ኤርምያሳ 47

ፍልስፄመስ ኦደትዳ ትንብተ

1ግብፀ ካዎይ ጋዛ ኦልድ ኦይካናፐ ካሰ፥ ፍልስፄመባ ጎዳፐ ናብያ ኤርምያሳኮ ይዳ ቃላይ ሀይሳ፦ 2ጎዳይ ሀይሳዳ ያጌስ፤

“ሄኮ፥ ፑደሀ ባጋፈ ሃ ቃና፤

ድኦይ ገልዳ ክፃ ሃዳ ጎጋና።

ቢታነ ቢታን ደእያባ ኡባ፥

ካታማታነ ኤንታ ግዶን ደእያ አሳ ኡባ ሙካና።

አሳይ ዋሳና፤

ቢታን ደእያ ኡባይ ዬካና።

3ፓራታ ግርሳ፥

ፓራ ጋረታ ኮሽንቻ፥

ጋረታ ጎንዶርሳ ግርሳ ስአና።

አዋታ ኩሸይ አርጋጭዳ ግሾ፥

ባንታ ናይታ ማዳናዉ ጉየ ስሞኮና።

4ፍልስፄመ አሳ ይሳናዉ፥

ፅሮሳነ ስዶና ማዳናዉ አትያ

አሳ ይሳናዉ ዎደይ ጋክስ።

ጎዳይ ፍልስፄመፐ አትዳይሳታ፥

ሃን ተቀትዳ ደእያ ካፍቶራፐ ይዳ ኮቻታ ይሳና።

5ጋዝ ካዮታዳ ባ ሁጵያ ሜዳሱ፤

አስቃሎን ባ ኩሽያ ዶና ቦላ ዎሱ።

ህንተኖ፥ አባ ጋፃን አትዳይሳቶ፥

አዉደ ጋካናዉ ህንተ አሳተ ጋረቲ?

6ህንተ፥ ‘ጎዳ ማሻዉ፥ ኔኒ ስእ ጎና እፀይ አዉደሴ?

ነ በሳ ስማዳ ገላ፤

ስእ ጋዳ ኡታ’ ያጌታ።

7ሽን ጎዳይ እያ ኪትን፥ እ ዋንድ ስእ ጋኔ?

አስቃሎናነ አባ ጋፃን ደእያ ቢታ

ኦላና መላ ኪታስ” ያግስ።