ኤርምያሳ 26

ኤርምያስ ሀይቆፐ አትስ

1እዮስያሳ ናአይ ይሁዳ ካዎይ እዮአቄም ካዎትዳ ዎደ ጎዳ ቃላይ ይስ። 2ጎዳይ፥ “ፆሳ ኬ ዳባባን ኤቃ። ፆሳ ኬን ጎይናናዉ ይሁዳ ካታማታፐ ያ ኡባስ፥ ታ ነና ኪትዳ ቃላፐ እሱዋካ አሾና ኦዳ። 3ኤንቲ ስእድ፥ ባንታ ኢታ ኦግያፐ ስማነኮ ኦን ኤር። ሄሳ ግድኮ፥ ታኒ ኤንታ ኢታተ ግሾ ይሳናዉ ቆፕዳይሳ አጋጋና።”

4ኤንታኮ ሀይሳዳ ያጋ፦ “ህንተ ታና ስኦና እፅኮነ ታ ህንተዉ እምዳ ህግያ ኪተቶና እፅኮ፥ 5ህንተ ስኦና እፅኮካ ታ ዛራ ዛራዳ ህንተኮ ኪትዳ፥ ታ አይለታ ናበታ ቃላ ስኦናን እፅኮ፥ 6ታ ሀ ፆሳ ኬ ሴሎዳ ኦና። ሀ ካታማ ሳአን ደእያ ካዎተታ ኡባስ ባደ ኦና” ያግስ።

7ኤርምያስ ፆሳ ኬን ሀ ቃላ ኦድሽን፥ ካህነት፥ ናበትነ አሳ ኡባይ ስእዶሶና። 8ኤርምያስ፥ ጎዳይ፥ ኦዳ ግድ እምዳ ኪታ ኦድድ ኦንግዳ ዎደ ካህነት፥ ናበትነ አሳ ኡባይ እያ ኦይክድ፥ “ነ ሀይቃናዉ በሳሳ” ያግዶሶና። 9ኔኒ፥ “ ‘ሀ ፆሳ ኬይ ሴሎዳ ሀናና፤ ቃስ ሀ ካታማይ ያና፤ ባይሳ ግዳና’ ያጋዳ፥ ጎዳ ሱንን አይስ ትንብተ ኦዳዲ?” ያግድ፥ ፆሳ ኬን ሺቅዳ አሳ ኡባይ ኤርምያሳ ተቅዶሶና።

10ይሁዳ ሀላቃት ሄሳ ስእዳ ዎደ፥ ካዎ ጋፐ ከይድ፥ ፆሳ ኬ ይዶሶና። ፆሳ ኬን ኦራ ፐንገ ጌተትያ ፐንግያን ኡትዶሶና። 11ካህነትነ ናበት ሀላቃታኮነ አሳ ኡባኮ ሀይሳዳ ያግዶሶና፦ “ህንተ፥ ህንተ ሀይን ስእዳይሳዳ፥ ሀ አደይ ሀ ካታማ ቦላ ትንብተ ኦድዳ ግሾ፥ እ ሀይቃናዉ በሴስ!” ያግዶሶና።

12ኤርምያስ ሀላቃታኮነ አሳ ኡባኮ ሀይሳዳ ያግስ፦ “ሀ ህንተ ስእዳ ቃላ ኡባይ ሀ ፆሳ ኬ ቦላነ ሀ ካታማ ቦላ ሀናና ጋዳ ታ ኦዳና መላ ጎዳይ ታና ኪትስ። 13ህዛ ህንተ ኦግያነ ህንተ ኦሱዋ ላምተ፤ ጎዳ ህንተ ፆሳ ቃላስ ኪተትተ። ሄሳ ህንተ ኦኮ፥ ጎዳይ ህንተ ቦላ ኤሀና ግዳ ኢታባ አጋጋና። 14ታና ግድኮ፥ ታ ህንተ ኩሸን ደአይስ። ህንተዉ ሎኦነ ሱረ ዳንዳባ ታ ቦላ ኦተ። 15ታኒ ሀ ቃላ ኡባ ህንተዉ ኦዳና መላ ጎዳይ ቱማ ታና ኪትዳ ግሾ፥ ህንተ ታና ዎኮ፥ ህንተ ህንተ ቦላ፥ ሀ ካታማ ቦላነ እያን ደእያ አሳ ቦላ ፅሎ ሱ አጮ ኤሀናይሳ ኤርተ” ያግስ።

16ሀላቃትነ አሳ ኡባይ፥ ካህነትነ ናበት፥ “እ፥ ጎዳ፥ ኑ ፆሳ ሱንን ኑስ ኦድዳ ግሾ፥ ሀ አደይ ሀይቃናዉ በሰና” ያግዶሶና።

17ቢታ ጭማታፐ እሶት እሶት ደንድ ኤቅድ፥ ሺቅዳ አሳኮ ሀይሳዳ ያግዶሶና፦ 18“ህዝቅያስ ይሁዳን ካዎትዳ ላይን ሞረሴታ አደይ ምክያስ ካሰ ይሁዳ አሳስ ሀይሳዳ ያግድ፥ ትንብተ ኦድስ፦ ‘ፅዮነይ ሾቃዳ ጎየታና። የሩሳላመ ካታማይ ላለትድ፥ ላለ ዶረ ግዳና። ፆሳ ኬይ ኬፀትዳ ደረይ ዎራ ግዳና’ ያጌስ ኡባፈ ዎልቃማ ጎዳይ” ያግስ። 19ያትን፥ “ይሁዳ ካዎይ ህዝቅያስነ ይሁዳ አሳ ኡባይ እያ ዎዶና? አካይ፥ ህዝቅያስ ጎዳስ ያይድ፥ ጎዳ ማሮተ ኦይችቤኔ? ጎዳይ ኤንታ ቦላ ኤሀና ግዳ ኢታባ አግቤኔ? ሽን ኑኒ ኑ ቦላ ኢታባ ኤሀና ሀኖስ” ያግዶሶና።

እዮአቄም ኦርዮና ዎስስ

20ቅርያት-ይኣርማ ጌተትያ በሳን፥ ሻማያ ናኣ፥ ኦርዮና ጌተትያ እስ አደይ ደኤስ። እካ ኤርምያስ ኦድዳይሳዳ፥ ሀ ካታማ ቦላነ ሀ ቢታ ቦላ ጎዳ ሱንን ካሰ ትንብተ ኦድስ። 21ካዎይ እዮአቄም፥ እያ ኦላንቾት፥ እያ ሞርናት፥ ኦርዮን ኦድዳይሳ ስእዳ ዎደ ካዎይ እያ ዎናዉ ኮይስ። ኦርዮን ሄሳ ስእዳ ዎደ ያይድ፥ ግብፀ ባቃትስ። 22ግዶሽን፥ ካዎይ እዮአቄም አክቦራ ናኣ ኤልናታናነ ሀራ አሳታ ግብፀ ኪትስ። 23ኤንቲ ኦርዮና ግብፀፈ ከስድ፥ ካዋ እዮአቄመኮ ኤፍን፥ እያ ማሻን ዎስድ ደረይ ሞገትያ ዱፎን ሞግዶሶና።

24ሽን ሳፋና ናአይ፥ አክቃም ኤርምያሳ ማድዳ ግሾ አሳይ እያ ዎናዉ አድ እምቦኮና።