ኤርምያሳ 12

ኤርምያሳ ኦይሻ

1አቤት ጎዳዉ፥ ታ ኔራ ሞተትያ ዎደ ኡባንካ ነ ፅሎ። ግዶሽን፥ ነ ፅሎ ፕርዳባ ኔራ ኦደታናዉ ኮያይስ። ኢታ አሳት ኦያባይ ኤንታዉ አይስ እንጀቲ? ገነ አሳት አይስ ዱረትድ ደኦና? 2ኔኒ ኤንታ ቶካዳሳ፤ ኤንቲ ፃጶ የድዶሶና፤ ድጭድ አይፈ አይፍዶሶና። ኤንቲ ነና ዶናፐ የጎኮና፤ ሽን ኤንታ ዎዛናፐ ነ ሃሆን ደኣሳ። 3ሽን አቤት ጎዳዉ፥ ነ ታና ኤራሳ፤ ታና በኣሳ፤ ታ ነባ አይ ቆፕያኮ ፓጫሳ። ሹካ ዶርሳዳ፥ ሄ ኢታ አሳታ ጎቻዳ ከሳ፤ ሹካ ጋላሳስ ኤንታ ዱማያዳ ዎ። 4ቢታይ እራ ይድ ቆሄታናይ፥ ደንባን ደእያ ማታይ መላናይ አዉደ ጋካናሴ? አሳ ኢታተ ጋሶን፥ ዶእነ ካፎይ ዉርስ። አሳይ ቃስ፥ “ጎዳይ ኑ ኦያባ ደመና” ያጎሶና።

ጎዳ ዛሩዋ

5ጎዳይ ኤርምያሳኮ፥ “ኔኒ ቶሆን ዎፅያ አሳታራ ጋደታዳ ዳቡርኮ፥ ፓራራ ዋናዳ ጋደታኔ? ነ ሳሮ ቢታን በትኮ፥ ዮርዳኖሰ ዎራ ግዶራ ዋናዳ ሄመታኔ? 6ነ እሻት፥ ህንተ ሶ አሳት ነና አድ እምዶሶና፤ ነ ቦላ ደንድዶሶና። ሄሳ ግሾ፥ ሎኦባ ኦድኮካ ኤንታ አማኖፓ።

7“ታ እስራኤለ አጋስ፤ ታ ዶረትዳ ካዎተ የጋስ፤ ታ ሲቅያ አሳ እያ ሞርከታ ኩሸን አዳ እማስ። 8ታ ዶርዳ አሳይ ታዉ ዎራን ደእያ ጋሞ መላ ግድስ። እ ታ ቦላ ጉድስ፤ ሄሳ ግሾ ታ እያ እፃስ። 9ታ ዶርዳ አሳይ ኡባ ባጋራ ጵርጮይ ተቅዳ ካፎ መላ ግድዶሶና። ብድ ዶአታ ኡባ ሺሽድ እያ ማና መላ ኤህተ።

10“ዳሮ አላጋ ካዎት ታ ዎይነ ጋድያ ኢስዶሶና፤ ታ ጋድያ የዶሶና፤ ታ ሎኦ ጎሻ ባይሳ ከስዶሶና። 11ሄ ቢታይ ኢትድ ኦፅስ፤ ታ ስንን መላነ ባይሳ ግድስ። ቃተይ ባይና ግሾ ቢታይ ኩመ ኢትስ። 12መላ ቢታን ደእያ አይኮካ ባይና ደረ ካንድ፥ ቦንቀይሳት ይዶሶና። ጎዳ ማሻይ ቢታ ሀ ጋፃፐ ያ ጋፃ ጋካናዉ ምስ። ሄሳ ግሾ፥ ኦንካ ሳሮ አታናዉ ዳንዳኤና። 13ኤንቲ ግስተ ዘርድ፥ አጉን ጫክዶሶና፤ ኤንቲ ዳሮ ዳቡርዶሶና፤ ሽን አይኮካ ደምቦኮና። ጎዳ ዎልቃማ ሸንያ ጋሶን ኤንታ ካይ ይስ” ያግስ።

14“ታኒ ታ አሳ፥ እስራኤለስ፥ እምዳ ቢታ ኦይክዳ፥ ኢታ ሾሮ ካዎተታ ኤንታ ቢታፈ ሾዳና። ቃስ ይሁዳ አሳ ኤንታ ግዶፈ ከሳና። 15ሽን ኤንታ ቢታፈ ሾድዳፐ ጉየ፥ ዛራዳ ኤንታዉ ቃታና። ኤንታ እሱዋ ኤንታ ላታ ቢታነ ኤንታ ካዎተ ዛራዳ ኤሀና። 16ካሰ ታ አሳ ባኣለ ሱንን ጫቃና መላ ታማርስዳይሳዳ ኤንቲ ታ አሳ ኦግያ ታማርኮነ ታ ሱንን ጫቅኮ ኤንቲ ታ አሳ ግዶን ምንድ ዳና። 17ሽን ኪተቶና እፅዳ ካዎተታ ታኒ ፖሎ ሾዳዳ ይ-ሳና” ያጌስ ጎዳይ።