶሶና፤ አይለታካ ማሻን ዎዶሶና። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።

18እ ቡሮ ኦድሽን፥ ሀራ አስ ይድ፥ “ነ አደ ናይትነ ማጫ ናይት ባንታ ባይራ እሻ ሶን ምሼነ ዎይነ ኡሽ ኡይሼ ደእሽን፥ 19ዎልቃማ ጎተይ አኬኮና መላ ቢታፈ ደንድድ፥ ኬ ሾጭን፥ ኬይ ኤንታ ቦላ ኩንድድ ናይታ ዎስ። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።

20ሄሳፈ ጉየ፥ እዮብ ደንድድ፥ ካዮስ ባ ማኡዋ ፔስ፤ ባ ሁጵያ ቡሉስስ፤ ቢታን ጉፋንድ ጎይንሸ፥

21“ታኒ ታ አየ ኡሎፐ ካሎ የለታስ፤

ሀይቃሸካ ታኒ ካሎ ባና፤

ጎዳይ እሚስ፤ ጎዳይ ዛሪድ ኤክስ፤

ጎዳ ሱንይ ጋላተቶ” ያግስ።

22ሀ ኡባንካ እዮብ ናጋራ ኦቤና፤ ፆሳ ቦላ ኢታባ ኦደትቤና።