ኤርምያሳ 1

1ብንያመ ቢታን፥ አናቶታ ካታማን ደእያ ካህነታፐ እሱዋ ግድዳ ካልቀ ናኣ ኤርምያሳ ቃላይ ሀይሳ። 2አሞነ ናአይ፥ ይሁዳ ካዎይ እዮስያስ ካዎትዳ ታማነ ሄን ላይን ጎዳ ቃላይ ኤርምያሳኮ ይስ። 3እዮስያሳ ናአይ፥ ይሁዳ ካዎይ እዮአቄም ካዎትዳ ላይታን ጎዳ ቃላይ ኤርምያሳኮ ይስ። ቃስ እዮስያሳ ናአይ፥ ሰደቅያስ ካዎትን፥ ታማነ እስ ላይ ጋካናዉነ፥ እቻሻን አጌናን የሩሳላመ አሳይ ድኤትድ ብዳ ዎድያ ጋካናዉ ጎዳ ቃላይ እያኮ ይስ።

ኤርምያሳ ፄገተ

4ጎዳ ቃላይ ታኮ ሀይሳዳ ያግሸ ይስ፦ 5“ኔኒ ነ አየ ኡሎን መታናፐ ስን ታ ነና ኤራይስ። ነ የለታናፐ ስን ታ ነና ዱማያዳ ዎስ፤ ካዎተታስ ነና ናበ ኦዳ ሹማስ” ያግስ።

6ታኒ፥ “ኡባ ሃርያ ጎዳዉ፥ ታኒ ናአ ግድያ ግሾ ዋታዳ ኦደታነኮ ኤርከ” ያጋስ።

7ሽን ጎዳይ፥ “ ‘ታኒ ናአ ጎፓ’፤ ታኒ ነና ኪትያ በሳ ባዳ ታ ኪታ ኡባ አሳስ ኦዳ። 8ታኒ ነና አሻናዉ ኔራ ደእያ ግሾ ኤንታዉ ያዮፋ። ሀይሳ ኦደይ ጎዳ” ያግስ።

9ጎዳይ ባ ኩሽያ የድድ፥ ታ ዶና ቦችድ፥ “ሄኮ፤ ታኒ ታ ቃላ ነ ዶናን ዎስ። 10ሾዳናዉነ ላላናዉ፥ ይሳናዉነ ሽራ የጋናዉ፥ ኬፃናዉነ ቶካናዉ፥ አሳ ቦላነ ካዎተታ ቦላ ታ ነና ሀች ሹማስ” ያግስ።

11ጎዳ ቃላይ ታኮ፥ “ኤርምያሳ፥ ኔኒ አይ በአይ?” ያግስ።

ታኒ ዛራዳ፥ “ላዉዘ ም ፃምአ በአይስ” ያጋስ። 12ጎዳይ፥ “ኔኒ ልከ በአዳሳ። ታካ ታ ቃላ ፖላናዉ ሀይሳዳ በአይስ” ያግስ። 13ዛሪድ ጎዳይ፥ “ሀራ አይ በአይ” ያግስ።

ታኒ ዛራዳ፥ “እስ ፐንትያ ፃሮይ ፑደሀ ባጋፈ እስ ባጋ ገድ ግድ ኡትዳይሳ በአይስ” ያጋስ።

14ጎዳይ፥ “ፑደሀ ባጋፈ ዮይ ፖድ፥ ቢታን ደእያ አሳ ኡባ ቦላ ጉካና። 15ታኒ ፑደሀ ባጋ ካዎተታን ደእያ አሳ ኡባ ፄጋና ሀናይስ። ኤንታ ካዎት ይድ፥ የሩሳላመ ገልያ ፐንገታን፥ ድርሳ ዩሹዋንነ ይሁዳ ካታማታ ኡባን ባንታ አራታ ዎና። 16ይሁዳ አሳይ ታና አግድ፥ ኢታ ኦዳ ግሾ፥ ሀራ ፆሳታስ እፃነ ጩይስዳ ግሾነ ባንታ ኩሸን ኦዳ ፆሳታ ጎይንዳ ግሾ ታ ፕርዳ ኤንታ ቦላ ኤሀስ።

17“ሽን ኔኒ ጊገታ! ደንዳዳ ታኒ ነና ኪትያባ ኡባ ኤንታዉ ኦዳ። ኤንታዉ ያዮፋ፤ ነ ኤንታዉ ያይኮ፥ ታ ነና ኤንታ ስንን ጉጃዳ ያሽሳና። 18ሀች ታ ነና ሀ ቢታ ቦላ፥ ይሁዳ ካዎታ ቦላ፥ ሀላቃታ ቦላ፥ ካህነታ ቦላነ ሀ አሳ ቦላ ግምበትዳ ካታማዳ፥ ብራታ ቱሳዳነ ናሰ ብራታን ድርዳ ድርሳዳ ኦዳ ምንስ። 19ኤንቲ ኔራ ኦለታና፤ ሽን ታ አሻናዉ ኔራ ደእያ ግሾ ነና ፆኖኮና። ሀይሳ ኦደይ ጎዳ” ያግስ።