ኤርምያሳ 41

1ላፑን አጌናን ካዎ ኮቸ ግድድ፥ ካዋ ሞርናታፐ እሶይ፥ ኤልሳማ ናአይ፥ ናታና ናአይ እስማኤል ታሙ አሳራ እስፈ አክቃማ ናኣ ጎዶልያራ ጋሄታናዉ ምፅጳ ብስ። ኡባይ ኡትድ ካ ምሽን፥ 2ናታና ናአይ እስማኤልነ እያራ ደእያ ታሙ አሳት ባንታ ማሻ ማሻ ከስድ፥ ባብሎነ ካዎይ ይሁዳ ቦላ ሹምዳ አክቃማ ናኣ ጎዶልያ ዎዶሶና። 3እስማኤል ቃስ ምፅጳን ጎዶልያራ ደእያ አይሁደታነ ባብሎነ ኦላንቾታ ኡባ ዎስ።

4ጎዶልያ ሀይቅዳ ዎንተ ጋላስ፥ ኦንካ እያ ሀይቁዋ ኤሮና ደእሽን፥ 5ሴከማፐ፥ ሴሎፐነ ሳማረፐ ሆስፑን ታሙ አሳት አዛንድ፥ ባንታ ቡቻ ሜድድ፥ ባንታ ማኡዋ ዳክድ፥ ባንታ ሶምኡዋ ጋርሸ ይዶሶና። ኤንቲ ፆሳ ኬስ እምያ ካነ እፃነ ኤህዶሶና። 6እስማኤል ዬክሸ ምፅጳፈ ከይድ፥ ኤንታራ ጋሄታናዉ ብስ። ኤንታ ጋሄትዳ ዎደ፥ “አክቃማ ናኣ ጎዶልያኮ ሃ ይድ እያ በእተ” ያግስ። 7ኤንቲ ካታማ ገልዳ ዎደ እስማኤልነ እያራ ደእያ አሳት ኤንታ ዎድ ሃ ኦላን የግዶሶና።

8ሽን ሄ ሆስፑን ታሙ አሳታፐ ታማት እስማኤላ ሀይሳዳ ያግድ ዎስዶሶና፦ “ኑና ዎፓ! ኑ ጎሻን ኑ ቆስዳ ዳሮ ግስተይ፥ ባንግ፥ ሻማሆ ዛይተይነ ኤስ ደኤስ” ያግዶሶና። እ ኤንታ ዎና የድ አግስ። 9እስማኤል አሳ ዎድ የግዳ ኦላይ፥ እስራኤለ ኦላናዉ ባኦስ ይዳ ዎደ ካዎይ አስ ቦክስዳ ግታ ግምበትዳ ሃ ኦላ። ናታንያ ናአይ እስማኤል ሄ ኦላ አሀን ኩንስ። 10እስማኤል ካዋ ማጫ ናይታነ ምፅጳን አትዳ አሳ ኡባ ድእስ። ሄሳት ካዋ ናገይሳታ ሀላቃይ ናቡዛርዳን አክቃማ ናኣ ጎዶልያ አዋተ ጋርሳን ምፅጳን ዎዳይሳታ። እ ኤንታ ድእድ፥ ባራ ኤክድ፥ አሞነ ቢታ ባናዉ ደንድስ።

11ቃራያ ናአይ ዮሃንነ እያራ ደእያ ቶራ ሞጮናት እስማኤል ኦዳ ኢታባ ኡባ ስእዶሶና። 12ባንታ አሳ ኤክድ፥ እያራ ኦለታናዉ ብዶሶና፤ እስማኤላ ጋባኦናን ደእያ ግታ ኤለ ሃ ማታን ኦይክዶሶና። 13እስማኤል ድእድ ኤፍያ አሳ ኡባይ ቃራያ ናኣ ዮሃናናነ እያራ ደእያ ቶራ ሞጮናታ በእዳ ዎደ ዳሮ ኡፋይትዶሶና። 14ሄ ድኤትዳይሳት ኡባይ ጉየ ስሚድ፥ ቃራያ ናኣ ዮሃናናን ጋሄትዶሶና። 15ሽን እስማኤልነ ሀራ ሆስፑን አሳት ዮሃናናፐ ከስ ኤክድ፥ አሞነ ቢታ ባቃትዶሶና።

16እስማኤል አክቃማ ናኣ ጎዶልያ ዎድ፥ ምፅጳፈ ድእድ ኤህዳ ኦላንቾት፥ ማጫሳት፥ ናይትነ ሹፋት ኡባይ ቃራያ ናኣ ዮሃናራነ ሀራ ቶራ ሞጮናታራ ደንድድ ብዶሶና። 17ኤንቲ ያፐ ደንድድ፥ ግብፀ ባናዉ፥ ቤተለመ ማታን ደእያ ገሮት-ካማሀማ ጌተትያ በሳን ሸምፕዶሶና። 18ኤንቲ ግብፀ ብዳይ ባብሎነ ካዎይ ሹምዳ አክቃማ ናኣ ጎዶልያ እስማኤል ዎዳ ግሾ፥ ባብሎነታስ ያይድ፥ ባብሎነፐ ባቃትድ፥ ግብፀ ባናዉ ደንድዶሶና።