ጌሻ ማፃፋ
ኤርምያሳ 7
ቢታን ደእያ ኢታተ
ጎዳፐ ኤርምያሳኮ ይዳ ቃላይ ሀይሳ፦ “ፆሳ ኬ ፐንግያን ኤቃዳ፥ ሀይሳዳ ያጋዳ አዋጃ። ህንተኖ፥ ጎዳ ጎይናናዉ ሀ ፐንገታራ ገልያ ይሁዳ አሳዉ፥ ኡባይ ጎዳ ቃላ ስእተ! ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ህንተ ኦግያነ ህንተ ኦሱዋ ላምተ፤ ታ ህንተና ሀ በሳን ዎና። ‘ሀይስ ፆሳ ኬ! ሀይስ ፆሳ ኬ! ሀይስ ፆሳ ኬ’ ያግድ ጭሞ ቃላን አማነቶፍተ። ህንተ፥ ህንተ ኦግያነ ኦሱዋ ቱማ ላምኮ፥ እሶይ እሱዋስ ፅሎ ፕርድኮ፥ በተ አሳ፥ ይኦ ናይታነ አምኤታ ናቆና አግኮ፥ ሀ በሳን ፅሎ አሳ ሱ ጉሶና አግኮነ፥ ህንተ ቆሄቶናዳ ሀራ ፆሳታ ጎይኖና አግኮ፥ ታ ህንተ ማይዛታስ መርናዉ እምዳ ቢታን ህንተና ዎና። ሽን ህንተ ማዶና ጭሞ ቃላን አማነተታ” ያጌስ።
“ህንተ ካይሶቴታ፥ ዎታ፥ ላይማተታ፥ ዎርዶ ጫቅድ ማርካቴታ፥ ባኣለ ኤቃስ ያርሾ ያርሼታ፥ ሀይሳፈ ካሰ ህንተ ኤሮና ሀራ ፆሳታ ጎይነታ። ያትድ፥ ታ ሱንን ፄገትዳ ፆሳ ኬ ይድ፥ ታ ስንን ኤቅድ፥ ‘ኑኒ ሳሮ’ ያጌታ። ሽን ሀ ሻትያ ኦሱዋ ኡባ ኦታ ታ ሱንን ፄገትዳ ሀ ፆሳ ኬይ ህንተዉ ፓንጋት ቆሰትያ ጎንጎሎ ግደትዬ? ህንተ ኦያባ ኡባ ታኒ ታ አይፈን በአስ” ያጌስ።
“ታኒ ታ ሱንይ ደእያ በሲ ኦዳ ኮይሮ ዶርዳ፥ ሴሎ ቢተ። ታ አሳ እስራኤለ ኢታተ ግሾ፥ ታኒ ሄ በሳ ዋትዳኮ በእተ። ህንተ ሀ ኡባ ኦያ ዎደ ታ ህንተዉ ዛራ ዛራ ኦዳስ፤ ሽን ስኦና እፅደታ። ታ ህንተና ፄጋስ፤ ሽን ታዉ ኮይበከታ። ሄሳ ግሾ፥ ታ ሴሎ ቦላ ኦዳይሳዳ ሀይሳን ህንተ አማነትያ፥ ታ ሱንን ፄገትዳ ሀ ፆሳ ኬ ቦላ፥ ህንተዉነ ህንተ ማይዛታስ እምዳ ሀ በሳ ቦላ ሄሳዳ ኦና። ህንተ ዳቦታ፥ ኤፍሬማ ኮቻ ታ ድግዳይሳዳ ታ ስንፈ ህንተናካ ድጋና” ያጌስ።
“ኤርምያሳ፥ ታ ስኦና ግሾ፥ ሀ አሳስ ዎሶፋ፤ ኤንታ ግሾ ታና ኦይቾፋ ዎይኮ ዋሶፋ፤ ኤንታዉ ጋናቶፓ። ኤንቲ ይሁዳ ካታማታንነ የሩሳላመ ኦገታን ኦያባይ አይበኮ በእክዬ? ናይት ም ምፆሶና፤ አዋት ታማ ኤሶና፤ ማጫሳት፥ ‘ሳሎ ካዊዉ’ ጌተትያ ኤቄስ ኡይ ኡካናዉ ለ ሙኑቆሶና። ኤንቲ ታና ይሎያናዉ ኡሻ ያርሾ ሀራ ፆሳታስ ጉሶሶና። ኤንቲ ሀይሳ ኦይ ቱማ ታና ቆሀናሰዬ? ሀይሳን ቆሄትድ ዬላታናይ ኤንታ ግዶኮናዬ?” ያጌስ ጎዳይ።
ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ሀንቆይ ሀ በሳ ቦላ፥ አሳ ቦላነ መህያ ቦላ፥ ጋደን ደእያ ም ቦላነ ቢታን ደእያ ካ ቦላ ጉካና፤ እ ኤፃና፥ ቶአናዉ ዳንዳኤና።”
ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ “ህንተ ፁሳ ያርሹዋ ሀራ ያርሾታ ቦላ ጉጅድ፥ አሹዋ ህንተዉ ሚተ። ታ ህንተ ማይዛታ ግብፀ ቢታፈ ከስያ ዎደ፥ ፁሳ ያርሾባነ ሀራ ያርሾታባ ኦዳብከ ዎይኮ ኪታብከ። ሽን ታ ኤንታኮ፥ ታዉ ኪተትተ፤ ታ ህንተ ፆሳ ግዳና፤ ህንተካ ታ አሰ ግዳና። ህንተዉ እንጀታና መላ ታ ህንተና ኪትያ ኦገ ኡባን ሄመትተ። ሽን ኤንቲ ታና ስኦና ዎይኮ ታዉ በሰ እሞና እፅዶሶና። ኤንቲ ባንታ ኢታ ዎዛና ቆፋ ካልድ ብዶሶና፤ ስን ባናይሳ አግድ ጉየ ብዶሶና። ህንተ ማይዛት ግብፀፈ ከይዳ ዎደፐ ዶምድ ሀች ጋካናዉ ታ አይለታ፥ ናበታ ዎንታ ዎንታ ህንተዉ ኪታስ። ሽን ህንተ ታና ስኦና ዎይኮ ታዉ በሰ እሞና እፅደታ። ህንተ ሞርግያ ምንደታ፤ ህንተ አዋታፐ አድ ኢታባ ኦደታ።
“ሀ ኡባ ነ ኤንታዉ ኦዳ፤ ሽን ኤንቲ ነ ግያባ ስኦኮና። ነ ኤንታ ፄጋና፤ ሽን ኤንቲ ኮዮኮና። ሄሳ ግሾ፥ ኤርምያሳ፥ ነ ኤንታኮ ሀይሳዳ ያጋ፦ ሀ ካዎተይ ባ ጎዳ ፆሳ ኪተቶና ዎይኮ እያ ዞርያ ስኦና ካዎተ። ቱም ይስ፤ ቱም ኤንታ እንፃርሳን ዴና። ህንተ ሁጵያ ሜድድ ዎራ ሆልተ። ጎዳይ ባና ይሎይዳ የለታ እፅዳ ግሾነ የግድ አግዳ ግሾ አይብካ ባይና ቃ ዙማ ቦላ ከይድ ዘሌልተ” ያግስ።
“ይሁዳ አሳይ ታ ስንን ኢታባ ኦዶሶና። ኤንቲ ታ ሱንን ፄገትዳ ፆሳ ኬ ቱንሳናዉ ታኒ እፅያ ኤቃታ ኤህድ እያ ግዶን ዎዶሶና። ኤንቲ ባንታ አደ ናይታነ ማጫ ናይታ ታማን ፁግድ ያርሻናዉ፥ ህኖማ ዛንጋራን ቶፈታ ጌተትያ ያርሾ በሳ ግምብዶሶና። ሽን ሄስ ታ ኤንታ ኪታቦናባነ ታ ቆፋን ባይናባ። ሄሳ ግሾ፥ ሄ በሳይ ህኖማ ዛንጋራ ዎይኮ ቶፈታ ጌተትድ ፄገተይስ አትድ፥ ሹካ ዛንጋራ ያገትድ ፄገታና ዎደይ ያና። ሞግያ በሲ ባይና ግሾ፥ ቶፈት ኤንቲ ባንታ አሀ ሞግያ በሲ ግዳና። ሄ ዎደ ሄ አሳ አሀይ ሳሎ ካፎታስነ ሳአ ዶአታስ ካ ግዳና፤ ኤንታ ጎዳና አስካ ባዋ። ታኒ የ፥ ኡፋይስነ ያጋኖ ግርስ ይሁዳ ካታማታንነ የሩሳላመ ኦገታን ስኤቶናዳ ኦና፤ ቢታይ ባይሳ ግዳና” ያጌስ ጎዳይ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.