ጌሻ ማፃፋ
ኤርምያሳ 32
ኤርምያስ ጋደ ሻምስ
ይሁዳ ካዎይ ሰደቅያስ ካዎትዳ ታማን ላይን፥ ባብሎነ ካዎይ ናቡካዳናፆር ካዎትዳ ታማነ ሆስፑን ላይን ጎዳፐ ሀ ቃላይ ኤርምያሳኮ ይስ። ሄ ዎደ ባብሎነ ካዋ ኦላንቾት የሩሳላመ ተቅዶሶና፤ ናበይ ኤርምያስ ይሁዳ ካዎ ጋን ደእያ፥ ናገይሳታ ዳባባን እያ ቦላ ጎርደትን ደኤስ።
ይሁዳ ካዎይ ሰደቅያስ እያ ሀይሳዳ ያግድ ቃችድ ዎስ፦ “ነ አይስ ሀይሳዳ ያጋዳ ትንብተ ኦዳይ? ‘ጎዳይ ሀ ካታማ ባብሎነ ካዋ ኩሸን አድ እማና፤ እ እያ ኦይካና’ ያጋዳ አይስ ኦዳይ። ይሁዳ ካዎይ ሰደቅያስ ባብሎነ አድ እመታና፤ እ ባብሎነ ካዋ ኩሸን ገላና። እያ ስንን ኤቅድ፥ እያራ ኦደታና፤ እ ባ አይፈን እያ በአና። ናቡካዳናፆር ሰደቅያሳ ባብሎነ ኤፋና፤ ታ እያባ በአና ጋካናዉ እ ያን ዳና። ኔኒ ባብሎነታራ ኦለታናዉ ቆፕኮ፥ ሄስ ነዉ ሀነና” ያጌስ ጎዳይ።
ኤርምያስ፥ “ጎዳ ቃላይ ሄ ዎደ ታኮ ሀይሳዳ ያግድ ይስ” ያግስ።
“ነ አዋ እሻ ሳሉማ ናአይ፥ ሀናምኤል ኔኮ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ አናቶታ ካታማን ደእያ ታ ጋድያ ሻማ’ ያጋና። ጎዳይ ግዳይሳዳ፥ ታ አዋ እሻ ናአይ ሀናምኤል ታኮ ናገይሳታ ዳባባ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ፥ ብንያመ ቢታን አናቶታን ደእያ ታ ጋድያ ሻማ’ ያግን፥ ታኒ ሄሳ ኦድዳይ ጎዳ ግደይሳ ኤራስ።
“አናቶታ ካታማን ደእያ ጋድያ ታ አዋ እሻ ናኣ ሀናምኤላፐ ሻማስ። እያ ጋትያ ምዛነን ልክን፥ ታማነ ላፑን ብራ ሳንትመ ግድስ። ሻማ ፕርማ ማርካት ደእያ በሳን ፓራማስ፤ ጎርዳስ፤ ማታመ እያ ቦላ ዎስ፤ ሚሽያ ምዛነን ልካዳ እያዉ እማስ። ሄሳፈ ጉየ፥ ታኒ ዛልእያ ሀኖታ ቆንጭስያ አሻገትድ አታመትዳ ሻማ ፕርማነ አታመትቦና ሻማ ፕርማ ኤካስ። ታ አዋ እሻ ናአይ ሀናምኤል፥ ሻማ ፕርማ ፓራምዳ ማርካትነ ናገይሳታ ዳባባን ኡትዳ አይሁደት ኡባይ በእሽን፥ ሄ ሻማ ፕርማ ማህሰያ ናኣ፥ ኔራ ናኣ ባሮካስ እማስ። ኤንታ ስንን ታ ባሮካ ሀይሳዳ ያጋዳ ኪታስ፦ ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ዳሮ ዎደ ጋምአና መላ ሀ አሻገትድ አታመትዳ ፕርማነ አታመትቦና ፕርማ ኤፋዳ ኦቶን ዎ።’ ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ሀ ቢታን አሳይ ዛሪድ ኬ፥ ጋደነ ዎይነ ቶክያ በሲ ሻማና” ያጌስ ጎዳይ።
ታኒ ኔራ ናኣ ባሮካስ ሻማ ፕርማ ዋርቃትያ እምዳፐ ጉየ፥ ሀይሳዳ ያጋዳ ዎሳስ። “አቤት ኡባ ሃርያ ጎዳዉ፥ ነ ሳሎታነ ሳኣ ነ ግታ ዎልቃንነ ነ ምጨትዳ ኩሸን መዳሳ። ነዉ ዳንዳኤቶናባይ ባዋ። ኔኒ ነ ሲቁዋ ሙኩሉ አሳስ በሳሳ፤ ሽን አዋታ ናጋራ ኤንታ ናይታ ቦላ ዛራሳ። አቤት ግታነ ዎልቃማ ፆሳዉ፥ ነ ሱንይ ኡባፈ ዎልቃማ ጎዳ ጌተቴስ። ነ ሀልቾይ ግታ፤ ነ ኦያ ኦሶይ ዎልቃማ። አሳ ኦገ ኡባ ነ በኣሳ፤ አሳ ኡባስ እያ ኦግያዳነ እያ ኦሱዋዳ ዛራሳ።
“ነ ግብፀን ማላታነ ማላታ ኦዳሳ፤ ሀች ጋካናዉ ሀ ማላታ እስራኤለ አሳ ግዶንነ ሀራ ካዎተታ ኡባ ግዶን ኦሶ አጋባካ። ሄሳፈ ደንዶይሳን ነ ሱንይ ኡባ በሳን ኤረትስ። ኔኒ ነ አሳ እስራኤለ ግብፀፈ ማላታንነ ማላታን፥ ነ ምኖ ቀስያን፥ ነ ምጨትዳ ኩሽያንነ ግታ ዳጋማን ከሳዳሳ። ኤንታ ማይዛታስ ነ እማናዉ ጫቅዳ ቢታ፥ ማነ ኤስ ጎግያ ቢታ ኤንታዉ እማዳሳ። ኤንቲ ሄ ቢታ ገልድ ላትዶሶና። ሽን ኤንቲ ነዉ ኪተትቦኮና፤ ነ ህግያ ናግቦኮና፤ ኤንቲ ኦና መላ ነ ኪትዳ ኡባ ኦቦኮና። ሄሳ ግሾ፥ ነ ኤንታ ቦላ ሀ ጋዱዋ ኡባ ኤሀዳሳ።
“ባብሎነ አሳይ ካታማ ኦይካናዉ ግምብያ ዩሹዋን ቢታ ዶርድ ተቅዶሶና። ኦላፐ፥ ኮሻፐነ ቦሻፐ ደንዶይሳን ካታማይ ኤንታ ኦልያ ባብሎነ ኩሸን አድ እመትስ። ነ ሀእ በኤይሳዳ ነ ግዳባ ኡባይ ፖለትስ። አቤት ኡባ ሃርያ ጎዳዉ፥ ካታማይ ባብሎነ አሳስ እመታናዉ ሀንያ ዎደካ ነ ታና፥ ‘ማርካ ፄጋዳ፥ ሚሸን ጋድያ ሻማ’ ጋዳሳ” ያጋዳ ዎሳስ።
ሄሳፈ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦ “ታኒ ጎዳ፥ አሳ ኡባ ፆሳ። ታዉ ዳንዳኤቶናባይ ደኢ?” ያግስ። ታኒ ሀ ካታማ ባብሎነ አሳስነ ባብሎነ ካዋ ናቡካዳናፆራስ አዳ እማና፤ ኤንቲ እያ ኦይካና። ሀ ካታማ ተቅዳ ባብሎነ አሳይ ይድ፥ ካታማ ታማን ፁጋና፤ ፖቅያ ቦላ ባኣለ ኤቃስ እፃነ ጩይስሸነ ሀራ ፆሳታስ ኡሻ ያርሾ ጉስሸ ታና ሀንቀዳ አሳይ ደእያ ኬትካ ፁገታና። “እስራኤለይነ ይሁድ ባንታ ናአተፈ ዶምድ፥ ታ ስንን ኢታባፐ አትሽን፥ ሎኦባ፥ ኦቦኮና፤ ኤንቲ ባንታ ኩሸን ኦዳ ኦሱዋን ታና ሀንቀዶሶና። ሀ ካታማይ ኬፀትዳ ዎደፐ ሀች ጋካናዉ፥ ሀ ካታማ አሳይ ታና ዳሮ ሀንቀዳ ግሾ ሀ ካታማ ታ ስንፈ ይሳና። እስራኤለይነ ይሁድ፥ ኤንታ ካዎትነ ሀላቃት፥ ኤንታ ካህነትነ ናበት ኦዳ ኢታ ኦሶ ኡባን ታና ይሎይዶሶና። ኤንቲ ባንታ ሶምኡዋ ግዶናሽን፥ ባንታ ዞኩዋ ታዉ ዛርዶሶና። ታ ኤንታ ዛራ ዛራዳ ታማርስንካ፥ ኤንቲ ስእቦኮና ዎይኮ ሴራ ኤክቦኮና። ኤንቲ እፀትዳ ባንታ ኤቃታ ታ ሱንይ ፄገትዳ ኬን ኤስድ ቱንስዶሶና። ኤንቲ ባንታ አደ ናይታነ ማጫ ናይታ ሞሎካ ኤቃስ ያርሻናዉ ህኖማ ዛንጋራን ባኣለ ኤቃስ ያርሾ ቃ በሳታ ጊግስዶሶና። ኤንቲ ሄሳ ኦና መላ ታ ኪታብከ፤ ይሁዳ አሳይ ናጋራ ኦና መላ ሄሳ ኤንቲ ኦና ጋዳ ታ ናጋብከ” ያግስ።
“ኔኒ፥ ‘ሀ ካታማይ ኦላን፥ ኮሻንነ ቦሻን ባብሎነ ካዋ ኩሸን አድ እመታና’ ያግዳ ሀ ካታማባ ጎዳይ እስራኤለ ፆሳይ ሀይሳዳ ያጌስ። ታ ሱልያ ሀንቁዋንነ ግታ ሸንያን ኤንታ ላልዳ ቢታ ኡባፈ ሺሻዳ ሀ በሳ ዛራ ኤሀዳ፥ ኤንቲ ሳሮተን ዳና መላ ኦና። ኤንቲ ታ አሰ ግዳና፤ ታ ኤንታ ፆሰ ግዳና። ኤንቲ ታዉ መርናዉ ያያና መላ፥ ታ ኤንታዉ እስ ዎዛናነ እስ ኦገ እማና፤ ሄስ ኤንታዉነ ኤንታፈ ጉየ ኤንታ ናይታስ ሎኦ ግዳና። ታኒ ኤንታራ መርናዉ ጫቃና፤ ሄ ጫቁዋን ታ ኤንታዉ ሎኦባ ኦሶ አግከ። ኤንቲ ታና አግድ ጉየ ስሞና መላ ኤንቲ ታዉ ያያና መላ ኦና። ታ ኤንታዉ ሎኦባ ኦይስ ታና ኡፋይሴስ፤ ታ ኩመ ዎዛናፐነ ታ ኩመ ሸምፑዋፈ ቱማ ሀ ቢታን ኤንታ ቶካና” ያጌስ ጎዳይ።
“ታ ሀ አሳ ቦላ ኢታ ቦሻ ኡባ ኤህዳይሳዳ ታ ኤንታዉ እማና ግዳ ሎኦባ ኡባ እማና። ህንተ፥ ‘ሀ ቢታይ አሳይነ መሄይ ባይና ባይሳ ቢታ ግዳና፤ እ ባብሎነታስ እመትስ’ ያግዳ ቢታን አሳይ ዛሪድ ጋደ ሻማና። ታ ኤንታ ዛራዳ ኤህያ ግሾ፥ አሳይ ጋደ ሻማና፤ ማርካ ስንን ዛልእያ ሀኖታ ቆንጭስያ ፕርማ ፓራምድ፥ ማታመ ዎና። ሀይስ ኡባይ ብንያመ ቢታን፥ የሩሳላመ ዩሹዋን ደእያ ሄራታን፥ ይሁዳ ካታማታን፥ ደረይ ዳርያ ካታማታን፥ ጋ ካታማታንነ ነገበ መላ ቢታን ደእያ ካታማታ ኡባን ሀናና” ያጌስ ጎዳይ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.