ኤርምያሳ 15

1ሄሳፈ ጉየ፥ ጎዳይ ታኮ ሀይሳዳ ያግስ፦ “ሀር አቶሽን ሙሰይነ ሳሜል ታ ስንን ኤቅድ ዎስያኮካ ታ ዎዛናይ ሀ አሳኮ ስመና። ኤንታ ታ ስንፈ ድጋ፤ ኤንቲ ቦ። 2ኤንቲ ነና፥ ‘ኑ አዉ ባኔ?’ ግድ ኦይችኮ፥ ጎዳይ ሀይሳዳ ያጌስ ጋዳ ኤንታዉ ኦዳ፦ ‘ሀይቆስ ፕርደትዳይሳት ሀይቆስ፤ ማሻስ ፕርደትዳይሳት ማሻስ፤ ኮሻስ ፕርደትዳይሳት ኮሻስ፤ ድኤታናዉ ፕርደትዳይሳት ድኤታናዉ ቦ’ ያግስ።

3“ታኒ ኦይዱ ቆሞ ጋዶታ ኤንታ ቦላ ኤሀና ያጌስ ጎዳይ። ሄስካ፥ ኤንታ ዎናዉ ማሻ፥ ኤንታ አሀ ጎቻናዉ ካናታ፥ ኤንታ አሾ ምድ ይሳናዉ ሳሎ ካፎታነ ሳአ ዶአታ ኤሀና። 4ህዝቅያሳ ናአይ፥ ይሁዳ ካዎይ ምናሰይ የሩሳላመን ኦዳ ኢታ ኦሱዋ ግሾ፥ ታ ኤንታ ሳኣ ካዎተ ኡባስ ዳጋማ ኦና።

5“የሩሳላመ አሳዉ፥ ህንተዉ ኦነ ቃታናይ? ህንተዉ አዛናናይ ኦኔ? ህንተ ዋንደቲ? ግድ ህንተና ኦይቻናይ ኦኔ?” ያጌስ ጎዳይ።

6“ህንተ ታና አግደታ፤ ህንተ ጉየ ስምደታ። ሄሳ ግሾ፥ ታኒ ህንተ ቦላ ታ ኩሽያ ደንዳ ህንተና ይሳስ፤ ህዛፐ ታ ህንተዉ ቃትከ። 7ኤንቲ ባንታ ኢታ ኦግያፐ ስሞና እፅዳ ግሾ ኤንታ ካታማታ ፐንግያን ፕ ኤካዳ ሀርቃስ። ታ ኤንታ ናይታ ዎ ዉርሳስ፤ ታ አሳ ይሳስ። 8ኤንታ አምኤታ ታይቦይ አባ ጋፃን ደእያ ሻፍያፐ ዳርስ። ታኒ ሴታ ጋላስ ናአተታ አየታ ቦላ ዮ ኤሀና። ቆፖና ደእሽን፥ ኤንታ ቦላ ዳጋማነ ኮኮርስ ኤሀና። 9ላፑን ናይት ሀይቅዳ አይያ ሸምፓናዉ ፆነታዳ ዳቡራሱ። እዉ ጋላስ ቃምስ፤ እያ ካዉያሱነ ዬላታሱ። ፓፃ አትዳይሳታ ኤንታ ሞርከታ ስንን ማሻን ዉርሳና” ያጌስ ጎዳይ።

10ታ አየ፥ ታና አይስ የላዲ? ታና አየ! ታ ቢታ ኡባን ደእያ አሳራ ካጭያነ ባፀትያ አስ ግዳስ። ታ ኦደስካ ታልአብከ፤ ኦደፈካ ታልአዳ ኤካብከ፤ ሽን አሳ ኡባይ ታና ባዴስ።

11ጎዳይ ታኮ፥ “ቱማ ታ ነና ሎኦ ኦሶስ አሻዳ ኤካና። ቱማ ነ ሞርከት መቱዋ ዎደነ ዋየ ዎደ ነና ዎሳና መላ ኦና። 12አስ ብራታ፥ ፑደሀ ባጋፈ ያ ብራታ ዎይኮ ናሰ ብራታ መንናዉ ዳንዳኢ? 13ቢታ ኡባን ህንተ ኦዳ ናጋራ ግሾ፥ ህንተ ሻሉዋነ ዱረተ ህንተ ሞርከታስ አዳ እማና። 14ህንተና ኤሮና ቢታን ህንተ ሞርከት ህንተና አይለ ኦና። ታ ሀንቆይ ምያ ታማ ግድድ መርናዉ ኤፃና” ያግስ።

15አቤት ጎዳዉ፥ ነ ኤራሳ። ታና ሀሳያ፤ ታና ማዳ፤ ታና የደይሳታ ቦላ ታ ሃሉዋ ከያ። ነ ዳንዳአን ታና ዎራ የጎፋ። ታ ነ ግሾ ጫየተይሳ ቆፓ። 16አቤት ጎዳዉ፥ ኡባፈ ዎልቃማ ፆሳዉ፥ ታ ነ ሱንን ፄገትዳ ግሾ፥ ነ ቃላይ ታኮ ይን ማስ። ማ ስምን ታና ፓሽክስስ፤ ታ ዎዛና ኡፋይስስ። 17ቀልቅሰይሳታ ጩጋን ኡታብከ፤ ኤንታራ ኡፋይታብከ። ኔኒ ነ ኩሽያ ታ ቦላ ዎዳ ግሾነ ታ ቦላ ይሎትዳ ግሾ ታ ታርካ ዱማ ኡታስ። 18ታ ሀርገይ ፓፆናይ፥ ታ ማዱንይ መሎናይ አይብሴ? ነ ታዉ ኤቅያ ሻፋዳ፥ መልያ ፑልቶዳ ሀናዬ?

19ሄሳ ግሾ፥ ጎዳይ ሀይሳዳ ያጌስ፦ “ነ ታኮ ስምኮ፥ ታ ዛራዳ ነና ኤካና፤ ነ ታዉ ኦና። ሀዳ ኦዳ አጋዳ፥ ቦንቾ ቃላ ፃላላ ኦደትኮ፥ ነ ታ ዶና ግዳና። ኤንቲ ኔኮ ስማና፤ ሽን ነ ኤንታኮ ስማካ። 20ታ ነና ሀ አሳስ ናሰ ብራታን ግምበትዳ ግምበ ኦና። ኤንቲ ኔራ ኦለታና፤ ሽን ነና ፆኖኮና፤ ታ ነና አሻና። 21ኢታታ ኩሸፐ ታ ነና አሻና፤ ቃይ ባይና ዎዛና ምኖ አሳፐ ታ ነና ዎዛና” ያጌስ ጎዳይ።